Xocalı faciəsi qurbanlarının xatirəsi Soyqırımı Muzeyində anılıb
Bakı, 22 fevral, AZƏRTAC
Əsgəran rayonunun Meşəli kəndindən olan və bütün üzvləri qətlə yetirilən Novruzovlar ailəsinin paltarları, 12 yaşlı məktəbli Qərib Rzayevin yanmış çantası, bədəninə 17 güllə vurulmuş 5 yaşlı qızın tükürpərdən fotosu… Respublika Hərbi Prokurorluğunun binasında yaradılmış Memorial Soyqırımı Muzeyində Xocalı faciəsinin 25-ci ildönümünə həsr olunan elmi-praktik konfransdan əvvəl iştirakçılar salonlarda nümayiş olunan həmin eksponatlara və azərbaycanlıların soyqırımlarını əks etdirən digər sənəd, fotoşəkil və videoslaydlara ürəkağrısı ilə baxıblar.
AZƏRTAC xəbər verir ki, fevralın 22-də keçirilən konfransda çıxış edən Azərbaycan Respublikası Baş Prokurorunun müavini-hərbi prokuror, ədliyyə general-leytenantı Xanlar Vəliyev erməni millətçilərinin etnik təmizləmə və soyqırımı siyasətinin acı nəticələrindən danışıb. Qanlı fevral gecəsində baş verənlərin düşmənin mənfur əməllərinin davamı olduğunu vurğulayan hərbi prokuror deyib: “On ildən çoxdur ki, Xocalı hadisələrinin istintaqı bizim icraatımızdadır. Bu məqsədlə xüsusi istintaq şöbəsi yaradılıb. İstintaq zamanı çox dəhşətli işgəncə faktları ortaya çıxıb”.
X.Vəliyevin verdiyi məlumata görə, Ermənistanın Dağlıq Qarabağı və ətraf rayonları işğal etməsi nəticəsində Azərbaycana dəymiş maddi ziyanla bağlı beynəlxalq ekspertlərin iştirakı ilə hərtərəfli qiymətləndirmə işləri aparılır. Erməni işğalı nəticəsində Azərbaycana dəymiş ziyan artıq milyard yox, bəlkə də trilyon dollarla ölçülür.
Elmi-praktik konfransda Milli Qeyri-Hökumət Təşkilatları Forumunun prezidenti Rauf Zeyni, Hərbi Prokurorluğun xüsusi istintaq şöbəsinin mühüm işlər üzrə böyük müstəntiqi, ədliyyə müşaviri Ülvi Əhmədov, tarix elmləri doktoru Nüşabə Məmmədova, “Qarabağ Müharibəsi, Əlilləri, Veteranları və Şəhid Ailələri” İctimai Birliyinin sədri Mehdi Mehdiyev və başqaları çıxış ediblər. Çıxışlarda xalqımıza qarşı yönələn etnik təmizləmə və deportasiya siyasəti pislənilib, əsrlərdən bəri davam edən erməni millətçiliyinin iç üzünü açan faktlar səsləndirilib, müasirlərimizin və yetişməkdə olan gənc nəslin həmin hadisələri unutmaması üçün təkliflər irəli sürülüb.
Konfransın sonunda Hərbi Prokurorluq əməkdaşlarının hazırladığı “Əsrin faciəsi” adlı rəqəmsal videodisk nümayiş olunub və tədbir iştirakçılarına “Soyqırımı Muzeyi” kitabı paylanılıb.
Tədbirdən sonra jurnalistlərin suallarını cavablandıran hərbi prokuror deyib ki, BMT başda olmaqla, əksər beynəlxalq təşkilatlar Dağlıq Qarabağı Azərbaycanın ərazisi kimi tanıyır. Onun Azərbaycana məxsusluğu inkarolunmaz faktdır. Dağlıq Qarabağı nəinki dünya dövlətləri, heç Ermənistanın özü də tanımayıb. Ona görə də orada Azərbaycan qanunvericiliyinə zidd olaraq, seçki və referendum keçirilməsi tam qanunsuzdur.
Bölmənin digər xəbərləri
