Böyük Britaniya Ukraynaya 286 milyon dollar dəyərində yeni hərbi yardım paketi elan edib
London, 19 dekabr, AZƏRTAC
Böyük Britaniya Ukraynaya 225 milyon funt-sterlinq (286 milyon dollar) dəyərində yeni hərbi yardım paketi elan edib.
AZƏRTAC xəbər verir ki, bu yardım paketi Ukraynanın müdafiə imkanlarını gücləndirmək məqsədilə pilotsuz uçuş aparatları, qayıqlar və hava hücumundan müdafiə sistemləri daxil olmaqla, vacib avadanlıqların təmin edilməsini nəzərdə tutur. Elan Böyük Britaniyanın müdafiə naziri Con Hilinin çərşənbə günü Kiyevə səfərindən sonra gəlib. O, səfər zamanı Ukraynanın müdafiə naziri Rüstəm Umerovla görüşərək Britaniyanın Ukraynaya dəstəyinin sarsılmaz olacağını və bu dəstəyin 2025-ci ildə də davam edəcəyini vurğulayıb.
Yeni yardım paketi çərçivəsində 92 milyon funt-sterlinq dəniz avadanlıqlarına ayrılacaq. Bu, Ukraynanın donanmasını kiçik qayıqlar, kəşfiyyat dronları və pilotsuz səth gəmiləri ilə gücləndirəcək. Həmçinin 68 milyon funt-sterlinq hava hücumundan müdafiə sistemlərinə, o cümlədən radarların təmin edilməsinə yönəldiləcək. Bundan əlavə, 39 milyon funt-sterlinq dəyərində maliyyə vəsaiti min ədəd dron əleyhinə elektron müharibə sistemi üçün ayrılacaq ki, bu da Ukraynanın Rusiya pilotsuz təhdidlərinə qarşı mübarizəsinə dəstək olacaq.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
