Aprel döyüşlərinin qazisi: Azərbaycan xalqı Ümummilli Liderin tarixi xidmətlərini unutmur
Bakı, 8 aprel, AZƏRTAC
Ulu Öndər Heydər Əliyev müasir Azərbaycan dövlətinin qurucusu və yaradıcısıdır. Xalqımız hər zaman Ümummilli Liderimizin əziz xatirəsini ehtiramla anır və bu hər bir azərbaycanlının mənəvi borcudur. Müasir Azərbaycan dövlətinin memarı olan Heydər Əliyev hər zaman veteranlarımıza, şəhid ailələrinə yüksək diqqət və qayğı göstərib. Dahi rəhbərin əsasını qoyduğu bu siyasət hazırda Prezident İlham Əliyevin rəhbərliyi ilə uğurla davam etdirilir. Bu yaxınlarda Ulu Öndərin 100 illiyinə həsr olunmuş və qazilərin iştirak etdiyi “Heydər Əliyev və Azərbaycanda veteran hərəkatı” mövzusunda konfrans göstərir ki, veteranlarımız bu münasibəti yüksək qiymətləndirir, göstərilən qayğı və diqqəti minnətdarlıqla xatırlayırlar.
Ümumiyyətlə, Azərbaycan veteranlar hərəkatının formalaşması Ulu Öndərin adı ilə bağlıdır. Ümummilli Lider hesab edirdi ki, zəngin və şərəfli həyat yolu keçən veteranlar yeniyetmə və gənclər üçün nümunə olmalıdırlar. Tarixin bütün mərhələlərində qəhrəman babalarımız Vətənimiz uğrunda döyüşərək onu yadelli işğalçılardan qoruyub. Biz Azərbaycan gəncliyi də qocaman və qəhrəman veteranların övladları və onların şərəfli döyüş yolunun davamçılarıyıq. Azərbaycan xalqı, veteranlar da öz qayğıkeş liderlərinin tarixi xidmətini unutmur, Ümummilli Lideri hər zaman sevgi və ehtiram hissi ilə yad edirlər.
Bunu AZƏRTAC-a açıqlamasında “Böyük Qayıdış” Gənclər Təşkilatının idarə heyətinin üzvü, Aprel döyüşlərinin qazisi, Xüsusi Təyinatlı Qüvvələrin ehtiyatda olan baş leytenantı Əhliyət Mehdiyev söyləyib.
O bildirib ki, dövlətimizin başçısı və Birinci vitse-prezident Mehriban Əliyeva hər zaman veteranlara, qazilərə diqqət və qayğı göstərir. Dövlətin veteran və şəhid ailələrinə qayğısının və diqqətinin növbəti təzahürü olaraq şəhid ailələrinə verilən aylıq təqaüdlərin hər il artırılması, qazilərə əlillik və sosial ödənişlərin təyin olunması ilə bağlı imzalanan sərəncamlar “Heydər Əliyev İli”ndə məlum kateqoriyadan olan vətəndaşlarımız üçün töhfə oldu. Bu fakt sübut edir ki, dövlətimiz onun müdafiəsində xidməti olan insanların fədakarlığını, xidmətlərini heç vaxt unutmur və daim həmin şəxsləri diqqət mərkəzində saxlayır.
2020-ci ilin Vətən müharibəsində Müzəffər Ali Baş Komandan İlham Əliyevin rəhbərliyi ilə Azərbaycan Ordusu və xalqımızın rəşadətli oğulları 44 gün ərzində böyük qəhrəmanlıq nümunələri göstərib: “Qəhrəman şəhidlərimizin canı, qanı bahasına biz cənnət Qarabağımızı düşmən işğalından azad etdik. Hazırda dövlətimiz Qarabağda böyük quruculuq işləri həyata keçirir. Biz artıq keçmiş məcburi köçkün vətəndaşlarımızın ata-baba torpaqlarına qayıtmaları üçün görülən işlərin şahidi oluruq. Elə bir neçə gün bundan əvvəl məcburi köçkün vətəndaşlarımız Talış kəndinə öz doğma yurd-yuvalarına geri qayıtdılar, orada həyat yenidən bərqərar oldu”.
Qeyd edilib ki, 2016-cı ilin Aprel döyüşlərində Lələtəpə yüksəkliyinin və Talış kəndinin işğaldan azad olunması 44 günlük Qələbəmizin bələdçisi, Zəfər gedən yolda xalqımız üçün bir ümid günəşi oldu. Cəbrayıl rayonunun Cocuq-Mərcanlı kəndinin yenidən bərpası vətəndaşlarımızın işğaldan azad edilmiş torpaqlara, Qarabağa geri qayıtması Böyük Qayıdışın başlanğıcı idi. Böyük Qayıdış bizim üçün vacibdir. Çünki torpaqlarımızı azad etməklə biz həm də milli qürurumuzu bərpa etdik.
“Mən qürur hiss keçirirəm ki, hazırda “Böyük Qayıdış” Gənclər Təşkilatının İdarə heyətinin üzvüyəm. Təşkilat olaraq, qəhrəman şəhidlərimizin əziz xatirəsini daim yad edir, qazilərimizin Vətən uğrunda apardıqları mübarizəsini, şücaətlərini gənclərimizə təbliğ edirik. Onların milli-mənəvi dəyərlərə sadiq, vətənpərvərlik ruhunda yetişdirilməsinə səy göstəririk. Həmçinin şəhidlərimizin, qazilərimizin ailə üzvlərinə və veteranlarımıza Azərbaycan gənclərinin dəstəyini nümayiş etdirməyə çalışırıq. Xalqımız qazilərimizi, böyük Qələbəmizin memarı olan şəhidlərimizi və qazandığımız Zəfəri heç vaxt unutmayacaq”, - deyə Aprel döyüşlərinin qazisi vurğulayıb.
Bölmənin digər xəbərləri
