Tovuzda dağ turizminin inkişafı üçün əlverişli şərait var - Reportaj
Tovuz, 10 avqust, R.Novruzoğlu, AZƏRTAC
Qərb rayonlarında turizmin inkişafı üçün əlverişli şərait var. Xüsusən də Tovuz rayonunun dağlıq bölgəsində bu potensial daha çoxdur. Bura üz tutanlar əsasən yayda dağlıq ərazilərə maraq göstərdiyindən elə turizm obyektlərinin çoxu da bu yerlərdədir.
AZƏRTAC xəbər verir ki, bu il havanın qeyri-sabit keçməsi turistlərin istirahət zonalarına gəlişinə də mənfi təsir göstərib.
Rayon mərkəzindən 20-25 km məsafədə Əsrik dərəsi boyunca irəlilədikcə turizm zonasına daxil olursan. Buranın əsrarəngiz təbiəti insanları valeh edir. Yol boyu kifayət qədər istirahət obyekti var. İstirahətə gələnlər, təbii ki, şəraitli, ailəvi dincəlmək üçün münasib yer axtarırlar. Bakıdan istirahətə gələn Nəcibə Əliyeva deyir ki, dağlıq ərazilərdə istirahət üçün hər şey yaxşıdır. Xüsusən yeməklər və dadlı təamlar, sərin bulaqlar var. Lakin rabitə və internet və gecələməklə bağlı çətinlik yaşanır. “Buranın istirahət etmək üçün gözəl təbiəti var. Burada yerli təamlar da çox dadlıdır. Turistləri də cəlb etmək olar. Amma telefon şəbəkəsi bəzi yerlərdə zəifdir, danışanda çətinlik çəkərsən. Bu məkanlarda axşamlar gecələməyə də şərait yoxdur. Çünki elektrik enerjisi olmadığından gecə qalmaq olmur. Uşaqlar üçün də əlavə əyləncə yerləri qurularsa, yaxşı olar”, - deyə Nəcibə Əliyeva bildirib.
Dağlıq ərazilərdəki obyektlərdə elektrik enerjisi olmadığından bura gələnlər geri qayıdaraq ya rayon mərkəzində oteldə qalırlar, yaxud da yaxınlıqda kəndlərin birindəki fərdi evlərdə gecələməli olurlar. “İyunun əvvəlindən turizm mövsümü başlayır. Amma bu il hava şəraitindən asılı olaraq gələnlər azdır. Turizm bölgəsinə gələnlərin əksəriyyəti işığın olmamasından narazılıq edirlər. Məsələn, gecə qalmaq istəyənlər, müraciət edənlər çoxdur. Amma deyəndə ki, işıq yoxdur, heç kim qalmaq istəmir”, - deyə istirahət məkanlarından birini çalışdıran sahibkar Vahid Qasımov bildirib.
Keçən ilin iyun-iyul ayı ilə müqayisədə insanların gəlişində azalma var. Fərdi evlərdə qalmağa da üstünlük verirlər. Kənd həyatını yaşamaq, bir neçə gün, hətta aylarla qalanlar da olur. “Bu il yağışlı günlər çox oldu. Ona görə də gələnlərin sayında azalma hiss olundu. Bir aylıq evlərin kirayə haqqı 100-200 manatdır” - deyə Qandallar kənd sakini Zərifə Abbasova qeyd edib.
Tovuz rayonunda həm xarici, həm də yerli turistlərin qəbul edilməsi üçün həm beşulduz, həm də bir neçə mehmanxana fəaliyyət göstərir. Uca dağları, sıx və yaşıl meşələri, sərin bulaqları ilə məşhur olan Tovuz xüsusilə də yay aylarında insanların istirahət yerlərinə çevrilir. Rayonda qeydə alınmış turist marşrutları üzərində yerləşən tarixi abidələr, gəzməli-görməli yerlər hər kəsi heyran edir. Tovuz şəhəri daxilində Heydər Əliyev adına mədəniyyət və istirahət parkı qonaqlarla bərabər yerli sakinlərin də istirahət yeridir.
Tovuz rayonunda əsasən Xınna və Əsrik dərəsi turistləri cəlb edir. Bu yerlərdə respublikanın hər yerindən qonaq görmək olar. Dağlıq relyefə malik, saysız-hesabsız bulaqları olan bu meşə massivində gündəlik yüzlərlə turist dincəlir. Ümumiyyətlə, Tovuz rayonu ərazisində 586 bulaq mövcuddur. Təkcə Əsrik dərəsində 36 bulaq qaynayır.
Bölmənin digər xəbərləri
