SİYASƏT
Türkiyə-Azərbaycan əlaqələri yeni hədəflərə doğru istiqamət alır
![Türkiyə-Azərbaycan əlaqələri yeni hədəflərə doğru istiqamət alır](/files/2023/2/1200x630/1686644020231231358_1200x630.jpeg)
Bakı, 13 iyun, AZƏRTAC
Eyni kökə, dilə, dinə sahib xalqlarımızın minilliklərə söykənən qədim tarixinə nəzər saldıqda, belə qardaşlıq köməyinin saysız-hesabsız nümunələrinə rast gəlmək mümkündür. Türkiyə və Azərbaycan xalqlarının Ulu öndərləri Mustafa Kamal Atatürkün “Azərbaycanın sevinci bizim sevincimiz, kədəri bizim kədərimizdir”, Heydər Əliyevin “Bir millət, iki dövlət” kəlamları xalqlarımızın çoxəsrlik qardaşlıq əlaqələrinə verilən ən yüksək qiymətdir.
İstər ikitərəfli, istərsə də beynəlxalq təşkilatlar çərçivəsində dostluq və əməkdaşlıq münasibətlərinin ən yüksək nümunəsini ortaya qoyan Azərbaycan ilə Türkiyə birlikdə nəhəng layihələr reallaşdırmaqla təkcə ölkələrimizin deyil, böyük bir regionun da inkişafına mühüm töhfələr verir. Azərbaycanın və Türkiyənin birlikdə həyata keçirdiyi Bakı-Tbilisi-Ceyhan, Bakı-Tbilisi-Ərzurum, Bakı-Tbilisi-Qars, TANAP kimi meqalayihələrdən qardaş ölkələrimizlə yanaşı, digər dövlətlərin xalqları da faydalanır.
Bunu AZƏRTAC-a açıqlamasında siyasi şərhçi Nicat İsmayılov söyləyib.
Onun sözlərinə görə, ölkələrimizin beynəlxalq və regional təşkilatlar, o cümlədən BMT, İqtisadi Əməkdaşlıq Təşkilatı, İslam Əməkdaşlıq Təşkilatı və Türk Dövlətləri Təşkilatı çərçivəsində koordinasiyalı fəaliyyət, qarşılıqlı dəstəyin davam etdirilməsi və gücləndirilməsi istiqamətində atdığı addımlar öz bəhrəsini verməkdədir. Azərbaycan-Türkiyə əlaqələrinin belə yüksək inkişafı regionun ümumi tərəqqisinə, sabitliyin bərqərar olmasına mühüm töhfələr verir. Bu münasibətlər, həmçinin türkdilli ölkələr və xalqlar arasında birliyin və əməkdaşlığın daha da gücləndirilməsini şərtləndirən ən mühüm amillərdən biridir. Türkiyə-Azərbaycan əlaqələri, eyni zamanda, bütün Türk dünyası üçün də mühüm rol oynayır. Türk dünyasının birləşməsi, türkdilli dövlətlər arasında əlaqələrin inkişafı üçün dövlət başçıları birgə səylər göstərirlər. 2021-ci il iyunun 15-də Prezident İlham Əliyev və Prezident Rəcəb Tayyib Ərdoğan Şuşada “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi”ni imzaladılar. Şuşa Bəyannaməsi iki qardaş ölkə arasında tarixi münasibətlərin yeni mərhələsi sayılır. Bu sənəddə təsbit olunan strateji müttəfiqlik iki qardaş dövlət arasında bütün sahələrdə sıx əməkdaşlıq, habelə təhlükəsizlik və müdafiə sahələrində qarşılıqlı yardım prinsiplərini ehtiva edir. Dövlətimizin başçısının Şuşanın Ankara ilə əvəzlənməsi təşəbbüsü Türkiyədə baş vermiş dəhşətli zəlzələ ilə bağlıdır. Əlbəttə, dünyanın bir çox ölkələrindən qardaş ölkəyə çoxsaylı başsağlığı diləkləri çatdırıldı, yardımlar göstərildi. Azərbaycan yardım göstərən ölkələrin ön sıralarında oldu. Zəlzələ ilə əlaqədar Türkiyəyə fevralın 6-dan martın 15-dək göstərilmiş humanitar və maliyyə yardımının ümumi məbləği 76 milyon 344 min 930 manat (44 milyon 908 min 783 ABŞ dolları) təşkil etdi. Türkiyəyə 53 milyon 568 min 530 manat (31 milyon 510 min 900 dollar) dəyərində humanitar yardım, 22 milyon 776 min 400 manat (13 milyon 397 min 883 dollar) məbləğində isə birbaşa maliyyə yardımı göstərildi. Bu gün də Azərbaycan zəlzələ nəticəsində qardaş ölkəyə dəymiş ziyanın aradan qaldırılması işində fəallıq göstərməkdədir.
