Yeni Azərbaycan Partiyası Səbail rayon təşkilatının idarə heyətinin iclası keçirilib
Bakı, 3 noyabr, AZƏRTAC
Noyabrın 3-də Yeni Azərbaycan Partiyası (YAP) Səbail rayon təşkilatının idarə heyətinin iclası keçirilib.
AZƏRTAC xəbər verir ki, YAP Səbail rayon təşkilatının sədri, Milli Məclisin deputatı Şəmsəddin Hacıyev iclasda çıxış edərək Azərbaycan Respublikasının Prezidenti İlham Əliyevin uğurla həyata keçirdiyi uzaqgörən və qətiyyətli siyasət nəticəsində ölkəmizin əldə etdiyi nailiyyətlərdən danışıb. Ş.Hacıyev bu baxımdan “Yeni əsrin layihəsi” adlandırılan “Azəri”, “Çıraq” və “Günəşli” yataqları üzrə yeni Sazişin imzalanmasının və Bakı-Tbilisi Qars dəmir yolunun açılışının önəmini xüsusi vurğulayıb. Bildirib ki, Azərbaycanın bilavasitə təşəbbüsü ilə reallaşdırılan qlobal miqyaslı hər iki layihə ölkəmizin beynəlxalq aləmdə nüfuzunun, siyasi və iqtisadi qüdrətinin göstəricisi olmaqla yanaşı, respublikamıza böyük siyasi və iqtisadi dividentlər gətirəcək.
Hazırda respublikamızın, eləcə də regionun əsas siyasi qüvvəsi olan, müasir müstəqil dövlətimizin memarı və qurucusu, ulu öndər Heydər Əliyevin yaratdığı Yeni Azərbaycan Partiyasının təsis olunmasının 25 illik yubileyinin geniş qeyd edildiyini diqqətə çatdıran Ş.Hacıyev YAP Səbail rayon təşkilatının bu münasibətlə ardıcıl tədbirlər reallaşdırdığını, bu istiqamətdə işlərin davam etdirildiyini diqqətə çatdırıb.
Digər çıxışlarda da ulu öndər Heydər Əliyevin müdrik və uzaqgörən siyasətini uğurla davam və inkişaf etdirən Prezident İlham Əliyevin liderliyi ilə Azərbaycanın qazandığı nailiyyətlərdən söhbət açılıb. Bu uğurların əldə olunmasında Yeni Azərbaycan Partiyasının mühüm rolu xüsusi vurğulanıb.
İclasda Azərbaycan Dövlət İnformasiya Agentliyinin - AZƏRTAC-ın “Xəbərlər Ajansı”, İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin “İstehlakçı hüququ müdafiəçiləri”, “Azərenerjitikintiquraşdırma” Açıq Səhmdar Cəmiyyətinin “Enerjitinti mütəxəssisləri” və “Şeyx Şamil 30” ərazi ilk partiya təşkilatlarının hesabatları dinlənilib və səsə qoyularaq təsdiq edilib.
Sonra Azərbaycan Voleybol Federasiyasının yeni təsis olunan “Voleybolçular” ərazi ilk partiya təşkilatının müraciətinə baxılaraq, qeydiyyata alınması barədə qərar qəbul edilib.
Sonda cari məsələlər müzakirə edilib.
Bölmənin digər xəbərləri
