“Biologiyada nailiyyətlər və çağırışlar” mövzusunda XII beynəlxalq elmi konfransın açılışı olub
Bakı, 19 dekabr, AZƏRTAC
Bakı Dövlət Universitetinin (BDU) 105, Biologiya fakültəsinin 90 illik yubileylərinə həsr olunmuş “Biologiyada nailiyyətlər və çağırışlar” mövzusunda XII beynəlxalq elmi konfransın açılış mərasimi keçirilib.
AZƏRTAC xəbər verir ki, mərasimdə Dövlət himni səsləndirilib, Ümummilli Lider Heydər Əliyevin və şəhidlərimizin əziz xatirəsi bir dəqiqəlik sükutla yad edilib.
Giriş sözü ilə çıxış edən BDU-nun elm və innovasiyalar üzrə prorektoru Hüseyn Məmmədov 2024-cü ilin Azərbaycan Respublikasının Prezidenti İlham Əliyevin Sərəncamı ilə “Yaşıl dünya naminə həmrəylik ili” elan olunduğunu xatırladaraq, yaşıl dünya, yaşıl inkişaf və yaşıl enerji məsələlərinin dövrümüzün ən aktual problemləri olduğunu bildirib.
Diqqətə çatdırılıb ki, ölkəmizdə ekoloji siyasətin əsası Ümummilli Lider Heydər Əliyev tərəfindən qoyulub. Ulu Öndər Heydər Əliyev Azərbaycanın bioloji müxtəlifliyinin qorunmasını, ekoloji problemlərinin həllini daim diqqət mərkəzində saxlayıb, ekoloji vəziyyətin yaxşılaşdırılması, ətraf mühitin mühafizəsi, təbii sərvətlərdən səmərəli istifadə məsələlərinə xüsusi qayğı ilə yanaşıb. Bu siyasət Prezident İlham Əliyev tərəfindən uğurla davam etdirilir. Bu il ölkəmizdə dünyanın ən nüfuzlu beynəlxalq tədbirlərindən biri olan Birləşmiş Millətlər Təşkilatının (BMT) İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) uğurla həyata keçirilib. Azərbaycanın 2030-cu ilə qədər sosial-iqtisadi inkişafa dair beş milli prioritetindən biri kimi müəyyən edilmiş “Təmiz ətraf mühit və yaşıl artım ölkəsi” prioritetinə uyğun olaraq, ətraf mühitin sağlamlaşdırılması, yaşıllıqların bərpası və artırılması, su ehtiyatlarından və dayanıqlı enerji mənbələrindən səmərəli istifadənin təmin edilməsi istiqamətində mühüm işlər aparılır.
Hüseyn Məmmədov vurğulayıb ki, son illərdə BDU-da da biomüxtəlifliyin qorunması, biotibb, yaşıl metodlarla materialların sintezi, biomühəndislik, virusologiya istiqamətlərində aparılan elmi-tədqiqat işləri genişlənir, ekoloji maarifləndirmə və ekoloji məsuliyyətin artırılması üçün layihələr həyata keçirilir. BDU təbiət elmləri sahəsində kifayət qədər yaxşı kadr potensialına və infrastruktura malikdir. 2024-cü ildə ətraf mühitin mühafizəsi əleyhinə törədilmiş qeyri-qanuni əməllərin araşdırılması, bu sahədə yol verilmiş qanun pozuntularının qarşısının alınması məqsədilə Azərbaycan Respublikasının Baş Prokurorluğu ilə birgə BDU-nun nəzdində ECOLEAD Klinikası yaradılıb. Türkiyənin Antalya şəhərində keçirilmiş “TEKNOFEST-2024” Aerokosmik və Texnologiya Festivalında 3-cü yerə layiq görülmüş BDU-nun tələbə və gənc tədqiqatçılardan ibarət “ESST-6” komandasının “E-tarım sulama” layihəsi məhz ekoloji problemlərin intellektual həllinə yönəlib. BDU-da "Eko Məkan" adlı yeni ekoloji maarifləndirmə və tədqiqat mərkəzi açılıb.
Sonra Biologiya fakültəsinin fəaliyyətini əks etdirən videoçarx nümayiş olunub.
Biologiya fakültəsinin dekanı, professor Afət Məmmədova fakültənin tədris, elmi fəaliyyəti, uğurları ilə bağlı məlumat verib. O bildirib ki, keçirilən konfrans Biologiya fakültəsinin uğurlarını nümayiş etdirməklə yanaşı, bu sahədə müxtəlif ölkələrdən olan alimlərin fikir mübadiləsi aparması, yeni ideya və tədqiqatların müzakirəsi baxımından önəmlidir. Konfransa Türkiyə, İtaliya, Rusiya, Pakistan, Qırğızıstan, Özbəkistan, Çex Respublikası, Gürcüstan, İspaniyadan biologiya üzrə mütəxəssislər, araşdırmaçılar qatılıb. Tədbir çərçivəsində genetika, biotexnologiya, ekologiya, biokimya, molekulyar biologiya, biofizika, tibbi biologiya, bitki və heyvan fiziologiyası, ekotoksikologiya və nanobiotexnologiyalar kimi sahələr üzrə 173 elmi-tədqiqat işinin müzakirəsi planlaşdırılır. Beynəlxalq konfransın əsas məqsədi biologiya sahəsində müasir nəzəri və praktiki nailiyyətləri müzakirə etmək üçün platforma yaratmaqdır. Bununla yanaşı, sağlam gələcək naminə bioloji elmlərin inkişafına dair yeni ideyaların formalaşdırılması və multidissiplinar əməkdaşlığın təşviq olunması konfransın əsas hədəflərindən biridir.
AMEA-nın vitse-prezidenti, akademik İradə Hüseynova, Gənclər Fondunun icraçı direktoru Qədir Xəlilov, M.Lomonosov adına Moskva Dövlət Universitetinin professoru Mahir Məmmədov, tanınmış alim, şair, professor Mahirə Nağıqızı, BDU-nun Ekoloji kimya kafedrasının müdiri professor Sevinc Hacıyeva, Türkiyənin Yasar Universitetinin dekanı İsmayıl Türkan, Pakistanın Quaid-i-Azam Universitetinin professoru Muhammad Zafar, Özbəkistanın Andican Dövlət Universitetinin professoru Svetlana Məmbətullayeva, Ekologiya və Təbii Sərvətlər Nazirliyi yanında Bioloji Müxtəlifliyin Qorunması Xidmətinin rəis müavini Rəşad Allahverdiyev çıxışlarında biologiya elminin prioritet istiqamətləri, aktual problemləri barədə danışıb, bu sahədəki bilik və bacarıqların optimallaşdırılmasının, habelə elmi əlaqələrin genişləndirilməsinin zəruriliyini vurğulayıblar.
Konfrans öz işini bölmə iclasları ilə iki gün davam etdirəcək.
Bölmənin digər xəbərləri
