TAMBLİNQ ÜZRƏ AZƏRBAYCAN ÇEMPİONATI BAŞA ÇATMIŞDIR

29.05.2004 [17:36]
Çap et
A⁺ A^-

Bakı Gimnastika Məktəbində tamblinq üzrə Azərbaycan çempionatında Nizami rayonu idman məktəbini, gimnastika məktəbini və Dəvəçi rayonu idman məktəbini təmsil edən 40 tamblinqçi mübarizə aparmışdır. Azərbaycan Gimnastika Federasiyasının mətbuat xidmətindən AZƏRTAC-ın müxbirinə bildirmişlər ki, çempionlar çoxnövçülüyün yekunlarına əsasən müəyyən edilmişlər.

Salto, vintvari və qarışıq təmrinlərin yekunlarına görə idman ustaları arasında gimnastika məktəbindən Rəvan Yusubov 25,16 balla birinci yeri tutmuşdur. Ustalığa namizədlər arasında isə Dəvəçidən Rövşən Əliyev birinci olmuşdur- 27,18 bal.

Birinci yaşlılar dərəcəsində Nizami rayonu idman məktəbindən Fərid Salmanlı ən yüksək nəticə (26,62 bal) göstərmişdir. İkinci yaşlılar dərəcəsində Orxan Bağırov (gimnastika məktəbi – 27,20 bal) və Nərminə Minequrova (Nizami rayonu idman məktəbi – 27,0 bal) ölkə çempionu olmuşlar. Üçüncü yaşlılar dərəcəsində gimnastika məktəbinin nümayəndələri Nahid İbrahimli (26,16 bal) və Səbinə Ağayeva (27,01) qalib gəlmişlər.

Ölkəmizin tramplin-tamblinq üzrə yığma komandası iyunun sonunda Odessada beynəlxalq turnirdə iştirak edəcəkdir.