Bölgələrdə monitorinqlərin nəticələri açıqlanmışdır
Bakı, 3 avqust (AZƏRTAC). Mədəniyyət və Turizm, İqtisadi İnkişaf nazirlikləri nümayəndələrinin daxil olduqları monitorinq qrupu tərəfindən Azərbaycanın bir neçə bölgəsində fəaliyyət göstərən mehmanxana və mehmanxana tipli obyektlərdə son 3 həftədə davam edən monitorinqlərin nəticələri bəlli olmuşdur.
Mədəniyyət və Turizm Nazirliyinin turizm şöbəsindən AZƏRTAC-a bildirmişlər ki, monitorinq qrupu respublikanın qərb (Gəncə, Naftalan, Mingəçevir şəhərləri və Gədəbəy rayonu), şimal-qərb (Balakən, Zaqatala, Qax, Şəki, Qəbələ, İsmayıllı, Şamaxı), şimal (Xaçmaz, Qusar, Quba) və cənub (Lənkəran, Lerik, Masallı) bölgələrində fəaliyyət göstərən 137 turizm xidməti obyektinə baxış keçirmişdir.
Monitorinq qrupunun üzvləri tərəfindən obyektlərdə otaqların (kotteclərin) və çarpayıların sayı, xidmət haqqının maksimum və minimum hədləri, təklif olunmuş paketə daxil olan xidmətlərin çeşidi, hazırkı menecerlərin bu sahədəki bacarıqları, turizm şirkətləri ilə korporativ əməkdaşlıq imkanları və turizm məhsullarının satışı haqqında sorğular keçirilmiş, xidmət sahələrinin mövsümə hazırlığı və sanitariya vəziyyəti yoxlanılmışdır.
Monitorinq qrupu nəticələri nəzərə alaraq bir sıra təkliflər də irəli sürmüşdür.
Bölmənin digər xəbərləri
