Ulu Öndərin 100 illik yubileyinə həsr olunmuş konqres işə başlayıb
Bakı, 13 aprel, AZƏRTAC
Aprelin 13-də Azərbaycan Tibb Universitetində (ATU) Ümummilli Lider Heydər Əliyevin anadan olmasının 100 illiyinə həsr olunmuş Azərbaycan tibb tələbələri və gənc alimlərinin beynəlxalq konqresi işə başlayıb.
Konqres iştirakçıları əvvəlcə Ulu Öndərin büstü önünə gül dəstələri qoyublar. Azərbaycan Tibb Universitetinin tələbələrinin iştirakı ilə Ulu Öndərə həsr olunan posterlər nümayiş etdirilib.
Konqresin rəsmi hissəsi Dövlət Himinin səsləndirilməsi ilə başlayıb.
AZƏRTAC xəbər verir ki, açılış mərasimində çıxış edən ATU-nun rektoru, professor Gəray Gəraybəyli Ulu Öndər Heydər Əliyevin bütün həyatını doğma xalqına həsr etdiyini, Vətənə, millətə ləyaqətlə, sədaqətlə xidmət etdiyini diqqətə çatdırıb. Qeyd olunub ki, istər sovetlər dövründə, istərsə də müstəqillik dönəmində Azərbaycan üçün ən həlledici anlarda məhz Heydər Əliyevin liderlik keyfiyyətləri, düşünülmüş siyasəti və cəsarətli addımları xalqımızı böyük bəlalardan xilas edib.
Heydər Əliyevin Azərbaycana rəhbərlik etdiyi illərdə respublikamızda həkim kadrlarının və tibb alimlərinin hazırlığının geniş vüsət aldığını bildirən rektor, bununla yanaşı, həmin dövrlərdə mövcud səhiyyə ocaqlarının abadlaşdırıldığını, yeni tibb müəssisə və mərkəzlərinin açıldığını, elmi-tədqiqat institutlarının fəaliyyətinin xeyli canlandığını da xüsusi vurğulayıb.
“Müstəqilliyimiz bərpa olunduqdan sonra Ulu Öndər Heydər Əliyev iki dəfə Azərbaycan Tibb Universitetində olub. Hər gəlişində tələbələrimizə, professor-müəllim heyətinə, bütövlükdə bütün səhiyyə işçilərinə öz dəyərli tövsiyələrini verib. 2002-ci ildə isə Heydər Əliyevin göstərişi ilə Azərbaycan Tibb Universitetinin ilk klinikası olan Stomatoloji Klinikasının yaradılması haqqında qərar qəbul olunub. Məhz Ümummilli Liderin göstərişi ilə universitetdə hərbi tibb fakültə yaradılıb. Ulu Öndərin səhiyyə sahəsində başlatdığı islahatlar bu gün də Müzəffər Ali Baş Komandan, Prezident İlham Əliyev tərəfindən uğurla davam etdirilir. Son illər ərzində Azərbaycanda səhiyyə sisteminin təkmilləşdirilməsi sahəsində nəzərəçarpan işlər görülüb, islahatlar aparılıb, tibb müəssisələrinin maddi texniki bazası ciddi dərəcədə möhkəmləndirilib. Son on ildə Azərbaycanda 600-dən çox tibb müəssisəsi tikilib və ya əsaslı təmir olunub. Bu gün Azərbaycan xalqı Ulu Öndəri sonsuz məhəbbətlə xatırlayır. Beynəlxalq konqres də Ümummilli Liderin əziz xatirəsinə tibb ictimaiyyəti, elm adamları və tələbələrin sonsuz ehtiramının bariz nümunəsidir”, - deyə G.Gəraybəyli qeyd edib.
