Azərbaycanda ekoloji alyans yaradılıb VİDEO
Bakı, 23 fevral, AZƏRTAC
Azərbaycanda ekoloji sahədə fəaliyyət göstərən və ya fəaliyyəti ilə ətraf mühit siyasətini dəstəkləyən qurumları özündə birləşdirən DANMA (Dayanıqlı Azərbaycan Naminə Milli Alyans) Alyansı təsis olunub.
AZƏRTAC-ın məlumatına görə, bununla əlaqədar keçirilən mətbuat konfransında məlumat verilərək bildirilib ki, dayanıqlı inkişaf çox əhatəli anlayış olmasına baxmayaraq onun təməlində planetimizin ekoloji sağlamlığı durur.
Alyansın koordinatoru Gülsarə Qasımova qeyd edib ki, ötən ilin martından başlayaraq IDEA İctimai Birliyinin təsisçisi Leyla Əliyevanın təşəbbüsü ilə ölkəmizdə ekologiya sahəsində fəaliyyət göstərən bir çox təşkilat və qrupların nümayəndələri arasında ətraf mühitin mühafizəsi üçün səylərin birləşdirilməsi məqsədilə inklüziv dialoqa başlanılıb. İndiyədək keçirilən interaktiv müzakirə və görüşlər nəticəsində ekolojı fəalların vahid alyansda birləşməsi zərurəti yaranıb. Alyansın əsas məqsədi Azərbaycanın yaşıl ətraf mühitin və dayanıqlı gələcəyin yaradılmasına dəstək olmaq, o cümlədən gəncləri ətraf mühitin mühafizəsinə səfərbər etmək, ölkədə ekoloji problemlərin həlli üçün özəl sektor, hökumət və vətəndaş cəmiyyəti arasında daha yaxşı əməkdaşlığa nail olmaqdan ibarətdir. Alyansa üzv olan qurumların iştirakı ilə keçirilən görüşlərdə ölkənin mövcud ekoloji vəziyyəti barədə və problemlərin həlli yolları istiqamətində müzakirələr aparılıb və araşdırmalara başlanılıb. Eyni zamanda, alyans üzvləri gələcək fəaliyyətləri barədə planların tərtibinə başlayıb.
Koordinator deyib: “Yer kürəsində ekoloji problemlər gün keçdikcə daha da mürəkkəbləşir, onlarla mübarizə isə daha böyük səy və güc tələb edir. Ətraf mühitin səmərəli mühafizəsi planetimizin gələcəyini düşünən gənc ekofəalların qüvvələrinin birləşdirilməsini, daha sistemli mübarizə yollarının düşünülməsini tələb edir. Dayanıqlığın əhəmiyyəti və ekoloji təhdidlər barədə məlumatlılığın artırılması, gənclərin ekoloji fəallığa cəlb edilməsi, ətraf mühitə qəsdən və ya təsadüfən vurulmuş zərərin araşdırılması, ətraf mühit üçün ziyansız istehlak və istehsal modellərinin təşviq edilməsi yeni yaradılan alyansın əsas vəzifələri arasındadır”.
Alyansın fəallarından Tural Məhərrəmov öz çıxışında ölkəmizdə mövcud ekoloji problemlərin həllində xarici ölkələrin təcrübəsinin öyrənilməsi və tətbiqinin zəruri olduğunu bildirib. O, tullantıların idarə olunması və bərpa olunan enerji mənbələri yaradılması sahəsində, eləcə də ətraf mühitin, ekologiyanın təmizliyi ilə əlaqədar bir sıra vacib işlərin görülməsi və bu sahədə təşkilatın qarşısında duran vəzifələrdən, Azərbaycanın yaşıllıqlar ölkəsinə çevirmək üçün bütün təbiətsevər gəncləri ətraf mühitin üzləşdiyi təhdidlərin aradan qaldırılmasında fəal iştirak etməyə, ətraf mühit problemlərinin bəşəriyyətin üzləşdiyi ən ciddi təhlükə olduğu barədə məlumat verib.
“Ecofront” ekofəallar qrupunun təsisçisi Cavid Qara meşə və təbiət ərazilərinin çirklənməsi ilə mübarizənin vacibliyini qeyd edib: “Ölkəmizdə 13-14 faiz meşə fondu torpaqları var. Təəssüf ki, bir sıra bölgələrdə həmin torpaqlar “pis meşə” adı ilə zəbt edilir, sonra həmin ərazilərdə bağ salınır və ayrı-ayrı işbazların nəzarətinə keçir. Bu halların qarşısı alınmalı və sıradan çıxan meşələrin bərpası üçün tədbirlər görülməlidir”.
O, ekstensiv üsulla inkişafın yolverilməzliyi barədə bəhs edib, təbiət ərazilərinin çirklənməsinə yol verməmək üçün səylərin birləşdirilməsini diqqətə çatdırıb.
Onu da qeyd edək ki, alyansa ilk olaraq Dünya Təbiəti Mühafizə Fondunun Azərbaycan nümayəndəliyi (WWF Azerbaijan),”EkoSfera” - Sosial Ekoloji Mərkəz, AZGREEN, “Sağlam Düşüncə” Gənclər Təşkilatı, “İnsan və Mühit” İctimai Birliyi, “Sağlam Həyata Doğru” Ekoloji İctimai Birliyi, “Sosial Hüquqların Araşdırılması” İctimai Birliyi, OIKOS və Bakı Dövlət Universiteti ekoklubunun nümayəndələri qoşulub.
Bölmənin digər xəbərləri
