Vardanyan “ssenarisi” də baş tutmadı
Bakı, 1 mart, AZƏRTAC
Ermənistan Azərbaycan ərazilərini işğal altında saxladığı 30 il ərzində Qarabağ və Şərqi Zəngəzur iqtisadi rayonlarının yeraltı-yerüstü sərvətlərini vəhşicəsinə talayıb. Hələ bu azmış kimi, xarici şirkətləri qanunsuz şəkildə bölgəyə cəlb edib. Prezident, Ali Baş Komandan İlham Əliyevin rəhbərliyi ilə yenilməz ordumuz 2020- ci il noyabrın 10- da Ermənistanın işğalçılıq siyasətinə son qoyduqdan sonra ermənilərin təbii sərvətlərimizin talançılığının da qarşısı alındı. İşğaldan azad edilmiş ərazilərdən fərqli olaraq, Rusiya sülhməramlılarının müvəqqəti yerləşdiyi ərazilərdə təbii sərvətlərimizin talanı davam etdirilirdi. Qarabağla heç bir bağlılığı olmayan erməni əsilli rusiyalı milyarder Ruben Vardanyan da Azərbaycana məxsus təbii sərvətlərdən faydalanmaq üçün bu bölgəyə transfer edildi. Xankəndiyə kabab iyinə gələn Vardanyan bir müddət sonra tamam başqa bir mənzərə ilə qarşılaşdı.
Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.
O deyib ki, Xankəndidə separatçıları daha da fəallaşdırmaq, bu yolla Qarabağda gərginliyi artırmaq məqsədilə “Vardanyan ssenari”sinin müəllifləri istəklərinə çata bilmədilər. Bu “ssenari”nin müəllifləri sanki unudurdular ki, 30 il ərzində nüfuzlu beynəlxalq təşkilatların və qüdrətli dövlətlərin nizamlaya bilmədikləri Ermənistan- Azərbaycan, keçmiş Dağlıq Qarabağ münaqişəsini yenilməz Azərbaycan Ordusu 44 gün ərzində həll etdi. Əksəriyyəti gənclərdən ibarət olan bu ordunun qarşısında ölkəmizin yeraltı-yerüstü sərvətlərini talan etmək və ya qeyri-qanuni olaraq xarici ölkələrə daşımaq olarmı? Bu, qeyri-mümkündür. Gənclərdən ibarət ekofəalların, QHT nümayəndələrinin və könüllülərin iştirakı ilə Laçın-Xankəndi yolunda iki aydan artıqdır ki, keçirilən dinc aksiya artıq beynəlxalq təşkilatları da silkələyib. Qışın soyuğu, şaxtası, qarı və bəzi beynəlxalq təşkilatların təhdidi dinc aksiya iştirakçılarını mövqeyindən çəkindirə bilmədi”.
Ə.Bədəlov deyib ki, Xankəndiyə transfer edilən və Azərbaycan vətəndaşı olmayan, bu yerlərdən tamamilə uzaq Ruben Vardanyan Qarabağa çox böyük hay-küylə gəlmişdi. Həttəa, 30-40 nəfərlik dinc aksiyaçıların qarşısına 30- 40 min muzdlu mitinq iştirakçısı çıxartdı, ancaq bir gün. Sonra pul vermədiyinə görə, həmin muzdluların hamısı ondan qaçdı. Bölgədə baş verənlərdən xəbərsiz olan rusiyalı erməni Qarabağdakı ermənilərə də böyük vədlər vermişdi. Onun Xankəndidə qaçaq şəkildə mövcudluğu və qanunsuz fəaliyyəti Azərbaycan-Rusiya, Azərbaycan-Ermənistan və Rusiya-Ermənistan münasibətlərində gərginlik yaradırdı. Vardanyan özünü ərazidəki qızıl, dəmir-filiz yataqlarının sahibi kimi aparırdı, fəhlələrlə görüşür, bəzən də onları Azərbaycanla müharibəyə sələyir, Qarabağ iqtisadi rayonu ərazisindəki ermənilərin Azərbaycana inteqrasiyasının qarşısını almağa səy göstərirdi. Vardanyan iddia edirdi ki, guya, Qarabağda 89 layihəsi var. O, Qarabağda yaşayan erməni əsillli Azərbaycan vətəndaşlarının vəziyyətini getdikcə gərginləşdirir, kimlərinsə “ssenari”sini icra edərək bölgəni müharibə həddinə çatdırırdı.
Siyasi şərhçi Prezident İlham Əliyevin Almaniyada 59-cu Münxen Təhlükəsizlik Konfransındakı çıxışından bəzi məqamları diqqətə çatdırıb:” Qarabağ erməniləri Azərbaycan vətəndaşlarıdır, azlıqdır. Azərbaycan çoxmillətli ölkədir və Azərbaycanda bütün azlıqlar mədəniyyət, dil, həmçinin təhlükəsizlik də daxil olmaqla, eyni hüquq və üstünlüklərdən faydalanırlar. Biz Qarabağdakı erməni icmasının nümayəndələri ilə praktiki təmaslara başlamağa hazırıq. Bu gün Dövlət katibi Blinkenin qarşısında mən Ermənistandan olan həmkarıma bu barədə dedim. Lakin biz bunu o zaman edə bilərik ki, Rusiya vətəndaşı, cinayətkar oliqarx, Avropada çirkli pulların yuyulmasında əli olan şəxs - Vardanyan bizim ərazimizi tərk etsin”. Dövlət başçımızın bu fikirləri həm Vardanyanın, həm də onu Qarabağa transfer edənlərin iç üzünü, xəbis niyyətlərini bir daha ortaya qoydu. “Vardan layihəsi” iflasa uğradı.
“Vardanyan qondarma dövlət naziri vəzifəsindən uzaqlaşdırıldı. “Vardanyan ssenarisi”nin müəllifləri dərk etdilər ki, Qarabağ Azərbaycandır! Bu layihənin müəllifləri başları üzərində “dəmir yumruğ”u da gördülər. Həm də azərbaycanlı ekofəalların qarşısında davam gətirə bilmədilər.Vardanyandan alət kimi istifadə edənlər bu dəfə ona Ermənistanın baş naziri postunu vəd ediblər. Ruben Vardanyan Azərbaycanın suveren ərazisini tərk etməlidir, ayrı yolu yoxdur” - deyə Ə.Bədəlov bildirib.
Bölmənin digər xəbərləri
