Ulu Öndər hörmət və ehtiramla yad edilib
Bakı, 9 may, AZƏRTAC
İki dəfə Sovet İttifaqı Qəhrəmanı, tank qoşunları qvardiya general-mayoru Həzi Aslanovun ailə üzvləri, Heydər Əliyev adına Hərbi İnstitutun bir qrup kursant və zabiti, o cümlədən 108 yaşlı müharibə veteranı Hilal İbrahimov bu gün Ulu Öndər Heydər Əliyevin məzarını ziyarət ediblər. Daha sonra Birinci Şəhidlər xiyabanına gələrək Ulu Öndərin sevimli qəhrəmanlarından olan Həzi Aslanovun məzarı qarşısında keçirilən tədbirlərdə iştirak ediblər.
AZƏRTAC xəbər verir ki, əfsanəvi sərkərdənin timsalında 1941-1945-ci illər müharibəsində həlak olan 3500 nəfərdən çox azərbaycanlı döyüşçünün xatirəsi yad edilib, məzarı önünə çələnglər qoyulub, güllər düzülüb.
Həzi Aslanov haqqında bir neçə kitabın müəllifi Əməkdar incəsənət xadimi, Prezidentin fərdi təqaüdçüsü polkovnik Abdulla Qurbani çıxış edərək bildirib ki, Ulu Öndər Heydər Əliyev Azərbaycana rəhbərlik etdiyi bütün dövrlərdə şanlı döyüş tariximizə böyük sevgi ilə yanaşmış, sərkərdələrimizin xatirəsini həmişə əziz tutmuş, gənc nəslin vətənpərvərlik tərbiyəsində ata-babalarının qəhrəmanlıq ənənələrindən bəhrələnməyi məsləhət görmüşdür. Heydər Əliyevə görə xalq qəhrəmanlarını tanımadan, öyrənmədən yeni qəhrəmanlar yetişdirə bilməz.
A.Qurbani nəzərə çatdırıb ki, Ulu Öndər Heydər Əliyev Həzi Aslanovu İkinci Dünya müharibəsində iştirak edən həmvətənlərimizin ən görkəmlisi hesab edərək deyərdi ki, o, öz qəhrəmanlıq və cəsurluq nümunəsi ilə Azərbaycan xalqını dünyaya tanıtmış bir şəxsiyyətdir - həm döyüşçü, həm sərkərdə, general, həm də vətənpərvər bir insan kimi. Vətəninə sədaqətlə son nəfəsinədək döyüşmüş, həlak olmuş həmvətənimiz Həzi Aslanov bizim üçün daim əziz olub və gələcək nəsillər üçün də əziz olacaq.
108 yaşlı müharibə veteranı Hilal İbrahimov deyib: “Ulu Öndər Azərbaycan veteranlarını xalqımızın “qızıl fondu” adlandırardı. İndi mən o fondun sonuncularındanam. Bircə onu deyə bilərəm ki, xalqımız dünyanın ən xoşbəxt xalqıdır ki, bəxtinə Heydər Əliyev kimi bir dahi rəhbər, uzaqgörən görkəmli siyasi və dövlət xadimi düşüb. Bir də ona görə xoşbəxtik ki, məhz Ulu Öndərimiz Həzi kimi qəhrəmanlarımızın xatirəsini həmişə əziz tutub, adını əbədiləşdirib. Bu ənənə Müzəffər Ali Baş Komandan İlham Əliyev tərəfindən bu gün də uğurla davam etdirilir.
Vətən müharibəsi Qəhrəmanı polkovnik Nizami Mövlanov Ulu Öndərin 52 il öncə yaratdığı indiki Cəmşid Naxçıvanski adına hərbi liseyin məzunu olduğundan qürur duyduğunu, Müzəffər Ali Baş Komandan İlham Əliyevin rəhbərliyi altında Vətən müharibəsində ruhumuzun paytaxtı Şuşa şəhərinədək döyüş yolu keçdiyini və tankçı kimi Həzi Aslanovun davamçılarından biri olduğunu iftixar hissi ilə söyləyib.
Qəhrəman sərkərdənin ad və soyadını daşıyan polis general-mayoru Həzi Aslanov bu müqəddəs məkanda hələ məktəbli yaşında olarkən Ulu Öndərlə görüşlərin xatırlayıb, dahi rəhbərin həmişə Aslanovlar ailəsinə diqqət və qayğı göstərdiyini minnətdarlıqla yada salıb, bu gün də ailənin Azərbaycan Prezidenti İlham Əliyevin xüsusi diqqət və qayğısı ilə əhatə olunduğunu minnətdarlıq hissi ilə dilə gətirərək deyib:
“COVID-19” pandemiyasının geniş yayıldığı bir vaxtda Prezident və Birinci vitse-prezident Mehriban xanım Əliyevanın, keçən il isə Ali Baş Komandanın yağışlı may səhərində Həzi Aslanovun məzarını ziyarət etməsini nəslimiz heç vaxt unutmayacaq”.
Nəvə Həzi Aslanov bir daha Ulu Öndərin ənənələrini layiqincə davam etdirən dövlətimizin başçısına ailələri adından dərin təşəkkürünü bildirib və Ulu Öndərin 100 illiyi münasibətilə Aslanovlar ailəsinin təbriklərini çatdırıb.
Günün sonunadək Həzi Aslanovun məzarı önündə veteranlar, hərbi qulluqçular, ictimaiyyət nümayəndələri, gənclər və məktəblilər xalqımızın böyük oğlu Ulu Öndər Heydər Əliyevin hərb tariximizə, veteranlara və hərbi qulluqçulara göstərdiyi diqqət və qayğıdan və bu ənənələrin Müzəffər Ali Baş Komandan İlham Əliyev tərəfindən davam etdirildiyi barədə xatirələrini söyləyib və dahi lideri hörmət və ehtiramla xatırlayıblar.
Bölmənin digər xəbərləri
