SİYASƏT
Qanunvericilikdə taksi xidmətlərini tənzimləyən dəyişikliklər zamanın tələbidir
![Qanunvericilikdə taksi xidmətlərini tənzimləyən dəyişikliklər zamanın tələbidir](/files/2023/2/1200x630/16865856906089623982_1200x630.jpg)
Bakı, 12 iyun, AZƏRTAC
Qanunvericilikdə taksi xidmətlərini tənzimləyən dəyişikliklər zamanın tələblərindən irəli gəlir. Bu sahədə olduqca çox neqativ hallar mövcuddur. Belə hallara avtomobillərin texniki, ekoloji, estetik göstəricilərinin standartlardan uzaq olması ilə bərabər, taksi sürücülərinin özlərinin də tələblərə cavab verməmələri aiddir. Bakı böyük beynəlxalq tədbirlərə ev sahibliyi edir. İldən-ilə ölkəmizə turist axını artır, onların əksəriyyəti Bakıda olurlar. Bu şərtlər taksi xidmətinin yüksək səviyyədə olmasını tələb edir.
Bunu AZƏRTAC-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Elnur Allahverdiyev bildirib.
O qeyd edib ki, taksi fəaliyyətinin nizamlanması, müasir standartlara cavab verməsini vətəndaşlarımız özləri tələb edirlər. “Kim istəyir, bir maşın icarəyə götürür, qlobal aqreqatorlarla tələb olunan proseduru reallaşdırdıqdan sonra taksi fəaliyyətinə başlayır. Bu sahəyə dair vətəndaş şikayətlərinin sayı-hesabı yoxdur. Bu baxımdan, bugünkü taksi fəaliyyəti ilə bağlı, bu fəaliyyəti tənzimləyəcək Qanunun qəbul edilməsi olduqca vacibdir. Dövlətimiz bu problemin aradan qaldırılması istiqamətində qətiyyətli və israrlıdır. Vəziyyət həqiqətən də acınacaqlıdır və bunu tək hər birimizin izlədiyi intizamsızlıq deyil, statistik göstəricilər də təsdiqləyir. Tək bir faktı deyim ki, Bakı şəhərində olan taksilərin sayı tələb olunan normadan 4-5 dəfə çoxdur. Bu, ekoloji problemdir, bu tıxaclardır. Təsəvvür edin ki, metro dünyanın hər yerində ən rahat və sürətli şəhərdaxili sərnişindaşıma nəqliyyat növüdür. Həm də hər yerdə digər sərnişindaşıma xidmət növlərinə münasibətdə ən ucuzudur. Ancaq Bakıdakı statistikaya əsasən, 2019-cu illə müqayisədə 2022-ci ildə Bakı metrosundan istifadə edən sərnişinlərin sayı 12 faiz, avtobuslarda isə 35 faiz azalıb. Aydındır ki, Bakıda əhalinin sayı bu qədər azalmayıb, nə də şəxsi avtomobil əldə edənlərin sayında bu qədər artım yoxdur. Səbəb məlumdur”, - deyə E.Allahverdiyev diqqətə çatdırıb.
Deputatın sözlərinə görə, statistika Bakıda tələb olunandan 4-5 dəfə artıq taksi avtomobilinin olduğunu göstərir. Qaninvericilikdə tənzimləmələrlə onların sayının azaldılması, fəaliyyət şərtlərinin isə sərtləşməsi çox yaxşıdır. Məlumdur ki, Bakıda bir neçə taksi xidməti göstərən qlobal aqreqator işləyir. Bunlar “Bolt”, “Uber”, “Yango” və bu yaxınlarda işə başlamış “Uklon”dur. “Məsələn, qonşu Gürcüstanın paytaxtında, Tbilisidə yalnız “Bolt” işləyir. Bakı Tbilisidən böyükdür, o zaman bizdə də iki operator olsun. Türkiyədə bu yaxınlarda “Uber”in fəaliyyətinin dayandırılmasının səbəbi onunla izah olundu ki, məqsəd qeyri-ədalətli rəqabətin qarşısını almaqdır. Düzdür, sahibkarlıq fəaliyyəti azaddır. Ancaq hesab edirəm ki, sadaladığımız problemlərin əksəriyyətinin mənbəyi məhz buradadır”, - deyən Elnur Allahverdiyev fikirlərini yekunlaşdırıb.