Moldova portalı: BQXK öz nəqliyyat vasitələri ilə qaçaqmal keçirməyə cəhd edib
Kişineu, 11 iyul, AZƏRTAC
Moldovanın nüfuzlu “Noi” xəbər portalı Laçın buraxılış məntəqəsindən Beynəlxalq Qırmızı Xaç Komitəsinə (BQXK) məxsus nəqliyyat vasitələri ilə qaçaqmal keçirilməsi cəhdləri barədə məqalə dərc edib.
AZƏRTAC-a istinadla dərc edilən məqalədə vurğulanır ki, Azərbaycanın Ermənistanla dövlət sərhədində nəzarət-buraxılış məntəqəsi fəaliyyətə başladığı vaxtdan BQXK-ya məxsus avtomobillərin hərəkətinə lazımi şərait yaradılıb, müvafiq qaydada sərhəd və gömrük nəzarətindən keçməklə dövlət sərhədindən buraxılıb. Ancaq ötən müddət ərzində Dövlət Sərhəd Xidmətinin əməkdaşları həmin nəqliyyat vasitələri ilə qanunsuz yolla müxtəlif növ qaçaqmalın keçirilməsi cəhdlərini aşkarlayıb. Bu barədə BQXK-ya rəsmi kanallar vasitəsilə xəbərdarlıq edilməsinə baxmayaraq, qanunazidd əməllər təkrar olunub və onların aradan qaldırılması üçün zəruri addımlar atılmayıb.
Məqalədə qeyd olunur ki, BQXK-ya məxsus olan və tibbi təxliyə həyata keçirən nəqliyyat vasitələrindən qaçaqmalçılıq üçün istifadə edilməsi Azərbaycanın qanunlarının kobud şəkildə pozulması faktları olmaqla yanaşı, həm də ölkəmizin humanitar təşkilat olan BQXK-ya etimadından sui-istifadə olunmasıdır.
Bu faktlarla əlaqədar Azərbaycanın Cinayət Məcəlləsinin müvafiq maddələri ilə cinayət işi açılıb və zəruri istintaq tədbirləri həyata keçirilənə qədər Laçın dövlət sərhədindən buraxılış məntəqəsindən keçid müvəqqəti olaraq dayandırılıb.
Bütün qaçaqmalçılıq faktları yerində əməliyyat çəkilişləri ilə sənədləşdirilib.
Emil Hüseynli
AZƏRTAC-ın xüsusi müxbiri
Kişineu
Bölmənin digər xəbərləri
