Neft və Sənaye Universitetində “Heydər Əliyev və Azərbaycanın suverenlik yolu” mövzusunda tədbir keçirilib
Bakı, 7 may, AZƏRTAC
Mayın 7-də Azərbaycan Dövlət Neft və Sənaye Universitetində (ADNSU) “Heydər Əliyev və Azərbaycanın suverenlik yolu” mövzusunda tədbir keçirilib.
Bu barədə AZƏRTAC-a ADNSU-dan məlumat verilib.
Ulu Öndər Heydər Əliyevin anadan olmasının 102-ci ildönümünə həsr olunmuş tədbirdə çıxış edən ADNSU-nun rektoru dosent Rüfət Əzizov bildirib ki, Ümummilli Liderin Azərbaycan tarixindəki rolu, xüsusilə müstəqilliyimizin bərpası və möhkəmləndirilməsi, eləcə də müasir Azərbaycan dövlətinin inkişafı və dövlət quruculuğu sahəsindəki xidmətləri misilsizdir. Rektor qeyd edib ki, Ulu Öndərin dövlət idarəçiliyinə gətirdiyi sistemlilik, çeviklik və uzaqgörənlik prinsipləri bu gün müasir Azərbaycan dövlətçiliyinin əsas təməlini təşkil edir.
Rüfət Əzizov çıxışında Ümummilli Liderin təhsilin inkişafına daim xüsusi diqqət göstərdiyini də vurğulayıb. O qeyd edib ki, Azərbaycanda ixtisaslı kadrların hazırlanması, eləcə də sovet dövründə Heydər Əliyevin təşəbbüsü ilə azərbaycanlı gənclərin xaricdə təhsil almasına yaradılan şərait, müstəqillik illərində bu ənənənin davam etdirilməsi ölkənin elmi və texniki inkişafında mühüm rol oynayıb.
Rektor əlavə edib ki, Azərbaycanın ərazi bütövlüyünün bərpası və işğal altındakı torpaqların 44 gün ərzində azad edilməsinin təməlində də məhz Ümummilli Liderin uzaqgörən siyasi kursu və bu siyasi xəttin Prezident, Ali Baş Komandan İlham Əliyev tərəfindən qətiyyətlə və dinamik şəkildə davam etdirilməsi dayanır. Təsadüfi deyil ki, bu gün Azərbaycan nəinki regionda, həm də dünyada güclü və qalib dövlət kimi tanınır.
Daha sonra çıxış edən Milli Məclisin Gənclər və idman komitəsinin sədri Şahin İsmayılov Ümummilli Liderin xalq qarşısındakı misilsiz xidmətlərindən bəhs edib. Deputat vurğulayıb ki, Heydər Əliyev gənclərin milli-mənəvi dəyərlərə əsaslanan, savadlı və vətənpərvər ruhda formalaşmasına xüsusi önəm verib. Onun rəhbərliyi ilə həyata keçirilən gənclər siyasəti Azərbaycan cəmiyyətində sağlam, fəal və məsuliyyətli vətəndaşların yetişməsində mühüm rol oynayıb.
Şahin İsmayılov qeyd edib ki, Azərbaycanda dövlətçilik ənənələrinin formalaşması, hüquqi və demokratik dövlət quruculuğunun əsaslarının qoyulması Ulu Öndərin adı ilə bağlıdır. Bu dövlətçilik ənənələri indi də ölkənin inkişaf yolunu müəyyən edən əsas ideoloji dayaq kimi aktuallığını qoruyur.
Tədbirdə Ümummilli Liderin həyat və siyasi fəaliyyətinə dair sənədli film nümayiş etdirilib. Sonra Ulu Öndər Heydər Əliyevin həyat və fəaliyyətinə həsr olunmuş esse müsabiqəsinin qalibləri elan olunub.
Sonda Şuşa Dövlət Musiqili Dram Teatrının aktyorları tərəfindən Ümummilli Liderə həsr olunmuş tamaşa nümayiş etdirilib.
Bölmənin digər xəbərləri
