TƏL-ƏVİVİN MƏRKƏZİ BAZARINDA TERROR AKTI

01.11.2004 [20:35]
Çap et
A⁺ A^-

AZƏRTAC-ın İTAR-TASS agentliyindən aldığı xəbərə görə, noyabrın 1-də Təl-Əvivin mərkəzində, Karmel bazarında törədilən terror aktı nəticəsində, ilkin məlumata görə, 5 nəfər həlak olmuş, 40-dan çox adam yaralanmışdır. Polis nümayəndələri bildirmişlər ki, partlayıcı qurğunu fələstinli intiharçı işə salmışdır. Yerli KİV-lərin məlumatlarına görə, səhərdən xüsusi xidmət orqanları terror aktları hazırlandığı barədə 45-dək xəbərdarlıq almışlar.

Fələstin rəhbərliyi “dinc əhaliyə qarşı yönəldilən bütün əvvəlki terror aktları kimi”, bu cinayəti də pisləmişdir. Danışıqlar prosesi üzrə nazir Sahib Arikat dünya birliyini “qan tökülməsinin qarşısını almağın yeganə üsulu kimi dincliklə nizamasalma prosesini canlandırmaq üçün” maksimum səy göstərməyə yenidən çağırmışdır.

Fransanın hərbi hospitalında müayinədə olan Fələstin lideri Yasir Ərəfat Təl-Əvivdə törədilən bu terror aktını pisləmişdir. O, intensiv müalicə palatasından köməkçilərinin birinə telefonla zəng vuraraq, davam etməkdə olan zorakılığı pislədiyini bildirmişdir.

Xatırladaq ki, terrorçu-intiharçı İsraildə sonuncu iri terror aktını avqustun 31-də həyata keçirmişdi. Ölkənin cənubundakı Bəer-Şeva şəhərində törədilən həmin terror aktı nəticəsində 16 adam həlak olmuşdu.

TƏL-ƏVİVİN MƏRKƏZİ BAZARINDA TERROR AKTI

MÜƏLLİFLƏ ƏLAQƏ

Bölmənin digər xəbərləri