Üzərliktəpə qədim yaşayış yerində aparılan arxeoloji tədqiqatlarla bağlı məruzə dinlənilib
Bakı, 12 iyul, AZƏRTAC
AMEA-nın İctimai Elmlər Bölməsinin Elmi şurasının növbəti iclası keçirilib.
Bu barədə AZƏRTAC-a AMEA-dan məlumat verilib. Bildirilib ki, AMEA-nın vitse-prezidenti vəzifəsini icra edən, İctimai Elmlər Bölməsinin Elmi şurasının sədri akademik Gövhər Baxşəliyeva tədbirin gündəliyi barədə məlumat verib.
İclasda AMEA-nın Arxeologiya, Etnoqrafiya və Antropologiya İnstitutunun baş direktoru vəzifəsini icra edən tarix üzrə fəlsəfə doktoru Fərhad Quliyevin “Üzərliktəpə qədim yaşayış yerində aparılan arxeoloji tədqiqatlar” mövzusunda məruzəsi dinlənilib.
Fərhad Quliyev bildirib ki, Ağdam şəhəri ərazisində eramızdan əvvəl II minilliyə aid coğrafi baxımdan əlverişli mövqedə yerləşən, 9 metr hündürlüyü olan Üzərliktəpə arxeoloji kompleksi Azərbaycanda və ümumən Cənubi Qafqazda say etibarı ilə az olan qədim yaşayış yerlərindən biridir. Eramızdan əvvəl II minilliyə aid olan Üzərliktəpə qədim yaşayış yeri SSRİ arxeologiyası elmi ədəbiyyatına Cənubi Qafqazın “Üzərliktəpə Orta tunc dövrü arxeoloji mədəniyyəti” kimi daxil edilib. Qarabağın işğalı dövründə erməni millətçiləri abidənin populyarlığından istifadə edərək ermənilərin ilk Qarabağda məskunlaşmasını Üzərliktəpə qədim yaşayış yeri ilə bağlamağa cəhd ediblər.
O, şanlı Qələbəmizdən sonra 2022-ci ilin fevralından etibarən Üzərliktəpə abidəsində arxeoloji qazıntı işlərinin bərpa edildiyini bildirib: “Nəticədə, abidədə 7 ay ərzində 800 kvadratmetr qazıntı sahəsində aparılmış genişmiqyaslı arxeoloji qazıntılar zamanı müxtəlif dərinliklərdə dörd minillik tarixi olan (orta tunc) 220 tikili strukturları torpaqdan təmizlənib. Qazıntılar zamanı aşkar olunmuş tikililər, əsasən Qarabağın qədim tayfalarının həyat tərzini əks etdirən təsərrüfat quyuları, dulus, metaləritmə və digər təyinatlı ocaqlardan ibarətdir”.
Alim çıxışının sonunda mövzu istiqamətində gəldiyi nəticələri, konkret təkliflərini irəli sürüb.
Məruzə dinlənildikdən sonra mövzu ətrafında müzakirələr aparılıb, suallar cavablandırılıb.
İclasda bir sıra elmi-təşkilati və kadr məsələləri də müzakirə olunub.
Akademik Gövhər Baxşəliyeva, həmçinin AMEA-nın İctimai Elmlər Bölməsinin elmi-tədqiqat müəssisələrinin 2023-cü ilin birinci yarısındakı elmi və elmi təşkilati fəaliyyətinin yekunlarına həsr olunmuş hesabat iclaslarına təhkim olunan bölmə üzvlərinin fikirlərini öyrənib.
Elmi-tədqiqat müəssisələrinin fəaliyyətini yüksək dəyərləndirən bölmə üzvləri, həmçinin qarşıda duran problemlərdən söz açıblar.
Sonda akademik Gövhər Baxşəliyeva bir sıra məsələlərlə əlaqədar müəssisələrin rəhbərlərinə tapşırıq və tövsiyələrini verib.
Bölmənin digər xəbərləri
