Siyasətin iki üzü və ya ikiüzlü siyasətçi
Bakı, 12 iyun, AZƏRTAC
Azərbaycanın dünya birliyindəki mövqeyinin getdikcə möhkəmlənməsi ölkəmizə olan inam və etimadın bariz nümunəsidir. Artıq beynəlxalq ekspertlər etiraf edirlər ki, Cənubi Qafqazın postmüharibə dövrünü Azərbaycan diktə edir. Rəsmi İrəvanın yürütdüyü riyakar siyasətin iflasa uğradığı özünü açıq şəkildə büruzə verir. Digər tərəfdən, Ermənistanın baş naziri Nikol Paşinyanın ikiüzlü siyasəti işğalçı ölkəni beynəlxalq aləmdə təcrid vəziyyətinə salıb. Brüsseldə, Moskvada, Kişineuda keçirilən üç və dördtərəfli görüşlərdə, habelə beynəlxalq tədbirlərdə verdiyi vədləri bir saat sonra danan Nikol Paşinyanın sülh müqaviləsini imzalamaqdan boyun qaçırmasına artıq bəhanəsi qalmayıb. Necə deyərlər, Paşinyanın bütün manevr imkanları tükənmək üzrədir. Artıq beynəlxalq ictimaiyyətə bəllidir ki, rəsmi İrəvan qeyri-konstruktiv addımları ilə sülh və təhlükəsizliyin təmin edilməsinə mane olur.
Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.
O deyib ki, SSRİ-nin süqutundan 30 ildən artıq vaxt keçməsinə baxmayaraq, Ermənistan hələ də özünün müstəqil yolunu, siyasi kursunu müəyyənləşdirə bilməyib. Hazırda Qərblə Rusiya arasında vurnuxan Ermənistan ikiüzlü mövqeyindən əl çəkə bilmir: gah Qərbə, gah da Rusiyaya üz tutur. Azərbaycanın torpaqlarını işğal altında saxladığı müddətdə Fransadan, Avropa İttifaqından və ABŞ-dan külli miqdarda yardım alan Ermənistan bu gün yenə də ümidini yardımlara, ianələrə bağlayıb: “Hazırda Ermənistanı silah-sursatla təmin edən Fransadır. Bu ölkə hələ də qeyri-demokratik yolundan, ikitərəfli mövqeyindən, ayrı-seçkiliyindən və beynəlxalq hüquq normalarına hörmətsizliyindən əl çəkmir, dövlətlərarası münasibətlərdə səmimi olmadığını açıq şəkildə nümayiş etdirir. Görüşlərdə birgə bəyanatları imzalayan, sülh müqaviləsini imzalayacağını vəd edən Paşinyan pərdə arxasında Fransa Prezidenti Makronun hiyləsi və diktəsi ilə hərəkət edir. Axı, Ermənistan işğalçı ölkə olmasında Fransadan heç də geri qalmır. Əslində, Paşinyanla Makrona bir ad daha çox yaraşır: siyasət dəllalları”.
Ə.Bədəlov deyib ki, rəsmi İrəvanın riyakar siyasəti və Paşinyanın ikiüzlü siyasi gedişləri beynəlxalq ictimaiyyəti də təngə gətirib. Azərbaycanla isə əməkdaşlıq etmək istəyən dövlətlərin sayı getdikcə artır. Çünki Prezident İlham Əliyevin sülhpərəst siyasəti, Ermənistanla münasibətlərin yaxşılaşdırılması yolunda konstruktiv mövqeyi dünya birliyində də məmnunluqla qəbul olunur: “Azərbaycan Prezidenti İlham Əliyevin bir neçə gün öncə Xankəndi və ətraf bölgədəki erməni separatçı-terrorçulara könüllü tərk-silah olmağı təklif etməsi, bunun qarşılığında onlara amnistiya vəd etməsi də ABŞ və Qərb siyasi dairələrində müsbət qarşılanıb. ABŞ Dövlət Departamentinin rəsmi təmsilçisi Metyu Miller Azərbaycan Prezidenti İlham Əliyevin amnistiya vədini dəstəklədiklərini vurğulayıb və bunu yüksək dəyərləndirib. ABŞ diplomatı deyib ki, Cənubi Qafqazda sülh prosesinin uğur qazanması tamamilə mümkündür. Bu baxımdan, biz Prezident İlham Əliyevin amnistiya barədə dediklərini alqışlayırıq.
Siyasi şərhçi bildirib ki, ötən ayın son günündə Bakı Enerji Həftəsi çərçivəsində 28-ci Beynəlxalq Xəzər Neft-Qaz, 11-ci Xəzər Beynəlxalq Energetika və Yaşıl Enerji sərgilərinin açılış mərasimi ölkəmizin dünya birliyindəki nüfuzunun artmasını təsdiqləyən növbəti hadisə oldu. ABŞ Prezidenti Co Baydenin bu münasibətlə dövlətimizin başçısına ünvanladığı məktub da Ağ evin Azərbaycana olan inam və etimadının göstəricisidir: “Prezident Co Baydenin Azərbaycanın dövlət başçısına ünvanladığı təbrik məktubundan da aydın olur ki, ABŞ Azərbaycanın beynəlxalq münasibətlər və regional təhlükəsizlik sistemindəki əhəmiyyətini və rolunu yüksək qiymətləndirir. Göründüyü kimi, ABŞ 44 günlük Vətən müharibəsinin nəticələrini və Azərbaycanın yaratdığı yeni reallıqları qəbul edir”.
Məsələ ondadır ki, Prezident Co Bayden məktubunda son 30 ildən artıq bir dövrdə Azərbaycan və ABŞ-ın transmilli təhlükələrlə mübarizədən inklüziv iqtisadi inkişafa qədər möhkəm tərəfdaşlıq yaratdığını xüsusi olaraq xatırladıb. Ağ ev sahibi ABŞ-ın Azərbaycanın yanında olduğunu qətiyyən gizlətmir. Qeyd edir ki, Azərbaycan xalqı üçün imkanların artırılmasına yönəlmiş islahatların həyata keçirildiyi dönəmdə ölkəsinin dəstəyini açıq şəkildə vəd edib. Bununla yanaşı, ABŞ-ın gələcək nəsillər üçün Cənubi Qafqazda sülhün və rifahın təşviqinə kömək göstərəcək ədalətli və dayanıqlı sülhü dəstəkləyəcəyini vurğulayıb.
“ABŞ Prezidenti Co Baydenin və Dövlət Departamenti təmsilçisinin mesajları “erməni xəyalları”na sarsıdıcı zərbədir. Halbuki, rəsmi İrəvan və onun siyasi rəhbəri son vaxtlara qədər ABŞ və Qərbin Ermənistana dəstək verəcəyinə ümid bəsləyirdi. Ancaq Ağ ev sahibi Azərbaycanın yanında olduğunu vurğuladı. Bu, həm rəsmi İrəvanın riyakar, həm də Nikol Paşinyanın ikiüzlü siyasətini ifşa etdi”, - deyə Ə.Bədəlov bildirib.
Bölmənin digər xəbərləri
