Bakı, 6 may, AZƏRTAC

Azərbaycan xalqının taleyində əvəzsiz rol oynamış, tarixin çətin sınaqlarından müdrikliklə çıxaraq özünün dəmir iradəsi, güclü liderlik bacarığı ilə ölkəmizi intibaha, gələcək inkişafa aparan dahi azərbaycanlı Heydər Əliyev misilsiz xidmətləri ilə tariximizin silinməz səhifələrini yazıb.

Mənalı ömrünü doğma xalqına və Vətəninə həsr edən Heydər Əliyevin əziz xatirəsinə əbədi ehtiramın ifadəsidir ki, 2023-cü il ölkə Prezidenti tərəfindən Azərbaycanda “Heydər Əliyev İli” elan olunub.

Bu fikirlər Beyləqan Rayon Məhkəməsinin sədri Ramiz Nurullayevin “Ümummilli Lider Heydər Əliyevin məhkəmə-hüquq islahatlarında müstəsna rolu” sərlövhəli məqaləsində yer alıb. AZƏRTAC məqaləni təqdim edir.

Heydər Əliyev Azərbaycan tarixinin yetirdiyi ən böyük şəxsiyyətdir. Həyatı bilavasitə öz xalqı ilə sıx bağlı olan Ulu Öndər dövlətçilik salnaməmizdə təkrarolunmaz rəhbər, qüdrətli dövlət başçısı, fədakar insan kimi əbədiləşib. Danılmaz həqiqətdir ki, Heydər Əliyev Azərbaycanı sevən və bütün həyatını sevdiyi Azərbaycanına həsr edən, onun uğrunda fədakarcasına çalışan, hər addımını Vətəni və xalqı üçün atan bir şəxsiyyət, bir dövlət xadimidir. Ümummilli Lider azərbaycançılıq məfkurəsinin parlaq daşıyıcısı olaraq öz müdrik siyasəti, dəmir iradəsi və tarixi uzaqgörənliyi sayəsində milli dövlətçilik ideyasının gerçəkləşdirilməsinə, müasir Azərbaycan dövlətinin qurulmasına və xalqımızın müstəqillik arzusuna çatmasına nail olub. Müasir Azərbaycan tarixini yazan Heydər Əliyevin xalqı və dövləti qarşısındakı xidmətləri sübut edib ki, o, Azərbaycan dövlətini qorumaq, müstəqilliyini əbədi etmək üçün yaşamış, Azərbaycanı yaşatmaq üçün qurub yaradıb. Ulu Öndərin atdığı addımlar, verdiyi qərarlar hər bir zaman özü qədər əbədi olan Azərbaycanın etibarlı gələcəyinə yönəlib. Heç də təsadüfi deyil ki, Azərbaycanın quruculuq salnaməsində ən dolğun səhifələri təşkil edən Heydər Əliyevin 1969-1982-ci illərdə yaratdığı möhkəm potensial müstəqilliyimiz dövründə ölkənin inkişaf konsepsiyasını həyata keçirməyə hərtərəfli imkan yaradıb.

Həyatı boyu həmişə xalqının yanında olmuş, xalqa arxalanmış əbədiyaşar lider deyirdi: “Mənim həyat amalım bütün varlığım qədər sevdiyim Azərbaycan xalqına, dövlətçiliyimizə, ölkəmizin iqtisadi-siyasi və mənəvi inkişafına xidmət olub. Bu yolda bütün gücümü, iradəmi yalnız müdrik və qədirbilən xalqımdan almışam. Ən çətin anlarda, ən mürəkkəb vəziyyətlərdə yalnız və yalnız xalqıma arxalanmışam. Bu da mənə dözüm, iradə verib və bütün uğurlarımızı təmin edib”.

