Bakıda I Bakı Kitab Festivalı açılıb VİDEO
Bakı, 19 dekabr, Mikayıl Məmmədov, AZƏRTAC
Oxucuların yazıçılarla ünsiyyətdə olması, Azərbaycan milli ədəbiyyatı ilə tanış olması vacibdir.
AZƏRTAC xəbər verir ki, bunu “Azərbaycan Nəşriyyatçılar Assosiasiyası” İctimai Birliyinin (ANAİB) sədri Şamil Sadiq I Bakı Kitab Festivalının açılışı zamanı deyib. Festival Bakı İdman Sarayında ANAİB tərəfindən Mədəniyyət Nazirliyi ilə birgə təşkil edilib.
Festival “Yeni ilə yeni kitablarla!” şüarı altında keçirilir. Burada ANAİB üzvləri də daxil olmaqla 30-dan çox nəşriyyat təmsil olunur. Festivalda, həmçinin yerli qəzet və jurnallar öz çap məhsullarını nümayiş etdirir.
Festivalın açılış mərasimində ANAİB-nin sədri Şamil Sadiq salamlama nitqi ilə çıxış edib. O, qonaqlara təşəkkürünü bildirib və festivala hazırlıq prosesi barədə ətraflı danışıb.
Xalq şairi Sabir Rüstəmxanlı, Türkiyə Üsküdar Universitetinin rektoru Nazife Güngör, Mədəniyyət Nazirliyi yanında İctimai Şuranın sədri, Azərbaycan Atatürk Mərkəzinin direktoru akademik Nizami Cəfərov, Milli Məclisin deputatı Fazil Mustafa, Mətbuat Şurasının sədri Rəşad Məcid və Azərbaycanın Əməkdar artisti Rafiq Həşimov çıxışlarında kitab və mütaliənin əhəmiyyətini, cəmiyyətin inkişafındakı rolunu vurğulayıb, eləcə də təhsilin əhəmiyyətini diqqətə çatdırıblar.
Şamil Sadiq AZƏRTAC-ın müxbiri ilə söhbətində ədəbiyyatın və mütaliə mədəniyyətinin təbliği baxımından festivalın əhəmiyyətindən danışıb.
“Bizim bu tədbirdən böyük gözləntilərimiz var. Bildiyiniz kimi, sərgidə əsasən Azərbaycan dilində əsərlər çap edən nəşriyyatlar təmsil olunur. Bizim məqsədimiz oxucuları Azərbaycan ədəbiyyatı ilə tanış etməkdir. Bir çox müasir yazıçıların əsərlərinin təqdimatları keçiriləcək. Məktəblilərin və tələbələrin iştirakı gözlənilir. Bu, ANAİB tərəfindən təşkil olunan 18-ci kitab festivalıdır. İndiyədək belə festivallar Gəncə, Sumqayıt, Xırdalan, Lənkəran kimi rayon və şəhərlərimizdə keçirilib”, - deyə həmsöhbətimiz bildirib.
Festivalda ziyarətçiləri 90 faizə qədər endirimli kitablar, tanınmış yazıçı və şairlərin təqdimatları və avtoqraf sessiyaları, məşhur şəxsiyyətlərlə görüşlər, poeziya saatları, eləcə də uşaqlar üçün ucadan nağıl oxuma gözləyir.
Festival dekabrın 22-nə kimi davam edəcək və hər gün saat 10:00-dan 20:00-dək ziyarətçilər üçün açıq olacaq.
Bölmənin digər xəbərləri
