Bir qərinəyə sığan qəhrəmanlıq dastanı - şəhid kapitan Xəlfəli Sultanovun ömür yolu
Hacıqabul, 20 sentyabr, Aydın Yavərzadə, AZƏRTAC
Bir qərinəyə sığan şərəfli ömür yolu. Həyat bir nəfəs qədər qısa olsa da, qəhrəmanlıq əsrlər boyu yaşayır. Kapitan Xəlfəli Sultanovun da qəhrəmanlıq dolu xatirəsi digər şəhidlərimizin xatirəsi kimi əbədi olaraq yaşayacaq.
AZƏRTAC-ın bölgə müxbiri xəbər verir ki, döyüş yolu Aprel zəfərindən başlayan Xəlfəli həm də 44 günlük Zəfər yürüşündə şücaəti ilə seçilib. 2023-cü il sentyabrın 19-20-də isə Qarabağda erməni separatçılarına qarşı keçirilən lokal xarakterli antiterror tədbirləri zamanı Xəlfəli qərhəmancasına şəhidlik zirvəsinə ucalıb.
Xəlfəlinin həyat yolu elə uşaqlıqdan döyüş ruhu ilə yoğrulmuşdu. 1990-cı il iyunun 18-də dünyaya gələn Xəlfəli böyüdükcə Vətənə bağlılığı ilə seçilirdi. Şəhid atası Böyükağa Soltanov indi oğlunun şərəfli ömür yolu haqqında qürurla danışır.
“Doğma kənd məktəbini bitirdikdən sonra ali təhsil yolunu hərb sahəsində görən Xəlfəli Sultanov “Mən zabit olacağam!” deyirmiş. Elə də oldu, 2007-ci ildə Heydər Əliyev adına Ali Hərbi Məktəbə daxil oldu, 2011-ci ildə isə artıq zabit kimi Milli Ordunun sıralarında xidmətə başladı. Onun ilk xidmət illəri Bakıdakı “N” saylı hərbi hissədə keçdi. Topçu kimi peşəkarlığı, intizamı və Vətən sevgisi ilə seçilən gənc zabit oldu. “Azərbaycan Silahı Qüvvələrinin 95 illiyi (1918-2013)” yubiley medalı ilə təltif olunanda sevincinin həddi-hüdudu yox idi. O hərb sirlərinə peşəkarcasına yiyələnmişdi”, - deyə şəhid atası bildirir.
Xəlfəli Sultanov 2016-cı ilin Aprel döyüşlərində düşmən qarşısında mərdliyini göstərərək, Murovdağda, Lələtəpədə, Daşkəsən istiqamətlərində vuruşaraq igidliyini təsdiqləyən hərbçilərdən biri olub. O, sonrakı illərdə Goranboy və Gəncədə xidmətini davam etdirib. Xidməti illərində "Azərbaycan Ordusunun 100 İliyi (1918-2018)" yubiley medalı ilə təltif olunub.
Şəhid qardaşı Azad Soltanov deyir ki, Xəlfəli 2020-ci ilin Vətən müharibəsində də ön cəbhədə idi: “Xəlfəli Vətənə, Bayrağa çox bağlı idi. Ən böyük arzusu torpaqlarımızın azadlığı idi. Onun döyüş yolu Kəlbəcər istiqamətindən başladı. 44 günlük Zəfər Yürüşünün iştirakçısı olaraq şücaəti ilə seçildi. 8 Noyabr Zəfər günündə ən böyük sevincini yaşayırdı, çünki ən böyük arzusu gerçəkləşmişdi. Qələbədə payı olduğu üçün çox qürurlu idi. Döyüşlərdə göstərdiyi şücaətə görə, "Kəlbəcərin azad olunması" medalı ilə təltif edildi. Həmçinin xidmətlərinə görə Xəlfəlinin fədakarlığı nəzərə alınaraq kapitan rütbəsinə layiq görüldü. 2023-cü il sentyabrın 19-da, Silahlı Qüvvələrimizin keçirdiyi antiterror tədbirləri zamanı Xəlfəli də döyüşə atılanlar sırasında yer alıb, Şuşa yaxınlığında – Xocalının Çanaqçı kəndi ətrafında gedən döyüşlərdə kapitan Xəlfəli Sultanov son nəfəsinədək vuruşaraq qəhrəmancasına şəhid oldu”.
Qeyd edək ki, Azərbaycan Respublikasının ərazi bütövlüyünün təmin olunmasında yüksək peşəkarlıq, şücaət və mərdlik göstərmiş, öz xidməti vəzifələrini və hərbi hissə qarşısında qoyulmuş tapşırıqları yerinə yetirərkən fərqlənmiş Azərbaycan Respublikası Silahlı Qüvvələrinin hərbi qulluqçusu kapitan Xəlfəli Sultanov Azərbaycan Respublikasının Prezidenti İlham Əliyevin Sərəncamına əsasən "Vətən uğrunda" medalı və 3-cü dərəcəli "Vətənə xidmətə görə” ordeni ilə təltif edilib.
Bölmənin digər xəbərləri
