Bu gün Anqolada Avropa İttifaqı - Afrika İttifaqı Sammiti işə başlayır
Berlin, 24 noyabr, AZƏRTAC
Bu gün Anqolanın paytaxtı Luandada Avropa İttifaqının (Aİ) və Afrika İttifaqının (Aİt) üzv dövlətləri liderlərinin “Səmərəli çoxtərəfli vasitəçilik vasitəsilə sülh və rifahın təşviqi” mövzusunda yeddinci Sammiti işə başlayacaq.
AZƏRTAC xəbər verir ki, Sammit iki qurum arasında tərəfdaşlığın 25, Anqola da daxil olmaqla bir sıra Afrika ölkələrinin müstəqilliyinin 50 illiyinə həsr olunub.
Anqola Prezidenti Joao Lourenço və Avropa İttifaqı Şurasının Prezidenti Antonio Koştanın həmsədrliyi ilə keçiriləcək Sammitə Avropa Komissiyasının Prezidenti Ursula Fon der Lyayen, Afrika İttifaqı Komissiyasının sədri Mahmud Ali Yusuf da qatılıblar.
İki gün ərzində liderlər əməkdaşlığın gücləndirilməsi üzrə sülh, təhlükəsizlik, idarəetmə və çoxtərəfli işbirliyi, eləcə də rifah, insanlar, miqrasiya və mobillik üzrə iki tematik sessiyada müzakirələr aparacaqlar.
Sammitin sonunda liderlərin birgə bəyanatı qəbul ediləcək.
Sonuncu Aİ-Aİt Sammiti 2022-ci ilin fevralında Brüsseldə keçirilib. Həmin tədbirdə liderlər yenilənmiş tərəfdaşlıq üçün birgə vizyon barədə razılığa gəliblər.
Qeyd edək ki, Aİ və Afrika çoxtərəfli platformalarda əməkdaşlıq həyata keçirir. Aİ təhlükəsizlik və müdafiə siyasəti (CSDP) çərçivəsində Afrikada 12 mülki və hərbi missiya və əməliyyat icra edir. Aİ, həmçinin 2021-ci ilin martında təsis edilmiş Avropa Sülh Təsisatı vasitəsilə Afrika ölkələrini dəstəkləyir. Bu mexanizm münaqişələrin qarşısının alınmasına, sülhün təminatına, beynəlxalq təhlükəsizliyin və sabitliyin gücləndirilməsinə yönəlib.
Aİ Afrika ölkələrinin ən böyük ticarət tərəfdaşıdır və onların ixracatında Çin, Hindistan və ABŞ-dan xeyli öndədir. Afrika ölkələri birlikdə Aİ-nin dördüncü ən böyük ticarət tərəfdaşı hesab olunur. Aİ 19 Afrika ölkəsi ilə güzəştli ticarət sazişləri imzalayıb.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
