BQXK Qarabağda həm Azərbaycan qanunlarını, həm də öz prinsiplərini pozub - Ekspert
Bakı, 12 iyul, AZƏRTAC
Beynəlxalq Qırmızı Xaç Komitəsinin (BQXK) əsas missiyası humanitar aksiyalar reallaşdırmaqdır. Bu baxımdan onun üçün hüquqi səlahiyyətlərlə yanaşı, qeyri-rəsmi güzəştlər də tanınıb. BQXK yeganə təşkilatdır ki, hüquqi statusu bəlli olmayan ərazilərə girişi təmin edilir, münaqişəli bölgələrdə əhali ilə canlı təmasına imkan yaradılır. Bu təşkilatın simvollarını daşıyan avtomobillər münaqişə bölgələrində toxunulmaz şəkildə hərəkət edə bilir.
Amma bununla yanaşı, BQXK-nın özü üçün də müəyyən standartlar tərtib edilib ki, təşkilat onları qorumağa borcludur. O, müəyyənləşdirilmiş prinsiplərə əməl etmək öhdəliyi daşıyır. İlk prinsip budur ki, komitə humanitar aksiyalar çərçivəsindən kənara çıxmamalıdır. Münaqişədə olan tərəflərdən hansısa birinin marağına uyğun mövqe tutmamalıdır. Neytral davranmağı, müstəqilliyini qorumağı bacarmalıdır.
Bu fikirləri AZƏRTAC-a açıqlamasında Mətbuat Şurası İdarə Heyətinin üzvü, media eksperti Müşfiq Ələsgərli söyləyib.
"Təəssüf ki, Qırmızı Xaç Komitəsi Qarabağdakı fəaliyyəti dövründə bütün bu prinsipləri pozub. Azərbaycan Dövlət Sərhəd Xidməti sənədlərlə, faktlarla sübut edib ki, Komitənin simvolları altında “Laçın” sərhəd buraxılış məntəqəsindən keçid edən avtomobillər qaçaqmal daşınmasında iştirak edir. Onların qaçaqmal formasında daşıdıqları əşyaların humanitar aksiyaya heç bir aidiyyəti yoxdur. Əksinə, əhali üçün təhdid yaradan separatçı qüvvələrin təminatına xidmət ediblər. Ehtimal yaranır ki, uzun müddətdir davam edən qaçaqmalçılıq fəaliyyəti zamanı bu təşkilatın vasitəsilə Azərbaycan ərazisinə Ermənistandan silah-sursat da daşınıb.
Komitənin yerli təmsilçilərinin Ermənistanın təsirinə düşərək Qarabağda qanunazidd əməllərə bulaşmaları, qaçaqmalçılıq prosesinə qatılmaları rəzalətdir. Bu, eyni zamanda, onlar üçün müəyyənləşdirilmiş “neytrallıq”, “müstəqillik”, “tərəf tutmamaq” prinsiplərinin kobud şəkildə pozulmasıdır. Belə hərəkətlər 160 il müddətində humanitar missiya ilə çıxış etmiş BQXK-nın imicinə ciddi zərbə vurur, ona göstərilmiş etimadı zədələyir",- deyə media eksperti bildirib.
Qeyd edilib ki, BQXK hər hansı bir ərazidə dövlətlərlə ikitərəfli razılaşmalar əsasında fəaliyyət göstərə bilir. Həm də o şərtlə ki, öz mandatına, müəyyənləşdirilmiş prinsiplərə əməl etsin. Bu kontekstdən yanaşsaq, BQXK-nın Qarabağ bölgəsindəki fəaliyyəti qeyri-legitimdir, nə beynəlxalq, nə də Azərbaycan qanunları ilə tənzimlənmir. Qarabağ Azərbaycan ərazisidir. Burada fəaliyyət göstərən BQXK təmsilçiləri isə Ermənistan ofisinin əməkdaşlarıdır. Hazırda BQXK-nın Qarabağda fəaliyyət göstərən nümayəndələri arasında Azərbaycana dost olmayan ölkələrin vətəndaşları, ölkəmizə olduqca mənfi münasibət bəsləyən şəxslər var. Onların bəziləri neqativ fəaliyyətlərinə görə əvvəllər Azərbaycandan qovulublar. Onların BQXK-nın Ermənistan ofisinin əməkdaşları qismində Qarabağa göndərilmələri yolverilməzdir.
Azərbaycanın suveren ərazisində hansısa beynəlxalq təşkilatın başqa ölkədə yerləşən ofisinin fəaliyyət göstərməsi paradoksdur. BQXK-nın Bakı ofisi var. Əgər ciddi zərurət yaranarsa, Qarabağda BQXK-nın Bakı ofisinin təmsilçiləri fəaliyyət göstərə bilərlər. Bu baxımdan rəsmi Bakının hüququ var ki, BQXK-nın mərkəzi ofisi qarşısında məsələ qaldırsın, problemi birdəfəlik həll etsin.
Bölmənin digər xəbərləri
