Macarıstanda Aİ ilə fikir ayrılıqlarına görə məsləhətləşmələr başlayıb
Bakı, 18 noyabr, AZƏRTAC
Noyabrın 17-dən etibarən Macarıstanda ölkə vətəndaşlarının Aİ ilə fikir ayrılıqları, həmçinin Ukraynanın bloka daxil olması və ona hərbi yardımın göstərilməsi ilə bağlı öz fikirlərini ifadə edə biləcəkləri milli məsləhətləşmələr başlayıb.
AZƏRTAC xəbər verir ki, bu barədə Macarıstan hökumətinin rəsmi nümayəndəsi Aleksandra Sentkirayi özünün sosial şəbəkə hesabında bildirib.
A.Sentkirayi video-müraciətində qeyd edib ki, son vaxtlar rəsmi Brüsselin və Budapeştin Macarıstana aidiyyəti olan siyasi, iqtisadi və təhlükəsizlik problemləri ilə bağlı çoxsaylı mübahisələri yaranıb. Hökumət rəsmisi xatırladıb ki, Avropa liderləri Macarıstan rəhbərliyindən Kiyevə silah tədarükünün maliyyələşdirilməsinin artırılmasını və ölkədə mühacirlər üçün gettonun yaradılmasını, habelə mənzil-kommunal təsərrüfatı xidmətləri üzrə subsidiyaların, faiz dərəcələri üzrə “tavan” həddinin və izafi mənfəət vergilərinin ləğv olunmasını tələb edirlər.
Bundan başqa, Macarıstanın Aİ ilə uşaqların LGBT təbliğatından qorunması haqqında qanunla əlaqədar fikir ayrılıqları mövcuddur.
“Biz hər kəsi öz fikrini ifadə etməyə çağırırıq. Gəlin, birlikdə Macarıstanın suverenliyinin müdafiəsinə qalxaq” - deyə, A.Sentkirayi əlavə edib.
Bölmənin digər xəbərləri
