Moskvaya gələn turistlər şəhərin bütün tarixi abidələrini qısa müddətdə seyr edə bilirlər
Bakı, 1 avqust (AZƏRTAC). Rusiya paytaxtında “Siti-tur” avtobus marşrutları fəaliyyətə başlamışdır. Bu marşrut Moskvaya gələn turistlərin şəhərin bütün tarixi abidələrini qısa müddətdə seyr etməsinə şərait yaratmışdır.
Dairəvi ekskursiya marşrutu şəhərin bütün başlıca turizm məkanlarını əhatə edir. Bütün turizm marşrutlarında olduğu kimi, burada da “hop-on”, “hop-off” sistemi tətbiq olunmuşdur. Başqa sözlə, turistlər istədikləri dayanacaqda enə, buradakı memarlıq abidələrini seyr edə və eyni biletlə yenidən marşruta qayıda bilərlər. Marşrutda gəzintinin qiyməti 500-1000 rubl arasında dəyişir. Avtobuslar səhər saat 9-dan axşam saat 22-dək fəaliyyət göstərir.
Hazırda Moskvanın ictimai nəqliyyatında xüsusi zolaqlar sistemindən istifadə olunduğu üçün “Siti-tur” avtobusları şəhərin tarixi abidələri ilə yaxından tanış olmağın ən yaxşı vasitələrindən biridir. Avtobuslarda audio-bələdçilər turistlərə tarixi abidələr haqqında məlumatları 8 dildə çatdırırlar.
Azərbaycanın paytaxtı Bakıda da artıq iki ildir ki, “Şəhər turu” reallaşdırılır. Bu ilin may ayından isə layihə Mədəniyyət və Turizm Nazirliyi tərəfindən daha geniş şəkildə davam etdirilir. Moskvadan fərqli olaraq Bakıda bu ilin sonunadək ölkəmizə gələn turistlərə bu turdan ödənişsiz yararlanmaq imkanı yaradılmışdır.
Bölmənin digər xəbərləri
