ERMƏNİLƏRİN 18 İL ƏVVƏL XOCALIDA TÖRƏTDİYİ VƏHŞİLİKLƏR BÜTÜN DÜNYADA SOYQIRIMI KİMİ TANINMALIDIR
Bakı, 26 fevral (AZƏRTAC). Fevralın 26-da Azərbaycan Universitetində Xocalı soyqırımının 18-ci ildönümü ilə bağlı mərasim keçirilmişdir.
Universitetin professor-müəllim heyəti və tələbələrin iştirak etdikləri mərasimdə Xocalı soyqırımı qurbanlarının xatirəsi bir dəqiqəlik sükutla yad olunmuşdur.
Tədbirdə Xocalı həqiqətlərini əks etdirən videogörüntülər və fotoşəkillər nümayiş etdirilmişdir.
İştirakçılara Xocalı soyqırımı ilə bağlı ətraflı məlumat verilərək bildirilmişdir ki, bu faciə XX əsrin ən dəhşətli qətliamlarından biridir. Ona görə bu qanlı hadisə bütün dünyada məhz soyqırımı kimi qəbul olunmalıdır. Beynəlxalq təşkilatların Qarabağ həqiqətlərinə, konkret olaraq Xocalı faciəsinə ikili standartlar tətbiq etməsi ədalətsizlikdir.
Natiqlər diqqətə çatdırmışlar ki, 18 il əvvəl baş vermiş misli görünməmiş qırğın barədə həqiqətləri dünya ictimaiyyətinə çatdırmaq üçün ölkəmizdə ciddi iş aparılır və artıq müəyyən irəliləyişlər əldə olunmuşdur. Xüsusilə İslam Konfransı Təşkilatı Gənclər Forumunun mədəniyyətlərarası dialoq üzrə baş əlaqələndiricisi Leyla xanım Əliyevanın təşəbbüsü ilə başlanmış “Xocalıya ədalət” beynəlxalq kampaniyası çərçivəsində Qarabağ həqiqətlərinin dünya ictimaiyyətinə çatdırılması istiqamətində həyata keçirilən tədbirlər təqdirəlayiqdir.
Tədbir iştirakçıları Xocalı soyqırımına adekvat hüquqi-siyasi qiymət verilməsi ilə bağlı dünya ictimaiyyətinə müraciət qəbul etmişlər.
Bölmənin digər xəbərləri
