Pakistanda “Soyqırımı və etnik təmizləmə: Xocalı-25” mövzusunda seminar keçirilib
İslamabad, 22 fevral, АZƏRTAC
Azərbaycanın Pakistandakı səfirliyinin təşkilatçılığı ilə bu ölkənin Xarici İşlər Nazirliyinin İslamabad Strateji Araşdırmalar İnstitutunda “Soyqırımı və etnik təmizləmə: Xocalı-25” mövzusunda seminar keçirilib.
Xocalı soyqırımının 25-ci ildönümünə həsr olunan tədbirdə Pakistan Senatının Müdafiə Komitəsinin sədri, senator Müşahid Hüseyn, İslamabad Strateji Tədqiqatlar İnstitutunun direktoru, səfir Xalid Mahmud, Pakistan Milli Assambleyasının deputatı, Pakistan-Azərbaycan parlamentlərarası dostluq qrupunun məsul nümayəndəsi Şaza Fatimə Xavaca, Milli Müdafiə Universitetinin beynəlxalq əlaqələr idarəsinin sabiq direktoru, ekspert Məhəmməd Xan, yüksək rütbəli diplomatlar, tədqiqatçılar, ictimaiyyət nümayəndələri və jurnalistlər iştirak ediblər.
Səfir Xalid Mahmud Ermənistanın Xocalıda törətdiyi soyqırımının Azərbaycanın müasir tarixinin faciəli və qanlı səhifələrindən biri olduğunu bildirib. Direktor 1993-cü ildə BMT Təhlükəsizlik Şurasının Ermənistan qoşunlarının Azərbaycanın işğal olunmuş torpaqlarından dərhal və qeyd-şərtsiz çıxarılmasını tələb edən dörd qətnaməsinin qəbulunda Pakistanın aparıcı rol oynadığını, ölkəsinin sonrakı dövrlərdə də Azərbaycanı tam dəstəklədiyini diqqətə çatdırıb.
Azərbaycanın Pakistandakı səfiri Əli Əlizadə erməni şovinistlərinin son 200 ildə azərbaycanlılara və ümumilikdə türklərə qarşı etnik təmizləmə, işğalçılıq siyasəti həyata keçirdiklərini, təkcə XX əsrdə azərbaycanlıların öz doğma yurdlarından didərgin salındıqlarını, ermənilərin tək Azərbaycanda deyil, böyük Ermənistan dövlətinin yaradılması xülyaları ilə Türkiyə, İran və bir sıra digər ölkələrdə qətliamlar törətdiklərini vurğulayıb. Bununla kifayətlənməyən işğalçı ölkənin 1988-ci ildə yenidən Azərbaycana qarşı ərazi iddiaları qaldırdığını, 20 faiz torpaqlarımızı işğal etdiyini, 1992-ci ildə Xocalıda azərbaycanlıların soyqırımını törətməklə bəşəriyyətə qarşı cinayətə imza atdığını bildirib.
Səfir Xocalıda soyqırımı törədən ermənilərin məqsədlərinin strateji əraziləri ələ keçirməklə yanaşı, qədim Azərbaycan tarixini əks etdirən müsəlman abidələrinin, sənət əsərlərinin məhv edilməsi olduğunu və bu cür vəhşilikləri törədənlərin cəzalandırılacağını vurğulayıb. O, Xocalı soyqırımını tanıyan ilk ölkə kimi qardaş Pakistana və onun xalqına minnətdarlığını ifadə edib, bu soyqırımını tanıyan dövlətlərin sayının hər il artdığını bildirib.
Şaza Fatimə Xavaca Azərbaycan-Pakistan əlaqələrinin səmimi dostluğa və əməkdaşlığa əsaslandığını, ölkələrimizin bütün məsələlərdə bir-birini dəstəklədiyini, Pakistanın Ermənistanın hüquqazidd işğalına qarşı çıxdığını, bu ölkəni bir dövlət olaraq tanımadığını qeyd edib.
O, “BBC”, “Nyu York Tayms” və digər mənbələrdən sitatlar gətirərək bildirib ki, Xocalıda baş verənlər dəhşət doğurur. Belə ki, hətta azərbaycanlı hamilə qadın və uşaqlar da yaxın məsafədən xüsusi qəddarlıqla qətlə yetirilib. O deyib ki, Azərbaycan xalqı və dövləti çox yetkin mövqe nümayiş etdirərək bir tərəfdən hadisəni unutmur, digər tərəfdən də dünyadan Xocalıya ədalət tələb edir.
Məhəmməd Xan vurğulayıb ki, Ermənistan ordusunun və keçmiş SSRİ-nin 366-cı alayının Xocalını hədəf seçməkdə məqsədlərindən biri də şəhərin strateji mövqeyi, tarixi-mədəni və sosial əhəmiyyəti olub. Xocalının məhvi, əhaliyə qarşı soyqırımının törədilməsi təsadüfi deyil, əvvəlcədən planlaşdırılan işğalçılıq siyasəti olub.
Müşahid Hüseyn Azərbaycan-Pakistan münasibətlərinin ortaq dəyərlərə, eyni zamanda, birgə maraqlara və qarşılıqlı əməkdaşlığa əsaslandığını deyib, Pakistanın Dağlıq Qarabağ məsələsində Azərbaycanın haqlı mövqeyini tam dəstəklədiyini ifadə edib. M. Hüseyn bildirib ki, beynəlxalq aləmin bu kimi məsələlərə ikili standartlardan yanaşdığına görə, Xocalı soyqırımına tam ədalətli qiymət verilməyib. O, həmçinin Azərbaycana səfərləri zamanı ölkəmizin inkişafının şahidi olduğunu və bundan qürur duyduğunu deyib.
Natiq Azərbaycanın 1918-ci ildə İslam dünyasında ilk parlament təsis etdiyini, ölkəmizin mühüm dövlətçilik ənənələrinə malik olduğunu qeyd edib, Azərbaycanı ilk tanıyan ölkələrdən birinin Pakistan olduğunu diqqətə çatdırıb. Kəşmir məsələsində Azərbaycanın da Pakistana dəstəyinin yüksək qiymətləndirildiyini vurğulayıb. O, Azərbaycanın birinci xanımı Mehriban Əliyevanın təşəbbüsü və dəstəyi ilə Pakistanda bir çox humanitar layihələrin icra edildiyi barədə də məlumat verib, bu layihələrin həyata keçirilməsinin dostluq və qardaşlıq əlaqələrinin təzahürü olduğunu ifadə edib.
Seminarda, həmçinin Xocalı soyqırımına dair sənədli film nümayiş etdirilib, seminarın keçirildiyi salonun foyesində qətliamı əks etdirən fotostend, eləcə də Ermənistan-Azərbaycan, Dağlıq Qarabağ münaqişəsi, Azərbaycan həqiqətlərinə dair müxtəlif məzmunlu kitablar, bukletlər və digər əyani materiallardan ibarət sərgi təşkil olunub.
Qulu Kəngərli
AZƏRTAC-ın xüsusi müxbiri
İslamabad
Bölmənin digər xəbərləri
