DÖVLƏT NEFT AKADEMİYASINDA YENİ LABORATORİYALAR İSTİFADƏYƏ VERİLMİŞDİR

01.11.2004 [11:59]
Çap et
A⁺ A^-

AZƏRTAC xəbər verir ki, Azərbaycan Dövlət Neft Akademiyasında AMEC şirkətinin yardımı ilə “İnformasiya texnologiyaları”, Moeller şirkətinin maliyyə dəstəyi ilə “Mikroprosessor texnikası və onun idarəetmə obyektlərinə tətbiqi”, TEMPUS proqramı layihəsi çərçivəsində isə “Avtomatlaşdırma texnikası” və “Elektronika” tədris laboratoriyaları yaradılmışdır.

Açılış mərasimində akademiyanın rektoru, AMEA-nın müxbir üzvü Siyavuş Qarayev təhsilimizə göstərilən dövlət qayğısından danışmış, yeni laboratoriyaların əhəmiyyətini vurğulamış, ali məktəbə göstərdiyi köməyə görə adıçəkilən şirkətlərin rəhbərliyinə təşəkkürünü bildirmişdir.

AMEC-in regional prezidenti Kris Douel şirkətin fəaliyyəti haqqında məlumat vermiş, ADNA-da hazırlanan kadrlardan istifadə etdiklərini də diqqətə çatdırmışdır.

Təhsil nazirinin müavini İradə Hüseynova, AMEA-nın Kibernetika İnstitutunun direktoru, akademik Telman Əliyev, Azərbaycan Texniki Universitetinin rektoru, professor Havar Məmmədov və digərləri təhsilimizin inkişafı ilə bağlı həyata keçirilən tədbirlərin əhəmiyyətindən söhbət açmışlar.

Sonra tədbir iştirakçıları müasir tələblərə cavab verən laboratoriyalarla tanış olmuşlar.