Lənkəran, 8 may, İsmayıl Cəfərli, AZƏRTAC

Heydər Əliyevin zəhmət adamları ilə keçirdiyi görüşləri, onlara verdiyi dəyəri gözlərimlə görüşmüşəm. O zaman mənim 23 yaşım var idi. Sadə və zəhmətkeş kənd adamlarına deputat olmaq şansı verirdi. Biz təsərrüfatçıları kəndə, torpağa bağlayaraq daim ruhlandırırdı. Bu canlanma və qayğı sovetlər dövründə Azərbaycanı kənd təsərrüfatında öncül sıraya çıxardı.

Bunu Ulu Öndərlə bağlı xatirələrini AZƏRTAC-la bölüşən iki dəfə SSRİ Ali Sovetinin deputatı seçilmiş, SSRİ Dövlət mükafatı laureatı, “Qırmızı bayraq” ordenli Lənkəran sakini Kəsirə Həsənova söyləyib.

Kəsirə Nəcəfəli qızı Həsənova 1950-ci il mayın 29-da Lənkəran rayonunun Aşağı Nüvədi kəndində anadan olub. Tərəvəz sahələrində fəhlə kimi çalışan Kəsirə Həsənova hələ 23 yaşında ikən Ulu Öndərin cənub bölgəsinə səfəri zamanı onunla görüşmək fürsəti yaranıb. Elə hər şey bu görüşdən sonra başlayıb. Sadə zəhmət adamlarının əməyinə yüksək qiymət verən Heydər Əliyev gənc təsərrüfatçının bu sahədə püxtələşməsi üçün dəstək olub.

“Heydər Əliyev fəhləyə, kolxozçuya, bir sözlə, bütün əmək adamlarına zəhmətinə görə layiqli qiymət verirdi. Onun irəliyə çəkdiyi, böyük ruh yüksəkliyi verərək torpağa bağladığı zəhmət adamlarından biri də mənəm”, – deyən Kəsirə Nəcəfli xatirələrini bölüşür: “1973-cü ildə Heydər Əliyev Lənkərana gəlmişdi, bizimlə görüşdü. Mənim əllərimə baxdı, əllərim cadar-cadar idi. Dedi, “Afərin, bu qız kimdir belə? Bunun əlləri cadar-cadardı, deyəsən torpaq adamıdır”. Ətrafdakılar dedilər ki, fəhlə işləyir. “Çox qoçaq qıza oxşayır, mən səni qabağa çəkərəm. Belələrini qabağa çəkin, zəhmət adamlarını həmişə qiymətləndirin”, - dedi”.

Bu görüşün xoş təəssüratları Kəsirə Həsənovanın yaddaşında əbədilik şirin xatirəyə çevrilir. O, adi fəhləlikdən deputat olmağa qədər yüksəlir: “Bəli, o gündən mən Heydər Əliyevin bir kəlmə sözü ilə ruhlandım, təzədən torpağa bağlandım, torpaqla əlləşdim, torpaqla vuruşdum. O zaman biz sahələrdə kələm, pomidor, badımcan, bibər, xiyar əkirdik. Özü də əl ilə əkirdik, indi isə texnikalar var. Bir briqadir 30 hektar sahəyə baxırdı, 25 nəfər onu becərirdik, belləyirdik, əkirdik, sonra da əl ilə yığırdıq. O illərdə bizim sovxozumuz 25-ci qurultaya 21 min ton tərəvəz məhsulu vermişdi. Bununla da Baloğlan Abbasov adına sovxoz qabaqcıllar sırasında yer almışdı”.

Ulu Öndər Heydər Əliyevin zəhmət adamları ilə növbəti görüşü 1973-cü ildə Moskvada olur. Bu görüşdə də iştirak edən Kəsirə Həsənova dahi rəhbərin Vətəninə, onun övladlarına necə məhəbbətlə bağlı olduğuna bir daha şahidlik edir: “Bu foto (fotonu göstərir – red.) 47 il bundan əvvəl Kremldə çəkilib. Sessiyaya getmişdik. Heydər Əliyev bizi yığardı bir yerə, belə fotolar çəkərdik, bizimlə danışardı, söhbət edərdi. Bu şəkil də həmin görüşlərin birində Kreml sarayında çəkilib. Buradakıların hamısı SSRİ Ali Sovetinin deputatlarıdır, nümayəndələrimizdir. Rəşid Behbudov, Qurban Xəlilov, Qara Qarayev, Mirzə İbrahimov kimi dahi insanlarımız da bu şəkildə yer alıb. İldə iki dəfə Ali Sovetin sessiyasına gedirdik, orda bizimlə maraqlanırdı. Ulu Öndərdən nə qədər danışsaq bitməz. O, qəlbimizdədir, həmişə bizimlədir. Biz zəhmət adamları onu unutmarıq. Övladı indi onun yolunu davam etdirir, Allah ona cansağlığı versin, Allah onu Azərbaycanın üstündən əskik eləməsin! Qəhrəman Prezident olduğunu göstərdi, 44 gün içində Qələbə çaldıq. Allah şəhidlərimizə rəhmət eləsin, qazilərimizə cansağlığı versin, əsgər balalara güc, qüvvət, dözüm versin!”

73 yaşlı ağbirçək Kəsirə Həsənovanın unudulmaz xatirələrinin əksəriyyəti fotolarda öz əksini tapıb. Qəhrəmanımız deyir ki, Heydər Əliyev əmək adamlarına təkcə rəhbər kimi deyil, həm də atalıq qayğısı göstərirdi. Onlara zaman ayırırdı və bu insanlara xüsusi qayğı ilə yanaşırdı. Dahi şəxsiyyət sadə insanlarla, xüsusilə zəhmət adamları ilə söhbət etməyi xoşlayırdı. Ona görə də Azərbaycan xalqı Ulu Öndərin xeyirxahlığını, millətinə olan sevgisini və bağlılığını heç zaman unutmayacaq.