Müstəqillik tariximiz sübut etdi ki, Heydər Əliyev xalqa arxalandığı kimi, xalq da öz taleyini Heydər Əliyevə etibar edir, ona arxalanır. Müstəqilliyimizin ən ağır günlərində xalqının köməyinə gələn Heydər Əliyev onu yenidən itirmək təhlükəsindən azad etməklə bu inamı öz xilaskarlıq missiyası ilə layiqincə doğrultdu. Heydər Əliyevi xarakterizə edən özünəməxsus cəhətlərdən biri onun böyük strateq, islahatçı olması idi. Ulu Öndərin 1993-cü ildə hakimiyyətə qayıtması ilə ölkəmizdə köklü, mütərəqqi islahatların təməli qoyulmuş, müasir demokratik, hüquqi və dünyəvi dövlət quruculuğu prosesinə başlanılıb.

Ümummilli Liderin rəhbərlik etdiyi 1993-2003-cü illərdə Azərbaycanın böyük və mütərəqqi inkişaf yolunun möhkəm əsasları qoyulub. “Əsrin müqaviləsi”nin imzalanması ilə neft strategiyasının reallaşdırılması, ordu quruculuğu, müstəqil Azərbaycanın ilk milli Konstitusiyasının qəbul edilməsi, demokratik hüquqi təsisatlarının yaradılması, ölkəmizin dünya birliyində layiqli yer tutması Ulu Öndərin unudulmaz xidmətlərindəndir. Heydər Əliyev həm də demokratik hüquqi dövlət quruculuğu, qanunun aliliyinin, insan hüquq və azadlıqlarının qorunması, vətəndaş cəmiyyətinin inkişafı, məhkəmə-hüquq sahəsində aparılan uğurlu islahatların müəllifidir. Bu gün aparılan ardıcıl və mütərəqqi məhkəmə-hüquq islahatlarında Ulu Öndərin irsini, siyasi kursunu və yol xəritəsini aşkar müşahidə edirik.

Ulu Öndərin müəllifi olduğu ilk milli Konstitusiyamızda məhkəmə hakimiyyətinə ayrıca bir fəslin həsr olunaraq orada məhkəmə-hüquq sistemi üçün əhəmiyyətli olan konstitusion müddəalar təsbit olunub. Eyni zamanda, Əsas Qanuna uyğun olaraq hakimlərin statusu, məhkəmə quruluşu və məhkəmə islahatı ilə əlaqədar qanunvericiliyin formalaşdırılması ilə bağlı tədbirlər görülərək 1997-ci ildə dahi öndərin təşəbbüsü ilə “Məhkəmələr və hakimlər haqqında” tam yeni Qanun qəbul edilib. Bir il sonra isə, Prezident yanında Məhkəmə-Hüquq Şurasının yaradılması məhkəmə hakimiyyətinin nüfuzlu və müstəqil təsisat kimi təşəkkülünə, habelə hazırlıqlı və peşəkar hakim korpusunun formalaşdırılmasına xidmət edib. Sonradan məhkəmə hakimiyyətinin müstəqil özünüidarə orqanı kimi yenidən təsis olunan Məhkəmə-Hüquq Şurası bu gün məhkəmə fəaliyyəti ilə bütün məsələlərin həllində əhəmiyyətli rol oynayır.

Beləliklə, 2000-ci ildə keçmiş sovet dövründən miras qalmış məhkəmə sistemi ləğv edilərək Ulu Öndərin dühası ilə yeni, üçpilləli müstəqil məhkəmə hakimiyyəti bərqərar edilib, dövlətçilik tariximizdə ilk dəfə olaraq şəffaf prosedurlar əsasında keçirilmiş hakim seçki nəticəsində əvvəlki hakim korpusu 60 faiz yenilənmiş və ölkədə yeni məhkəmə sistemi fəaliyyətə başlayıb.

Milli dövlətçiliyimizin banisi Heydər Əliyev həm də dünya azərbaycanlılarının həmrəyliyinin möhkəmləndirilməsində tarixi xidmətlər göstərib. Ümummilli Liderin 2001-ci ildə Dünya Azərbaycanlılarının Birinci Qurultayında nitqində sidq ürəklə söylədiyi “Hər bir insan üçün onun milli mənsubiyyəti onun qürur mənbəyidir. Mən həmişə fəxr etmişəm, bu gün də fəxr edirəm ki, mən azərbaycanlıyam” sözləri bu gün də Ulu Öndərin səsində eşidilərkən ürəkləri riqqətə gətirir, hər kəsi ruhlandırır.

