Əmək və əhalinin sosial müdafiəsi naziri Əli Nağıyev çıxış edərək, bu tədbirin Böyük Vətən müharibəsi veteranlarına təməli ümummilli liderimiz Heydər Əliyev tərəfindən qoyulmuş qayğı ənənəsinin davamı olduğunu bildirdi. Belə ki, 1991-1993-cü illərdə o vaxtkı hakimiyyət digər təbəqələrdən olan vətəndaşlar kimi, Böyük Vətən müharibəsi veteranlarını da hər cür imtiyazlardan məhrum etmişdi. Nazir, hakimiyyətə qayıtdıqdan sonra Prezident Heydər Əliyevin, ilk növbədə, əhalinin sosial rifahı ilə maraqlandığını, o cümlədən Qarabağ və Böyük Vətən müharibələri veteranlarına və əlillərinə xüsusi diqqət yetirdiyini, bu qayğının imzaladığı müvafiq fərman və sərəncamlarla həyata keçirdiyini qeyd etdi. Bütün bunların ümummilli liderimiz Heydər Əliyevin Vətən uğrunda öz sağlamlıqlarını itirmiş soydaşlarımıza qayğısının təzahürü olduğunu vurğuladı.

Tədbirdə iştirak edən respublika Müharibə Veteranlar Şurasının üzvləri, müharibə veteranları dövlətimizin öz vətəndaşlarına göstərdiyi bu qayğının onlara mənəvi dayaq olduğunu bildirdilər. Azərbaycanın dahi oğlu, Prezident Heydər Əliyevin bütün mənalı ömrünü xalqımızın firavan gələcəyinə həsr etdiyi qeyd olunmuşdur. Azərbaycan dövlətinin bundan sonra da əhalinin aztəminatlı təbəqəsinin problemləri ilə məşğul olacağını bildirən tədbir iştirakçıları, ölkəmizin başçısı İlham Əliyevə çətin və məsuliyyətli işində uğurlar arzuladılar.

X X X

Tədbirin iştirakçıları adından Azərbaycan Respublikasının Prezidenti İlham Əliyevə müraciət qəbul olundu. Müraciətdə deyilir:

Möhtərəm Prezident!

XX əsrdə Azərbaycan xalqının bəşəriyyətə bəxş etdiyi nadir şəxsiyyətlərdən biri, dünya şöhrətli siyasətçi, görkəmli dövlət xadimi Heydər Əliyevin bənzərsiz ömür yolu, zəngin ictimai və siyasi fəaliyyəti müasir tariximizdə mühüm və şərəfli mərhələni təşkil edir. Bu gün böyük sürətlə dünya dövlətlərinə inteqrasiya edən müasir Azərbaycan dövləti, onun zəngin mədəni irsi və sivil intellektual potensiala malik xalqının çağdaş milli tarixinin son qərinəsi Heydər Əliyevin milli mənafeyi hər şeydən uca tutan millət və Vətən sevgisindən qaynaqlanan titanik fəaliyyəti ilə bağlı idi. Xalqımızı tarixin amansız kəşməkəşlərindən uğurla keçirib yaşatmış, inkişafa istiqamətləndirmiş, daim onun öz taleyinin hakimi olmasına çalışmış ümummilli liderimizin strateji inkişaf konsepsiyası sayəsində müstəqil Azərbaycan qloballaşan dünyada öz layiqli yerini tutaraq möhkəmlənməkdə və getdikcə regionun böyük perspektivləri olan dövlətinə çevrilməkdədir.

Məhz bu böyük şəxsiyyətin apardığı siyasət nəticəsində cəmiyyətin bütün sahələrinin mütərəqqi inkişafına nail olmaq üçün demokratik islahatlar aparıldı, sosial, siyasi, iqtisadi, hüquqi qanunvericilik bazası yaradıldı, ölkədə sivil dünyəvi vətəndaş cəmiyyətinin formalaşmasına, bütün ölkə vətəndaşlarının sosial rifahının yaxşılaşdırılmasına geniş imkanlar yaradıldı. İrimiqyaslı layihələrin həyata keçirilməsi, neft və qeyri-neft sektorlarının inkişafı, torpaq islahatı, ölkəyə xarici kapitalın cəlb edilməsi, müharibə vəziyyətində olan respublikada sabitliyin bərqərar olması və bunun nəticəsində ordu quruculuğunda əldə etdiyimiz nailiyyətlər məhz Heydər Əliyevin müdrik siyasətinin məntiqi nəticəsidir.

Cənab Prezident!

Dünya tarixində ən ağır, son dərəcə dəhşətli müharibənin – Böyük Vətən müharibəsinin iştirakçıları olan bizlərə daimi qayğını dərin minnətdarlıq hissi ilə qeyd edirik. Bu müharibənin iştirakçıları, sözün həqiqi mənasında, qəhrəmanlıq salnaməsi yaradıblar, yer üzündə sülh və ədalət naminə vuruşublar, qələbə qazanıblar.

