Tovuz rayonu istiqamətində baş vermiş qanlı insident digər döyüşlərdən fərqlənirdi - Şərh
Tovuz döyüşlərinin ən mühüm nəticəsi ondan ibarətdir ki, Azərbaycan xalqı işğal altında olan torpaqlarımızı azad etmək üçün Ali Baş Komandanın ətrafında sıx birləşdi
Bakı, 12 iyul, AZƏRTAC
Tovuz döyüşləri kimi tarixə düşmüş məlum qanlı hadisələrdən artıq üç il ötür. Azərbaycan-Ermənistan sərhədində baş vermiş döyüşlər bir sıra məqamlarla yadda qalıb. Təxribat törətmək, aradan “quru” çıxmağa çalışmaq qonşularımızın şakəridir. Biz ötən əsrin 90-cı illərində erməni quldurlarının Azərbaycana və azərbaycanlılara qarşı törətdikləri terror aktlarını, hiyləgərcəsinə əl atılmış mənfur əməllərini unutmamışıq. Amma Tovuz rayonu istiqamətində baş vermiş qanlı insident digərlərindən fərqlənirdi.
Bunu AZƏRTAC-a açıqlamasında Tovuz döyüşlərinin ildönümü ilə əlaqədar ehtiyatda olan mayor, Qarabağ müharibəsi veteranı, hərbi ekspert Əbülfət Məhərrəmli deyib.
Ekspert vurğulayıb ki, Tovuz döyüşlərini təhlil edərkən əvvəlcə həmin ərəfədə baş vermiş hadisələrə diqqət yetirmək lazım gəlir. Məlum olduğu kimi, Ermənistanda 2018-ci ildə hakimiyyətə gəlmiş Soros fondunun yetirməsi hesab olunan baş nazir Nikol Paşinyan aqressiv bəyanatlarla çıxış etməyə başladı. O, işğal edilmiş Şuşa şəhərində keçirdikləri mərasimdə “Qarabağ Ermənistandır və nöqtə” deyə qəbuledilməz fikir səsləndirdi. Əlbəttə, Azərbaycan Prezidenti İlham Əliyev Ermənistan rəhbərinin sərsəm bəyanatının cavabını vermiş və “Qarabağ Azərbaycandır və nida!” demişdi. Ancaq Ermənistanın baş nazirinin bəyanatı əslində Qarabağ münaqişəsinin həll edilməsi ilə bağlı aparılan danışıqlar prosesinin dalana dirənməsi idi.
Qarabağ müharibəsi veteranının sözlərinə görə, Tovuz döyüşləri iki ölkə arasında siyasi gərginliyin son həddə çatdığı belə məqamda 2020-ci il iyulun 12-də baş verdi. Düşmən ordusunun bölmələri Azərbaycan Dövlət Sərhəd Xidmətinin mövqelərinə artilleriya zərbələri endirdi və həmin mövqeləri ələ keçirməyə cəhd etdi. Adətən uydurma, saxta məlumatlardan yararlanmağa çalışan Ermənistan Müdafiə Nazirliyi, Azərbaycan bölmələrinin guya “UAZ” markalı hərbi avtomobillə Ermənistan tərəfə hücum etməsi barədə yenə absurd bəhanə gətirmişdi. Əslində düşmən Azərbaycanın əsas enerji kommunikasiya xətlərinin keçdiyi Tovuz rayonunu təsadüfən seçməmişdi. Ancaq 2016-cı ilin aprelində olduğu kimi, bu dəfə də düşmən məqsədinə çata bilmədi. 1994-cü ildə imzalanmış atəşkəs razılaşmasından sonra Azərbaycan rəhbərliyi ordu quruculuğunu prioritet elan etmiş, Silahlı Qüvvələrimizi həm təchizat, həm də döyüş qabiliyyəti baxımından müasir dünya orduları səviyyəsinə qaldırmışdı. Dörd gün davam etmiş Aprel döyüşlərində qoşunlarımız kəşfiyyat aparmış, Ermənistan ordusuna sarsıdıcı zərbə endirmiş, xeyli ərazimizi işğaldan azad etmişdi. Tovuz döyüşlərində də düşmən ağır itkilərə məruz qaldı.
“Müharibə itkisiz olmur. Azərbaycan Tovuz döyüşlərində general-mayor Polad Həşimov, polkovnik İlqar Mirzəyev kimi qəhrəman oğullarını itirdi. Ümumilikdə qarşıdurma zamanı itkilərimiz 12 hərbçi və bir mülki vətəndaş oldu və onların hər birinin adı məlumdur. Ancaq 100-dən artıq itki vermiş, xeyli sayda döyüş texnikası məhv edilmiş Ermənistan ordusu bu günədək itkilərinin sayını azaldır və xalqdan gizlədir.
Tovuz döyüşlərinin ən mühüm nəticəsi ondan ibarətdir ki, Azərbaycan xalqı işğal altında olan torpaqlarımızı azad etmək üçün Prezident, Ali Baş Komandanın ətrafında sıx birləşdi. Azərbaycan xalqla ordunun vahid və qüdrətli olduğunu döyüşlər zamanı bütün dünyaya göstərdi. Bu vəhdət Vətən müharibəsi zamanı düşməni diz çökdürməyə, 44 gün ərzində İrəvanı kapitulyasiyaya məcbur etməyə imkan verdi”, - deyə ehtiyatda olan mayor əlavə edib.
Bölmənin digər xəbərləri
