Azərbaycan şahmatçıları Abu-Dabidə şahmat festivalının mükafatçıları olublar
Bakı, 24 avqust, AZƏRTAC
Abu-Dabidə başa çatan “24rd Abu Dhabi Int. Chess Festival Open Tournament” şahmat festivalının qalibləri müəyyən olunub.
AZƏRTAC xəbər verir ki, festivalda Azərbaycan nümayəndələri də iştirak ediblər.
Festivalın əsas turniri - “Masters” turniri 33 ölkədən 124 iştirakçını, o cümlədən FIDE adlarının sahibi olan 88 nəfəri şahmat taxtası arxasında bir araya gətirib. Turnirdə Misir şahmatçısı Amin Bassem qalib gəlib. O, 9 mümkün xaldan 7,5 xal toplayıb. Azərbaycan qrossmeysteri Rauf Məmmədov 6,5 xalla 3-9-cu yerləri bölüşüb.
“Open” turnirdə 34 ölkədən 211 şahmatçı, o cümlədən FIDE adlarının sahibi olan 19 nəfər iştirak edib. Yuniorlar arasında keçirilən sayca 24-cü turnirdə 9 mümkün xaldan 8 xal toplayan Azərbaycan şahmatçısı Elşad Abdullayev fəxri kürsünün ən yüksək pilləsinə qalxıb. Bu yarışda üçüncü yeri Azərbaycanın daha bir nümayəndəsi Xəzər Babazadə tutub.
Xəzər Babazadə 18 ölkədən 146 şahmatçının (onlardan 8-i FIDE adlarının sahibidir) iştirakı ilə keçirilən “Juniors” turnirinin də qalibi olub. O, 9 mümkün xaldan 8 xal toplayıb.
Qulam Manafov və onun oğlu Vüqar Manafov isə “24rd Abu Dhabi Int. Chess Festival Open Tournament” şahmat festivalının ailə turnirində bürünc medal qazanıblar.
İsveçrə sistemi üzrə 9 turda keçirilən turnirdə vaxta nəzarət 90 dəqiqə + hər gediş üçün əlavə 30 saniyə olub.
Bölmənin digər xəbərləri