Nicat İsmayılov qeyd edib ki, Prezident İlham Əliyevin Türkiyəyə səfərləri Azərbaycanın hər zaman qardaş xalqın yanında olduğunu göstərir. Lakin qlobal hədəflərin önəmli olduğunu diqqətə çatdıran siyasi şərhçi əlavə edib: “Buna görə dövlətimizin başçısı türk dövlətlərinin müştərək şəkildə dar gündə birlik mesajını verməsini vacib saydı. Həm də ona görə vacib saydı ki, Prezident İlham Əliyevin də bildirdiyi kimi, Azərbaycan həmişə Türk dünyasının sıx birləşməsinə öz töhfəsini verib və bundan sonra da Türk dünyasının birliyi amallarına sadiq qalacaq. 2009-cu ildə Naxçıvan Zirvə görüşündən başlayaraq Türk Dövlətləri Təşkilatı böyük inkişaf yolu keçib. Bu gün Azərbaycan-Türkiyə əməkdaşlığı ölkə prezidentlərinin iradəsinə uyğun olaraq yeni inkişaf mərhələsinə qədəm qoyub. Ölkələrimiz regionda və beynəlxalq aləmdə baş verən bütün hadisə və proseslərə münasibətdə eyni mövqedən çıxış edirlər. Qırx dörd günlük Vətən müharibəsində Türkiyənin göstərdiyi siyasi dəstək Azərbaycanın haqq işinin qazanılmasında böyük rol oynadı.
Türkiyə Prezidenti Rəcəb Tayyib Ərdoğanın prezident seçildikdən sonra Azərbaycana səfər etməsi Türkiyə-Azərbaycan münasibətlərinin unikallığı, bir millət iki dövlətin ortaq dəyərlərindən qaynaqlanaraq çox möhkəm, sarsılmaz bir təməl üzərində inkişafı, Ankaranın xarici siyasətində Bakının tutduğu yerin önəmi və bu strateji əməkdaşlığın yeni keyfiyyət mərhələsinə qədəm qoyması baxımından dünyaya mesajdır. R.T.Ərdoğanın Azərbaycana dövlət səfəri zamanı Prezident İlham Əliyevlə keçirdiyi görüşdə siyasi, iqtisadi, ticari, mədəni və digər sahələrdə əməkdaşlıq məsələləri müzakirə ediləcək. Ümumiyyətlə, Azərbaycanla Türkiyə arasında əməkdaşlığın genişlənməsi və dərinləşməsi hər iki dövlətin güclənməsinə, regionda sülhə və əmin-amanlığa xidmət edir, eyni zamanda, bütövlükdə Türk dünyası üçün yaxşı nümunədir. Bu səfər iki ölkə arasında iqtisadi-ticari əlaqələrin yeni hədəflərə doğru hərəkət götürməsinə və qarşılıqlı sərmayə qoyuluşlarının artmasına müsbət impuls verən amil olacaqdır”.