Regionlarımızda təhsil müəssisələri və infrastrukturu yenilənir
Bakı, 9 avqust, AZƏRTAC
Hər bir ölkənin gələcəyi onun intellektual potensialından asılıdır. İnkişaf etmiş ölkələrin təcrübəsinə nəzər salaraq görürük ki, həmin ölkələrdə təhsilə, elmə, intellektual məhsulların yaradılmasına böyük investisiyalar qoyulur. Azərbaycan da bu yolu seçibdir. Ölkəmizdə aparılan geniş quruculuq işləri hamımızı sevindirir. Ölkəmiz bütün sahələrdə sürətlə və uğurla inkişaf edir, günü-gündən güclənir. Bu, özünü həm statistik göstəricilərdə göstərir, eyni zamanda, biz bu müsbət dəyişiklikləri gündəlik həyatda görürük. Regionlarımızda aparılan quruculuq və abadlıq işləri də buna bir nümunədir. Bölgələrimizdə təhsil müəssisələri və infrastrukturu yenilənir, müasir standartlara uyğun qurulur, onların maddi-texniki bazasının gücləndirilməsi istiqamətində mühüm addımlar atılır.
Bunu AZƏRTAC-a açıqlamasında Qazax-Tovuz Regional Təhsil İdarəsinin aparıcı məsləhətçisi Nəcibə Vəliyeva Qasımova bildirib. O bildirib ki, ölkə Prezidenti daim Azərbaycan təhsilinin inkişafına böyük diqqət və qayğı ilə yanaşır. Bu qayğısının nəticəsidir ki, dövlətimizin başçısının “Şəmkir şəhərində yeni ümumtəhsil məktəbi binasının tikintisi ilə bağlı tədbirlər haqqında” 2020-ci il 5 mart tarixli Sərəncamının icrası ilə əlaqədar məktəbin binası yenidən inşa olunub. Məhəmməd Füzuli adına təbiət və humanitar fənlər təmayüllü tam orta məktəb-liseyin binası ilk dəfə 1958-ci ilin dekabr ayında istifadəyə verilib. Təhsil ocağı 1958-ci ildən 1981-ci ilədək beynəlmiləl məktəb kimi fəaliyyət göstərib. 2012-ci ildən bu günədək isə təbiət və humanitar fənlər təmayüllü tam orta məktəb-lisey kimi fəaliyyətini davam etdirir. Təhsil infrastrukturunun inkişafı daim dövlətin diqqətindədir. Avqustun 7-də Prezident İlham Əliyev Şəmkir şəhəri Məhəmməd Füzuli adına təbiət və humanitar fənlər təmayüllü tam orta məktəb-liseyin yeni binasının açılışında iştirak edib. Məktəb-lisey müasir avadanlıqlar, inventar və mebel dəstləri, videomüşahidə, yanğın əleyhinə siqnalizasiya sistemi ilə təchiz edilib və mərkəzləşdirilmiş istilik sistemi yaradılıb. Həyətyanı sahəsində ehtiyat su anbarı, qazanxana tikilib, müasir işıqlandırma sistemi qurulub, asfalt örtük və yaşıllıq zolağı salınıb. Məktəbin ərazisi 1,24 hektar, tikinti sahəsi 3902,95 kvadratmetr, ümumi sahəsi isə 14120,73 kvadratmetr olmaqla məktəb binası 3 korpus və 4 mərtəbədən ibarətdir. Məktəb binasında 65 sinif otağı, 2 kimya laboratoriyası, 2 fizika, 2 biologiya laboratoriya otaqları, 4 informatika, 1 hərbi hazırlıq, 2 məktəbəhazırlıq kabinetləri, 2 texnologiya, 1 STEAM (kompüter otağı) otaqları, 1 idman zalı, voleybol və futbol meydançaları, akt zalı və yeməkxana fəaliyyət göstərir. Məktəb-lisey 1600 yerlikdir və bu uşaqların təlim-tərbiyəsi ilə 101 nəfər pedaqoji heyət məşğul olur.
“Bu möhtəşəm və müasir standartlara cavab verən məktəb-liseyin yenidən inşasına görə ölkə rəhbərinə məktəbin kollektivi, şagirdlər və valideynlər adından minnətdarlığımızı bildiririk. Əminik ki, Şəmkir şəhəri Məhəmməd Füzuli adına təbiət və humanitar fənlər təmayüllü tam orta məktəb-liseyin yetişdirdiyi savadlı və bilikli gənclər gələcəkdə ölkəmizin inkişafı naminə daim yorulmadan uğurla fəaliyyət göstərəcəklər”,- deyə Nəcibə Vəliyeva Qasımova fikrini yekunlaşdırıb.
Bölmənin digər xəbərləri
