Şerzod Fayziyev: Özbəkistan Prezidenti seçkiləri açıq və demokratik şəraitdə keçib
Bakı, 3 aprel, Ülviyyə Məmmədli, AZƏRTAC
Özbəkistanda prezident seçkiləri milli seçki qanunvericiliyinə və beynəlxalq hüququn hamı tərəfindən qəbul olunmuş demokratik prinsiplərinə tam uyğun şəkildə - açıq və şəffaf keçirilib.
AZƏRTAC xəbər verir ki, bu barədə Özbəkistanın Azərbaycandakı səfiri Şerzod Fayziyev ölkəsində prezident seçkilərinin yekunlarına dair mətbuat konfransında məlumat verib.
Onun sözlərinə görə, səsvermədə 18 milyon 942 min vətəndaş iştirak edib. Özbəkistan Mərkəzi Seçki Komissiyasının bəyanatına görə, səslərin 91,08 faizi hazırkı Prezidentə, Özbəkistan Liberal-Demokrat Partiyasından namizəd İslam Kərimova verilib.
Diplomatın sözlərinə görə, seçkilərin şəffaflığını digər beynəlxalq təşkilatlardan müşahidəçilər də təsdiq ediblər.
Səfir onu da bildirib ki, MDB missiyasının tərkibində Azərbaycandan müşahidəçi qismində jurnalistlər, Milli Məclisin üzvləri, Azərbaycan MSK-nın nümayəndələri, ekspertlər iştirak ediblər.
Seçkilərdə müşahidəçi qismində iştirak edən Dövlət İdarəçilik Akademiyasının Siyasi Araşdırmalar İnstitutunun direktoru Elman Nəsirov bildirib ki, seçkilər lazımi səviyyədə keçib, seçicilər üçün hər cür şərait yaradılıb.
Ekspert İlqar Vəlizadə deyib ki, seçkilərdə böyük fəallıq müşahidə olunub, insanlar seçki məntəqələrinə toy-bayram kimi gəliblər.
Xatırladaq ki, 29 mart seçkilərində İslam Kərimovla bərabər, “Milli Tıklanış” Partiyasından namizəd Akmal Saidov (3,08%), Xalq-Demokrat Partiyasından namizəd Hatamjon Ketmonov (2,92%), “Adolat” partiyasından namizəd Nərimon Umarov (2,05%) iştirak ediblər.
Bölmənin digər xəbərləri
