Valeri Çeçelaşvili: Avropanın aparıcı dövlətləri Azərbaycanla əməkdaşlıqda maraqlıdır
Tbilisi, 25 iyul, AZƏRTAC
Azərbaycan Prezidenti İlham Əliyev beynəlxalq tərəfdaşlarla, o cümlədən Avropa İttifaqı ilə münasibətləri ardıcıl şəkildə möhkəmləndirmək siyasətini davam etdirir. Avropanın əsas aparıcı dövlətlərinin də Azərbaycan ilə əməkdaşlığa xüsusi əhəmiyyət verməsi rəsmi Bakının dünyada etibarlı tərəfdaş kimi artan nüfuzuna dəlalət edir. Prezident İlham Əliyevin Almaniyaya səfəri və bu səfər zamanı Azərbaycan ilə Almaniya arasında strateji tərəfdaşlığın gündəliyinə dair birgə bəyannamənin imzalanması bunun əyani sübutudur.
Bu sözləri AZƏRTAC-a müsahibəsində Gürcüstan Strateji Araşdırmalar Mərkəzinin rəhbəri, politoloq, siyasi şərhçi Valeri Çeçalaşvili deyib.
Onun sözlərinə görə, imzalanan "İkitərəfli tərəfdaşlığın Strateji Gündəliyinə dair Birgə Bəyannamə" son dərəcə mühüm sənəddir: “Bu sənəd təkcə Azərbaycanın Avropa İttifaqı məkanında mövqeyini daha da gücləndirdiyini göstərmir. Əminliklə deyə bilərəm ki, bu əməkdaşlıq, eyni zamanda Almaniyanın Cənubi Qafqazdakı təsirinin və iştirakının güclənməsinə xidmət edəcək. Bu baxımdan, səfərin əhəmiyyətini qiymətləndirməmək olmaz”.
Analitik hesab edir ki, Cənubi Qafqazda Almaniya kimi dövlətlərin rolunun daha da artması region üçün də yeni imkanların və perspektivlərin açılmasına xidmət edir: “Məhz buna görə də mən bu səfəri təkcə Azərbaycan–Almaniya münasibətləri üçün deyil, bütövlükdə Cənubi Qafqaz regionu üçün də son dərəcə mühüm hadisə hesab edirəm”.
Politoloq deyib: “Artıq Avropa İttifaqına üzv olan 10-dan çox ölkə Azərbaycandan təbii qaz alır. Gələcəkdə bu tədarükün ildə 30–35 milyard kubmetrə çatdırılması planlaşdırılır. Bu isə Avropa İttifaqının enerji təhlükəsizliyinin şaxələndirilməsinə ciddi töhfə verən çox mühüm göstəricidir. Digər tərəfdən, bu proses Azərbaycanın Avropa İttifaqı, xüsusilə də Almaniya üçün əsas strateji tərəfdaşlardan biri kimi əhəmiyyətini daha da artırır. Almaniya isə olduqca mühüm tərəfdaşdır. Təxminən 5 trilyon ABŞ dollarından artıq ÜDM-ə malikdir və Fransa ilə birlikdə Avropa İttifaqının aparıcı dövlətlərindən hesab olunur. Bu baxımdan, yenə də deyirəm ki, Azərbaycan-Almaniya əməkdaşlığı Almaniyanın Cənubi Qafqazdakı təsirinin və iştirakının güclənməsinə xidmət edəcək. Bu, həm də ona görə vacibdir ki, Cənubi Qafqaz Avropa bazarlarını, o cümlədən Almaniyanı Mərkəzi Asiya və Uzaq Şərqin getdikcə daha perspektivli bazarları ilə birləşdirən əsas nəqliyyat-kommunikasiya dəhlizidir. Hazırkı şəraitdə Rusiya beynəlxalq təcrid vəziyyətindədir, ətrafımızda müharibələr davam edir, İranda da gərginlik mövcuddur. Buna görə də Cənubi Qafqaz Avropa bazarları ilə Mərkəzi Asiya bazarları arasında ən etibarlı nəqliyyat və kommunikasiya bağlantısına çevrilir. Bu baxımdan da Avropa İttifaqının ən böyük dövlətlərindən biri olan Almaniya ilə Cənubi Qafqazın ən güclü iqtisadiyyatına malik ölkəsi olan Azərbaycan arasında strateji tərəfdaşlığın qurulması xüsusi əhəmiyyət daşıyır”.
Bölmənin digər xəbərləri
