UKRAYNA TELEVİZİYASININ “5-Cİ KANALI” CANLI YAYIMDA XOCALI QƏTLİAMININ DƏHŞƏTLİ KADRLARINI NÜMAYİŞ ETDİRMİŞDİR
Kiyev, 27 fevral (AZƏRTAC). Fevralın 27-də axşam Ukrayna televiziyasının populyar “5-ci kanalı” “Avropaya pəncərə” proqramının birbaşa efirində Xocalı soyqırımına həsr olunmuş süjet nümayiş etdirmişdir.
Verilişin aparıcısı, nüfuzlu və istedadlı televiziya jurnalistlərindən biri, Ukrayna XİN-i yanında Diplomatiya Akademiyasının dosenti İqor Slisarenko təkcə Azərbaycan xalqının deyil, həm də bəşəriyyətin tarixinə qanla yazılmış o dəhşətli faciəni əks etdirən kadrları şərh etmişdir.
İqor Slisarenko yaradıcı qrupu ilə birlikdə dəfələrlə Azərbaycanda olmuş, sağ qalmış xocalılılarla görüşmüş, o müdhiş gecə barədə onların xatirələrini lentə almışdır.
Ukrayna televiziyasının “5-ci kanalının, - onu çox vaxt düzgün xəbərlər adlandırırlar, - proqramında ölkəmizin Ukraynadakı səfiri Tələt Əliyev də Ermənistan-Azərbaycan, Dağlıq Qarabağ münaqişəsi barədə məlumat vermişdir.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
