QAN YADDAŞI
XOCALI FACİƏSİNİN İLDÖNÜMÜ ALMANİYADA GENİŞ MİQYASDA QEYD EDİLMİŞDİR
Berlin, 3 mart (AZƏRTAC). Xocalı qətliamının 18-ci ildönümü Almaniyada geniş miqyasda qeyd olunmuşdur.
Azərbaycanın Almaniyadakı səfirliyi Berlin şəhərində Xocalı qətliamının 18-ci ildönümü münasibətilə xatirə gecəsi keçirmişdir. “Dəyirmi masa” formasında təşkil olunmuş xatirə gecəsində Almaniya ictimaiyyətini təmsil edən tanınmış siyasətçilər, elm, mədəniyyət xadimləri, eləcə də Azərbaycan diasporunun təmsilçiləri iştirak etmişlər.
Xocalı faciəsindən bəhs edən sənədli film nümayiş olunmuş, soyqırımı ərəfəsində Azərbaycan və Cənubi Qafqazdakı siyasi vəziyyət xatırlanmış, bu hadisənin törədilməsinin insan hüquqlarının pozulmasının müqayisəedilməz nümunəsi olduğu və belə halların bir daha təkrarlanmamasının zəruriliyi xüsusi vurğulanmışdır. Tədbir iştirakçıları faciənin dəhşətli nəticələrinin dünya ictimaiyyətinə çatdırılması yolları ilə bağlı fikirlərini səsləndirmişlər.
Ölkəmizin Almaniyadakı səfirliyinin dəstəyi və Almaniyadakı Azərbaycanlıları Əlaqələndirmə Mərkəzi (AAKM) və Atatürkçü Düşüncə Dərnəyinin (ADD) birgə təşkilatçılığı ilə Berlində daha bir tədbir keçirilmişdir. “Xocalı qətliamının 18-ci ildönümündə Qafqazda sülhün əldə olunmasında Türkiyə-Azərbaycan əlaqələrinin önəmi və rolu” adlı tədbiri Azərbaycanın Almaniyadakı səfiri P.Şahbazov açmışdır. Xocalı faciəsinin 18-ci ildönümündə faciəni bir daha xatırlamağın ağır olduğunu bildirən səfir bu hadisənin XX əsrdə insanlıq əleyhinə baş vermiş ən ağır cinayətlərin sırasında yer aldığını bildirmişdir. O, indiyədək beynəlxalq ictimaiyyət tərəfindən faciəyə yetərincə diqqət yetirilmədiyini qeyd edərək, onun beynəlxalq səviyyədə layiqincə dəyərləndirilməsinin vacibliyini vurğulamışdır. Səfir bu sahədə Heydər Əliyev Fondunun fəaliyyətinin və xüsusilə də “Xocalıya ədalət” beynəlxalq kompaniyasının yaxın gələcəkdə mühüm nəticələr əldə edəcəyinə inandığını dilə gətirmişdir.
Daha sonra çıxış edən Türkiyənin Almaniyadakı səfiri Əhməd Acet Xocalı faciəsinin türk xalqını da dərindən sarsıtdığını, soyqırımı günahkarlarının hələ də cəzalandırılmamasının böyük ədalətsizlik olduğunu bildirmişdir.
Milli Məclisin deputatı Qənirə Paşayeva Xocalı faciəsinin dünya səviyyəsində tanınmasının əhəmiyyətindən və bu istiqamətdə türk və Azərbaycan diasporunun həyata keçirməli olduğu fəaliyyətdən, eyni zamanda, Türkiyə-Ermənistan yaxınlaşması və bunun Dağlıq Qarabağ münaqişəsinin həllinə təsirindən danışmışdır.
Tədbirdə digər çıxış edənlər - Türkiyə-Azərbaycan münasibətləri üzrə mütəxəssis Fariz Fərzəli, eləcə də Almaniya Bundestaqının sabiq deputatı Hakkı Keskin Xocalı qətliamı barəsində ətraflı söhbət açaraq, faciənin dünya ictimaiyyətinə çatdırılması ilə bağlı fikirlərini bölüşmüşlər.
Azərbaycanın Almaniyadakı səfirliyi Xocalı faciəsinə dair mətbuat bəyanatı ilə çıxış etmiş və bəyanat bu ölkənin rəsmi dairələrinə, o cümlədən Almaniya Bundestaqı, Kansler Aparatı, Xarici İşlər Nazirliyinə, eləcə də burada fəaliyyət göstərən beynəlxalq və qeyri-hökumət təşkilatlarına göndərilmişdir. Bununla yanaşı, AAKM tərəfindən Almaniya dövlət və qeyri-dövlət qurumlarına, Azərbaycanın diaspor təşkilatlarına, Almaniyadakı türk icmalarına, yerli KİV-lərə Xocalı faciəsi bərədə müraciətlər ünvanlanmışdır.
Azərbaycanın Almaniyadakı səfirliyinin yaxından dəstəyi ilə Kasseldə Alman-Azərbaycan Tələbə Gənclər Təşkilatında Xocalı faciəsi ilə bağlı konfransın, habelə Berlindəki Azərbaycan Evi və Alman-Azərbaycan Həmrəylik Cəmiyyətində, Kölndə Alman-Azərbaycan Kültür Cəmiyyətində, Hamburqda Hamburq Alman-Azərbaycan və Azərbaycan Mədəniyyət cəmiyyətlərində, Ştutqartda Azərbaycan Kültür Cəmiyyətində, Drezdendə ALM.AZ Cəmiyyətində, Hannoverdə Xəzər Cəmiyyətində, Leypsiq Tələbələr Birliyində Xocalı faciəsi ilə bağlı anım tədbirləri keçirilmişdir.
Vüqar Seyidov
AZƏRTAC-ın xüsusi müxbiri
Berlin