Regionlarda elektrik enerjisi itkilərinin azaldılması üçün 49 kənddə şəbəkələrdə yenidənqurma işləri görülür
Bakı, 6 fevral, AZƏRTAC
Regionlarda elektrik enerjisi itkilərinin azaldılması məqsədilə 49 kənddə elektrik şəbəkələrində yenidənqurma işləri yerinə yetirilir.
AZƏRTAC Energetika Nazirliyinə istinadla xəbər verir ki, respublika ərazisində istehlakçıların keyfiyyətli, dayanıqlı və fasiləsiz elektrik enerjisi ilə təchiz edilməsi üçün 2020-ci ildə “Azərişıq” ASC tərəfindən müvafiq işlər yerinə yetirilib. Bakı şəhərinin elektrik təchizatının yaxşılaşdırılması, elektrik enerjisinə artan tələbatın ödənilməsi üçün yeni inşa edilmiş 110/35/10 kilovoltluq 2x50 meqavat/amper gücündə “Bayramzadə” yarımstansiyası inşa edilib. Yarımstansiyanın istismara verilməsi ilə əlaqədar 260, 327, 19, 551 və 514 saylı transformator məntəqələri 6/0,4 kilovoltluq gərginlikdən 10/0,4 kilovolta keçirilib. 110 kilovoltluq “MKZ” və 227 (yeraltı) yarımstansiyaları arasında 110 kilovoltluq 2 dövrəli hava xəttinin əvəzinə hər birinin uzunluğu 4,28 kilometr olan 2 dövrəli kabel xətləri çəkilib. 110 kilovoltluq “Əhmədli” və “Həzi Aslanov” yarımstansiyaları arasında hər birinin uzunluğu 5 kilometr olan 110 kilovoltluq 2 dövrəli kabel xətləri quraşdırılıb.
Abşeron yarımadasının elektrik təchizatının dayanıqlığının və etibarlılığının artırılması növbəti 110 kilovoltluq dairəvi sxeminin yaradılması və dövlət əhəmiyyətli obyektlərin fasiləsiz elektrik enerjisi ilə təmin edilməsi məqsədilə yeni inşa edilmiş 110/35/10 kilovoltluq 2x40 meqavat/amper gücündə “Buzovna-1” yarımstansiyası istismara verilib, “Buzovna-1” və “Buzovna-2” yarımstansiyaları arasında hər birinin uzunluğu 4,2 kilometr olan 110 kilovoltluq 2 dövrəli kabel xətləri çəkilib. Xırdalan şəhərində 110/35/10 kilovoltluq “Xırdalan” yarımstansiyasının tikintisi ilə əlaqədar yarımstansiyada 35/6 kilovoltluq hər birinin gücü 16 meqavat/amper olan 2 ədəd transformator quraşdırılıb, mövcud elektrik şəbəkələrinin 220 kilovoltluq və 110 kilovoltluq “Xırdalan” yarımstansiyaları ilə əlaqələndirilməsi üçün 10 və 6 kilovoltluq 2ədəd paylayıcı qurğuları inşa edilib, 110/35/10 kilovoltluq “Xırdalan” və 35/10 kilovoltluq “Yeni Xırdalan” yarımstansiyaları arasında 35 kilovoltluq 2 dövrəli kabel xətləri çəkilib. Xırdalan şəhərində elektrik şəbəkəsinin yeni inzibati binası istifadəyə verilib, Avtomatik İdarəetmə və Nəzarət Mərkəzi yaradılıb.
Ölkə ərazisində inşa edilmiş modul tipli xəstəxanaların elektrik təchizatı üçün 6 ədəd müxtəlif gücdə komplekt transformator məntəqələri quraşdırılaraq istismara verilib. Respublika üzrə elektrik təchizatı üzrə xüsusi kateqoriyaya aid olan 72 dövlət əhəmiyyətli obyektlərin elektrik təchizatı şəbəkələrində təftiş və sınaq işləri yerinə yetirilib. Ağcabədi rayonundakı 110/35/10 kilovoltluq 2x20 meqavat/amper gücündə “Ağcabədi-2” və Tərtər rayonundakı 110/35/6 kilovoltluq 40-25 meqavat/amper gücündə “Tərtər” yarımstansiyaları yenidənqurmadan sonra istifadəyə verilib.
Regionlarda elektrik enerjisi itkilərinin azaldılması, elektrik enerjisi uçotunun dəqiq aparılması üçün istismar müddətini başa vurmuş 0,4 kilovoltluq elektrik şəbəkələrində yenidənqurma işləri yerinə yetirilib, bu işlər 46 rayonu, 91 kənd və qəsəbəni əhatə etməklə hesabat dövründə 42 kənd üzrə işlər tam yekunlaşdırılıb, 49 kənddə bu istiqamətdə işlər davam etdirilməkdədir. Hesabat müddəti ərzində ümumilikdə, 231 min 908 ədəd olmaqla əhali istehlakçılarına aid 214 min 78 ədəd, qeyri-əhali istehlakçılarına aid 17 min 830 ədəd uçot 4 dəstləri bərpa olunub. Görülmüş işlər nəticəsində istehlakçılara satılan faydalı elektrik enerjisinin ümumi yığım səviyyəsi 96,0 faizə çatdırılıb. “Azərişıq” ASC-də “ASAN Kommunal” mərkəzləri vasitəsilə abunəçilərə 17 növ xidmət göstərilir.
Bölmənin digər xəbərləri
