Yeni Azərbaycan Partiyası Şuşa rayon təşkilatının V konfransı keçirilib
Bakı, 12 oktyabr, AZƏRTAC
Şuşa Rayon İcra Hakimiyyətində Yeni Azərbaycan Partiyası rayon təşkilatının V konfransı keçirilib.
Bu barədə AZƏRTAC-a rayon icra hakimiyyətindən məlumat verilib. Tədbirdə Milli Məclisin deputatları Elman Məmmədov, Hadi Rəcəbli, rayonun icra strukturlarının, təhsil, səhiyyə, mədəniyyət müəssisələrinin rəhbərləri, YAP fəalları, gənclər iştirak ediblər.
Əvvəlcə tədbir iştirakçıları ulu öndər Heydər Əliyevin “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin mərkəzi qərargahındakı büstünün önünə gül dəstələri düzüblər.
Azərbaycan Respublikasının dövlət himni səsləndirildikdən sonra YAP-ın yaranmasına həsr olunmuş videoçarx təqdim edilib.
YAP Şuşa rayon təşkilatının sədri Təvəkkül Əliyev çıxış edərək partiyanın 25 il keçdiyi əzmkar yolundan, siyasi meydana çıxmasının mövcud ictimai-siyasi şəraitdən asılı olmasından danışıb, rayon təşkilatının fəaliyyəti haqqında geniş hesabat verib. Bildirib ki, YAP Şuşa rayon təşkilatı rayon üzrə keçirilən bütün ictimai-siyasi tədbirlərdə yaxından iştirak edir. YAP Şuşa rayon təşkilatının Qadınlar Şurası və Gənclər Təşkilatı fəaliyyət göstərir.
Sonra məruzələr ətrafında çıxışlar dinlənilib. Milli Məclisin deputatları Hadi Rəcəbli, Elman Məmmədov, Şuşa Rayon İcra Hakimiyyəti başçısının müavini, YAP Şuşa rayon təşkilatı Qadınlar Şurasının sədri Vüsalə Fətəliyeva, Gənclər Təşkilatının sədri Yapon Hacıyev ölkədə hakim partiyaya çevrilən YAP-ın bu statusu qazandığı ilk gündən proqramında qarşıya qoyduğu vəzifələrin icrasına, ictimai həyatın bütün sahələrində tərəqqiyə nail olmaq məqsədilə yüksək fəallıq nümayiş etdirməsini qeyd ediblər.
Rayon icra hakimiyyətinin başçısı, “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyi İdarə Heyətinin sədri-icma rəhbəri Bayram Səfərov ulu öndər Heydər Əliyevin ölkəyə rəhbərlik etdiyi bütün dövrlərdə həyat və fəaliyyətini Azərbaycanın inkişafına, dünya dövlətləri arasında layiqli yer tutmasına həsr etməsindən, millətin gələcəyinə, təhsilin, səhiyyənin, iqtisadiyyatın, mədəniyyətin hərtərəfli inkişafına həmişə qayğı ilə yanaşmasından, Ermənistan-Azərbaycan, Dağlıq Qarabağ münaqişəsinin həlli istiqamətində göstərdiyi səylərdən, sıralarında yüz minlərlə üzvü birləşdirən YAP-ın əsl ümumxalq partiyasına çevrilməsindən bəhs edib. Bayram Səfərov Prezident İlham Əliyevin Ulu Öndərin siyasi kursunu uğurla davam etdirməsini, bu gün ölkəmizin sosial-iqtisadi qüdrətinin gündən-günə artmasını, beynəlxalq tədbirlərə ev sahibliyi etməsini diqqətə çatdırıb. Vurğulayıb ki, dövlətimizin başçısının BMT-nin Baş Assambleyasının 72-ci sessiyasının açılışında Ermənistan rəhbərliyinin çirkin əməllərini faktlarla ifşa edən tarixi çıxışı hər birimizdə böyük qürur hissi yaradır.
Daha sonra Konfransın Qətnaməsi səsə qoyularaq qəbul edilib.
Konfrans təşkilati məsələlərlə bağlı davam edib. Təvəkkül Əliyev yenidən YAP Şuşa rayon təşkilatının sədri seçilib. Rayon təşkilatının sədrinin 2 müavini, Şura üzvləri, Nəzarət Təftiş Komissiyasının üzvləri seçilib.
Yeni Azərbaycan Partiyasının sıralarına qəbul olunmuş bir qrup gəncə partiyanın vəsiqələri təqdim edilib.
Sonda YAP Şuşa rayon təşkilatının sədri Təvəkkül Əliyev rayon icra hakimiyyətinin başçısı Bayram Səfərova təşkilatın işində yaxından kömək göstərdiyinə görə Partiyanın fəxri fərmanını təqdim edib.
Konfrans iştirakçıları adından Azərbaycan Respublikasının Prezidenti İlham Əliyevə müraciət ünvanlanıb.
Bölmənin digər xəbərləri