Ömür yolu milyonlara örnək olan ümummilli liderimiz Heydər Əliyev siyasət meydanında peyda olan bir qrup siyasətbazların bu qələbəni saxtalaşdırmaq, xalqın qəhrəmanlığını əsassız olaraq gözdən salmaq cəhdlərinə son qoydu. Milyonlarla insanın qanı ilə yazılmış tarixi yenidən yazmaq və dəyişdirməyə, böyük qələbələrin əhəmiyyətini şüurlardan çıxarmağa çalışanlar ifşa edildi. Eyni zamanda, bu qələbə bir daha sübut etdi ki, ədalətsiz və işğalçılıq müharibələri məğlubiyyətə məhkumdur.

Bu gün Azərbaycanın Müharibə və Silahlı Qüvvələr veteranları dövlətin böyük qayğısı ilə əhatə olunublar. Sağlamlığımızın qorunması üçün Əmək və Əhalinin Sosial Müdafiəsi Nazirliyi tərəfindən müntəzəm olaraq tibbi reabilitasiya vasitələri, sanator-kurort müalicəsi, minik avtomobilləri ilə təmin edilməyimiz məhz bu qayğının nümunəsidir.

Zati-Aliləri!

Zəkasının qüdrəti ilə bir insan ömrünə sığmayan işlər görmüş Heydər Əliyevin əbədiyyətə qovuşması bizim hamımızı sarsıtdı. Fəqət, təsəllimiz budur ki, Heydər Əliyev şəxsiyyəti böyüklüyü və uzaqgörənliyi ilə öz xalqının sonrakı taleyini etibarlı əllərə tapşırdı. Bu məsələdə də ümummilli lider özünəməxsus uzaqgörənlik nümayiş etdirdi, özündən sonra da xalqın hər yerdə və hər zaman milli dövlətçilik mənafeyini qoruya bilən şəxsi – Sizi xalqa ləyaqətlə xidmət etməyə qadir bir şəxs kimi gördüyünü bildirdi. Dahi rəhbərimizin qurub yaratdığı, hər cür daxili və xarici təhlükələrdən qoruyub saxladığı və inkişaf etdirdiyi ana yurdumuzu böyük diplomatiya və beynəlxalq münasibətlər məktəbi keçmiş və siyasi lider kimi mətinləşmiş, xalqına və Vətəninə son dərəcə sədaqətli şəxsiyyətə - Sizə əmanət kimi tapşırıb getməsi gələcək uğurlarımıza ən böyük zəmanətdir.

Əmin ola bilərsiniz ki, müharibə və Silahlı Qüvvələr veteranları göstərilən diqqəti daim uca tutacaq, xalqımızın qarşısında ərazilərimizin erməni təcavüzündən xilas olunması, ölkəmizin müdafiə qabiliyyətinin daha da möhkəmləndirilməsi kimi ciddi və məsul vəzifələrin həllində bundan sonra da Sizə dayaq olacaq, öz imkanlarımızı səfərbərliyə alaraq, Heydər Əliyev siyasi kursunu daim müdafiə edəcəyik.

Zati-Alinizə dərin hörmət və ehtiramla,

2003-cü ildə minik avtomobilləri alan Böyük Vətən müharibəsi əlilləri adından:

Cabbarov Ərşad Fərhad oğlu – Kəlbəcər rayonu

Şupinski Vasili İosifoviç - Bakı şəhəri

Allahverdiyev Allahverdi Əli oğlu – Oğuz rayonu

Kazımov Lazım Əmiraslan oğlu- Laçın rayonu

Əhmədov Əhməd Qəhrəman oğlu – Cəbrayıl rayonu

Tağıyev Şirəli Abdurrəhim oğlu – Şəki rayonu

Xəlilov Hümbət İmran oğlu – Laçın rayonu

Məmmədov Bəylər Rəşid oğlu – Ucar rayonu

Məmmədov Novruz Kazım oğlu – Tovuz rayonu

Əliyev Əmir Sultanəli oğlu – Bakı şəhəri

Allahverdiyev Murad Balakişi oğlu – Ağdam rayonu

İmanov Oruc Qasım oğlu – Cəbrayıl rayonu

Əliyev Əziz İrza oğlu – Bakı şəhəri

Piriyev Məmməd Zeynalabdin oğlu – Bakı şəhəri

Həsənov Çingiz Kərim oğlu – Bakı şəhəri

X X X

Tədbirin sonunda əmək və əhalinin sosial müdafiəsi naziri Əli Nağıyev veteranlara xoş arzularını bir daha çatdıraraq, avtomobillərin açarlarını və sənədlərini onlara təqdim etdi.