Misirdə Ulu Öndər Heydər Əliyevin 100 illiyinə həsr olunmuş tədbir təşkil olunub
Bakı, 8 may, AZƏRTAC
Misir-Azərbaycan Dostluq Cəmiyyətində Azərbaycan xalqının Ümummilli Lideri Heydər Əliyevin 100 illiyinə həsr olunmuş tədbir təşkil olunub. Tədbirdə səfirliyin əməkdaşları, Misirdə yaşayan və təhsil alan azərbaycanlılar, həmçinin onların ailə üzvləri, Dostluq Cəmiyyətinin təsisçiləri və cəmiyyətdə Azərbaycan dilini öyrənən tələbələr iştirak edib.
AZƏRTAC xəbər verir ki, tədbir iştirakçılarını salamlayan Misir-Azərbaycan Dostluq Cəmiyyətinin sədri, tədqiqatçı-alim Seymur Nəsirov bu günlərdə xalqımızın və dünyanın müxtəlif ölkələrində yaşayan azərbaycanlıların dahi siyasətçi, Azərbaycanı parçalanma və məhv olma təhlükəsindən xilas edərək inkişaf və əmin-amanlıq yoluna çıxaran Ümummilli Lider Heydər Əliyevin 100 illik yubileyini qeyd etdiyini bildirilib. O, diqqətə çatdırıb ki, Azərbaycan Prezidenti İlham Əliyevin Sərəncamına əsasən, 2023-cü il ölkəmizdə “Heydər Əliyev İli” elan olunub. S. Nəsirov qeyd edib ki, Ulu Öndərin 100 illik yubileyi münasibətilə Dostluq Cəmiyyəti tərəfindən silsilə tədbirlər davam edəcəkdir.
Sonra Azərbaycanın Misirdəki səfiri Elxan Poluxov çıxış edərək Misir Prezidenti Əbdülfəttah Əs-Sisinin 2023-cü ilin yanvarında Azərbaycana səfərini ölkələrimiz arasında münasibətlərin və əməkdaşlıq əlaqələrinin yüksək səviyyədə olmasının bariz nümunəsi adlandırıb. O bildirib ki, iki ölkə arasında dostluq əlaqələri qədim tarixə söykənir və xalqlarımızı bir-birinə böyük hörmət və doğmalıq hissləri bağlayır. Səfir bütün sahələrdə hiss olunan inkişafın yaxın gələcəkdə daha da yüksələn xətlə davam edəcəyini vurğulayıb. O, diasporumuzun keçirdiyi tədbirlərdə Azərbaycan icması ilə birlikdə ölkəmizə dost münasibəti bəsləyən yerli ictimaiyyətin nümayəndələrinin iştirak etməsini təqdirəlayiq hal kimi dəyərləndirib.
Tədbirdə çıxış edən, Misir Ərəb Respublikası Ali Təhsil Nazirliyinin xarici əlaqələr üzrə baş direktoru Bağdadi İmam və Orta Asiya və Qafqaz məsələləri üzrə tədqiqatçı jurnalist Əhməd Əbdu Tarabek Ulu Öndərin Misirlə Azərbaycan arasında əlaqələrin inkişafında müstəsna xidmətləri olduğunu qeyd ediblər.
Tədbirin sonunda Dostluq Cəmiyyətindəki kurslarda Azərbaycan dilini öyrənən tələbələr Ulu Öndərə həsr edilmiş şeirlər söyləyiblər.
Qeyd edək ki, hazırda Misir-Azərbaycan Dostluq Cəmiyyətinin nəzdindəki kurslarda Azərbaycan dili ilə yanaşı, müxtəlif fənlər üzrə 42 ölkədən 450-yə yaxın gənc ödənişsiz təhsil alır.
Bölmənin digər xəbərləri
