RUSİYA VƏ UKRAYNA İKİLİ VƏTƏNDAŞLIQ HAQQINDA QANUNUN QƏBUL EDİLMƏSİNİ İSTƏYİRLƏR

01.11.2004 [16:21]
Çap et
A⁺ A^-

AZƏRTAC-ın xüsusi müxbiri xəbər verir ki, Rusiya və Ukrayna öz vətəndaşlarının vizasız səfərləri barədə hökumətlərarası sazişdə dəyişikliklər edilməsi haqqında protokol imzalamışlar. Rusiyanın Ukraynadakı səfiri V.Çernomırdinin və Ukraynanın xarici işlər naziri K.Qrişşenkonun imzaladıqları protokola əsasən, Rusiya və Ukrayna vətəndaşları tərəflərdən birinin ərazisində 90 gündən artıq qalmadığı təqdirdə, olduqları yerin səlahiyyətli orqanlarında qeydə alınmaqdan azad edilirlər. Ukrayna və Rusiya vətəndaşlarında sərhəd nəzarəti orqanının ölkəyə daxil olmaq haqqında qeydi olan miqrasiya kartının olması kifayətdir. Protokol bu il noyabrın 1-dən qüvvəyə minir.

Xatırlatmaq lazımdır ki, Rusiya qanunvericiliyinə görə, bütün əcnəbi vətəndaşlar, o cümlədən MDB ölkələri vətəndaşları Rusiyaya daxil olduqları yerdə 3 gün ərzində qeydə alınmalıdırlar.

Bununla yanaşı, hazırda Rusiya və Ukrayna parlamentləri ikili vətəndaşlıq haqqında məsələnin müzakirəsinə başlamışlar.

Rusiya və Ukrayna arasında viza rejiminin sadələşdirilməsi ilə əlaqədar Rusiya Prezidenti Vladimir Putin ölkənin Təhlükəsizlik Şurasının üzvləri, parlamentin yuxarı və aşağı palatalarının sədrləri ilə müşavirə keçirmişdir. Dövlət başçısı bu məsələyə dair məsləhətləşmələrə başlamağı tövsiyə etmiş və bildirmişdir ki, Rusiya ilə Ukrayna arasında xüsusi münasibətlər mövcuddur.

RUSİYA VƏ UKRAYNA İKİLİ VƏTƏNDAŞLIQ HAQQINDA QANUNUN QƏBUL EDİLMƏSİNİ İSTƏYİRLƏR

MÜƏLLİFLƏ ƏLAQƏ

Bölmənin digər xəbərləri