Qətiyyətli liderlik və uzaqgörən siyasət bütöv bir regionun gələcəyini müəyyən edir ŞƏRH
Bakı, 12 avqust, AZƏRTAC
Azərbaycan Prezidenti İlham Əliyevin Vaşinqton səfəri, ABŞ Prezidenti Donald Trampla keçirilmiş ikitərəfli görüş və ardınca imzalanmış üçtərəfli sülh bəyanatı beynəlxalq münasibətlər sistemində yeni geosiyasi reallıqlar yaradan mühüm tarixi hadisə kimi qiymətləndirilir.
Bu fikirləri AZƏRTAC-a açıqlamasında “Qarabağın Tərəqqisi Naminə” İctimai Birliyinin sədri Şəbnəm Səfərova söyləyib.
Onun sözlərinə görə, bu səfər təkcə ikitərəfli münasibətlərin inkişafı baxımından deyil, həm də regionda sabitliyin və sülhün təmin olunması istiqamətində atılmış strateji addım kimi xüsusi əhəmiyyət daşıyır.
“Məlumdur ki, Azərbaycanın müstəqilliyin ilk illərində üzləşdiyi çətinliklər və xarici təzyiqlər ölkəmizin inkişafına ciddi maneələr törətmişdir. Xüsusilə 1992-ci ildə ABŞ Konqresində qəbul olunmuş və Azərbaycana birbaşa iqtisadi yardımın qarşısını alan “Azadlığa Dəstək Aktına” edilmiş 907-ci düzəliş uzun illər beynəlxalq münasibətlərdə ikili standartların bariz nümunəsi kimi qalmaqda idi. Həmin dövrdə Azərbaycan Ermənistanın işğalçılıq siyasəti ilə yanaşı, beynəlxalq hüququn kobud şəkildə pozulmasına rəğmən ədalətsiz qərarların qurbanına çevrilmişdi. Sonrakı mərhələlərdə də bəzi dairələrin Azərbaycana qarşı qeyri-obyektiv münasibəti müxtəlif formalarda davam edib. ABŞ-ın keçmiş administrasiyası, Fransa rəhbərliyi, eləcə də Avropa İttifaqı və Avropa Şurası çərçivəsində bəzi dairələr uzun müddət ölkəmizə qarşı təzyiq və siyasi təcrid siyasəti həyata keçirib, birtərəfli güzəştlərə məcbur etməyə cəhd göstəriblər. Bu siyasətin tərkib hissəsi kimi, beynəlxalq mediada aparılan məqsədli kampaniyalar və sanksiya təhdidləri də diqqətdən kənarda qalmırdı. Lakin son dövrün reallıqları göstərdi ki, Azərbaycanın milli maraqları yalnız güclü liderlik, prinsipial siyasi mövqe və ardıcıl diplomatik strategiya ilə təmin oluna bilər. Məhz Prezident İlham Əliyevin rəhbərliyi ilə aparılan uğurlu siyasət nəticəsində beynəlxalq aləmdə Azərbaycanın mövqeyi möhkəmlənib, ölkəmizin regional və qlobal məsələlərdə roluna fərqli yanaşma formalaşıb. Vaşinqton səfərinin nəticələri də bu mənada əlamətdardır. Bir zamanlar Azərbaycana qarşı tənqidi mövqedə dayanan nüfuzlu siyasi şərhçilər, beynəlxalq media nümayəndələri və bir sıra ölkələrin yüksək vəzifəli rəsmiləri bu gün imzalanan sülh bəyanatını son onilliklərin ən mühüm diplomatik uğurlarından biri kimi dəyərləndirirlər”, - deyə Ş.Səfərova əlavə edib.
O bildirib ki, bu bəyanat yalnız Azərbaycan ilə Ermənistan arasında münasibətlərin tənzimlənməsi baxımından deyil, həm də Cənubi Qafqazdan başlayaraq bütövlükdə regionda və digər münaqişə zonalarında sülh modelinin təşəkkül tapması üçün presedent rolunu oynayır. Uzaq Şərqdən Avropaya qədər uzanan nəqliyyat və kommunikasiya xətləri, o cümlədən Zəngəzur dəhlizi (TRİPP) kimi layihələr, regionun iqtisadi və geosiyasi arxitekturasının yenidən qurulmasına səbəb olacaq. Bu isə uzun illər ərzində bəzi güc mərkəzlərinin bölgədə yaratdığı haqsız status-kvonun aradan qaldırılması baxımından mühüm dönüş nöqtəsidir. Hazırkı mərhələdə Ermənistan qarşısında real seçim dayanır. Əgər bu ölkə regionda sülhün və sabitliyin təmininə səmimi şəkildə töhfə vermək niyyətindədirsə, konkret və ardıcıl addımlar atmalıdır. Sülh danışıqlarının davamlılığı və nəticəyə yönəlməsi üçün Ermənistanın daxili hüquqi sistemində, xüsusilə də Konstitusiyasında beynəlxalq hüquqla ziddiyyət təşkil edən müddəalara yenidən baxılması zəruridir. Burada əsas həqiqət ondan ibarətdir ki, bu tarixi mərhələnin memarı Azərbaycan və onun siyasi rəhbərliyidir. 44 günlük Vətən müharibəsində qazanılmış parlaq Qələbə nəticəsində ölkənin ərazi bütövlüyü və suverenliyi tam şəkildə təmin olunub, postmünaqişə dövründə isə sülh gündəliyinin irəli aparılması istiqamətində ardıcıl və qətiyyətli siyasət həyata keçirilib.
Şəbnəm Səfərova, həmçinin bu hadisənin yalnız 35 illik münaqişənin deyil, həmçinin zaman-zaman alovlandırılmış mürəkkəb tarixi ziddiyyətlərin də sonlanması olduğunu bildirərək deyib: “Azərbaycanın mövqeyi birmənalıdır: sülh nə qədər tez reallaşarsa, regionda bir o qədər çox insan həyatı xilas olunar, sabitliyin və inkişafın təmin edilməsi mümkün olar. Tarix sübut edir ki, qətiyyətli liderlik və uzaqgörən siyasət yalnız bir ölkənin deyil, bütöv bir regionun gələcəyini müəyyən edir. Prezident İlham Əliyevin Vaşinqtonda qazandığı diplomatik uğur da məhz belə bir qlobal dönüş nöqtəsinin göstəricisidir”.
Bölmənin digər xəbərləri