Prezident İlham Əliyevin “Heydər Əliyev İli” elan olunması ilə bağlı Sərəncamında qeyd olunduğu kimi, dövlətçilik salnaməmizdə silinməz izlər qoyub, azərbaycanlı olması ilə ömür boyu fəxr edib, milli qürur və iftixar mənbəyimiz olan Heydər Əliyev bütün dünyada Azərbaycanın rəmzi kimi qəbul edilir. Hazırda Heydər Əliyev cismən həyatda olmasa da, qədirbilən xalqımızın qəlbində əbədiyaşarlıq qazanıb və onun zəngin irsi, yüksək amalları və ideyaları daim yaşayır və inkişaf edir. Heydər Əliyev siyasətinin uğurla və layiqincə davam etdirilməsi Azərbaycan dövlətinin tərəqqisi üçün ən böyük təminatdır. Prezident İlham Əliyev Ümummilli Liderin dövlət inkişafı kursunu uğurla həyata keçirərək müstəqil Azərbaycanımızı dünyada qabaqcıl dövlətlər sırasına çıxarıb, ölkəmiz regionun lider dövlətinə çevrilib, beynəlxalq aləmdə nüfuzu və qüdrəti xeyli artıb.

Heydər Əliyev ideyalarının yaşadılması və təbliğində mühüm rol oynayan əbədiyaşar liderin adını daşıyan Heydər Əliyev Fondunun xidmətləri də göz önündədir. Gənc nəslin sağlam ruhda tərbiyə olunmasında, milli-mənəvi dəyərlərimizin yaşadılması və dünyada tanıdılmasında, bütövlükdə ölkənin sosial-iqtisadi tərəqqisinə dəstək verməsində mühüm fəaliyyəti, xeyriyyəçilik, humanizm, insansevərlik və bu kimi nəcib əməlləri ilə ölkədə və onun hüdudlarından kənarda böyük rəğbət qazanmış, respublikamızın Birinci vitse-prezidenti Mehriban xanım Əliyevanın rəhbəri olduğu Fond Ulu Öndər Heydər Əliyevin adını şərəflə daşıyır.

Dahi rəhbərin tükənməz irsi, parlaq ideyaları ölkəmizi inamla, əzmlə irəli aparır. Xalqımız Ulu Öndərin siyasi varisi, Prezident, Müzəffər Ali Baş Komandan İlham Əliyevə inanır və onu dəstəkləyir. Bu inam və dəstəyin, həmrəyliyin ən bariz nümunəsi Ümummilli Liderin ən ümdə vəsiyyətinin və xalqımızın arzusunun reallığa çevrildiyi 44 günlük Vətən müharibəsində qazanılmış böyük Qələbə, doğma Qarabağımızda və Şərqi Zəngəzurda aparılan möhtəşəm bərpa və quruculuq işləridir. Heç şübhəsiz ki, bu və digər nailiyyətlərin əsasında Heydər Əliyevin milli dövlətçilik konsepsiyası və bu konsepsiyanı uğurla həyata keçirən, ölkəmizin milli maraqlarını qətiyyətlə müdafiə edən Prezident İlham Əliyevin uzaqgörən və müstəqil siyasəti, yorulmaz fəaliyyəti dayanır.

Xalqımız 100 illiyini böyük təntənə ilə qeyd etdiyimiz Heydər Əliyevin siyasəti, onun yüksək ideyaları ətrafında daim sıx birləşərək Prezident İlham Əliyevin rəhbərliyi ilə Ulu Öndərin indiki və gələcək nəsillərə əmanəti olan müstəqil Azərbaycan dövlətinin daha da inkişaf edəcəyinə qəti əmindir.