Bakı Dövlət Universitetinin rektoru Elçin Babayev bildirib ki, şərəflə yaşadığı ömrünün təxminən 35 ilini Azərbaycana rəhbərlik edən, müstəqil Azərbaycanın qurucusu olan, əbədiyaşarlıq rəmzinə çevrilən Ulu Öndər elmin, təhsilin, iqtisadiyyatın, eləcə də səhiyyənin, tibb elminin dinamik inkişafının tənzimləyicisi kimi yaddaşlarda həkk olunub: “Ulu Öndər hər zaman tibb işçilərinə böyük qayğı göstərib və çıxışlarında həkimlik peşəsinin öz xalqına, sənətinə yüksək sədaqət tələb edən bir iş olduğunu vurğulayıb. Elmi-tədqiqatlar aparmağa qadir tibb personalının hazırlığı da qarşıda bir vəzifə kimi dururdu. Ulu Öndərin elm-təhsil və səhiyyə sahəsində müstəsna xidmətlərindən danışarkən xatırlatmaq lazımdır ki, tibb üzrə xarici mütəxəssis və alimlərin Azərbaycana gəlişi, yerli mütəxəssislərlə əlaqələrin qurulması, tibb elmi və tibb strategiyası ilə əlaqədar davamlı inkişaf strategiyası birmənalı olaraq Heydər Əliyevin adı ilə bağlıdır. Məhz Heydər Əliyevin göstərişi ilə Azərbaycan gəncləri keçmiş ittifaqın qabaqcıl tibb təhsili müəssisələrində və tibb ocaqlarında təhsil aldılar. Həmin şəxslər sonradan səhiyyəmizin inkişafına dəyərli töhfələrini verdilər və verməkdə davam edirlər”.
Naxçıvan Dövlət Universitetinin rektoru dosent Elbrus İsayev Ulu Öndər Heydər Əliyevin 100 illik yubileyinin nəinki ölkə daxilində, respublikamızın hüdudlarından kənarda da böyük coşqu ilə qeyd olunduğunu diqqətə çatdırıb. Bildirib ki, hər bir qurumun qarşısında Ümummilli Liderin ölkəmizə bəxş etdiyi əvəzsiz nemətləri, onun ərmağanlarını həm gənclərə, həm də dünyaya çatdırmaq kimi ciddi vəzifələr durur.
Heydər Əliyevin Naxçıvan Dövlət Universitetinin yaradılmasının, inkişafının, bugünkü səviyyəyə çatmasının birbaşa memarı olduğunu deyən rektor Ulu Öndərin dörd dəfə Naxçıvan Dövlət Universitetində olduğunu, müxtəlif fakültə, korpus, tədris binalarının təməlini qoyduğunu və ali təhsil ocağının inkişafını diqqətdə saxladığını bildirib.
Qeyd olunub ki, Ulu Öndərin ölkəmizdə müxtəlif sahələrin inkişafında, təməlinin möhkəmləndirilməsi istiqamətində müstəsna xidmətləri olub. Onun yaratdığı ənənələr Azərbaycanı bugünkü inkişaf səviyyəsinə qədər çatdırıb.
Türkiyə İğdır Universitetinin rektoru, professor Mehmet Hakkı Alma, Türkiyə Pelvik Ağrı və Endometrioz dərnəyinin rəhbəri, professor Erkut Attar və Özbəkistan Səhiyyə Nazirliyinin nümayəndəsi, professor Nematjon Ergaşev də çıxış edərək, bu mötəbər konqresdə iştiraklarından məmnun qaldıqlarını, burada aparılan təcrübə mübadiləsinin bütün iştirakçılar üçün faydalı olacağını söyləyiblər.
Konqres iş planına uyğun olaraq nəzəri təbabət, cərrahiyyə, ginekologiya, stomatologiya, terapiya, humanitar ictimai və digər bölmələr üzrə işini davam etdirib. Sessiyalarda həm azərbaycanlı, həm də xarici mütəxəssislərin məruzələri dinlənilib.
Qeyd edək ki, konqresdə Bakı Dövlət Universiteti, Naxçıvan Dövlət Universiteti, İ.M.Seçenov adına Birinci Moskva Dövlət Tibb Universitetinin Bakı filialının, o cümlədən Türkiyədən, Özbəkistandan, Qazaxıstandan, Rusiyadan professor-müəllim heyəti, tələbələr iştirak edirlər.
Ən aktual mövzuların müzakirə olunacağı konqresin işinə aprelin 14-də yekun vurulacaq.
Bölmənin digər xəbərləri
