UKRAYNA MDB ÖLKƏLƏRİNİN ŞƏKƏRƏ OLAN TƏLƏBATINI ÖDƏMƏYƏ HAZIRDIR
Bu barədə MDB-nin Aqrar-Sənaye Məsələləri üzrə Hökumətlərarası Şurasının Bakıda keçirilən iclasında söhbət açılmışdır. İclas iştirakçıları Birlik ölkələri üçün “Şəkər proqramı”nı müzakirə etmişlər. Ukrayna Aqrar Siyasət Nazirliyi Beynəlxalq inteqrasiya, investisiya siyasəti və aqrar biznesin inkişafı departamentinin rəisi Viktor Pismak AZƏRTAC-ın müxbirinə demişdir ki, MDB çərçivəsində, istehlakın təhlilinə əsasən, illik şəkər istehlakının defisiti 3 milyon tona bərabərdir. Onun sözlərinə görə, Ukraynanın 2005-2007-ci illəri əhatə edən Şəkər Proqramında sahəyə kompleks yanaşma vəzifəsi qarşıya qoyulmuşdur. Dövlət büdcəsində şəkər sənayesinin maliyyələşdirilməsinə 180 milyon ABŞ dolları məbləğində vəsait nəzərdə tutulmuşdur. Bu vəsait hesabına 10 minədək çuğunduryığan kombayn, digər texnika, yanacaq-sürtkü materialları alınacaq, digər zəruri işlər görüləcəkdir. Ukraynanın gücü MDB çərçivəsində çatışmayan 3 milyon ton şəkəri istehsal etməyə hələlik imkan verir. Bundan ötrü müvafiq baza, torpaq ehtiyatı, şəkər becərilməsi üçün vacib olan iqlim şəraiti, emal müəssisələri, 2 elmi institut vardır. “Biz mövcud bazanı MDB ölkələrinin şəkərlə təminatı probleminin həlli üçün təklif etməyə hazırıq. Lakin Birlik üzvü olan ölkələrdən məsələyə dövlət mənafeyindən yanaşma tələb olunur”, deyə Viktor Pismak vurğulamışdır.
Departament rəisi onu da xatırlatmışdır ki, bu gün Ukraynanın özünün şəkərə tələbatı ildə 2 milyon tondur. Ölkə, son illər 40-dək şəkər zavodunun sıradan çıxmasına baxmayaraq, 7 milyon ton məhsul istehsal etməyə qabildir.
Bölmənin digər xəbərləri
