MƏDƏNİYYƏT
Elbay Qasımzadə: Beynəlxalq Memarlıq Forumunun Bakıda keçirilməsi Azərbaycana olan etimadın nəticəsidir VİDEO
Bakı, 7 iyun, AZƏRTAC
“Tarixi şəhərlərdə kütləvi turizm” mövzusunda Beynəlxalq Memarlıq Forumunun Bakıda keçirilməsi Azərbaycana olan etimadın, inamın, hörmətin nəticəsidir. Azərbaycanda digər sahələr kimi memarlıq da inkişaf edir. Bu düzgün siyasi, iqtisadi, sosial siyasətin nəticəsində mümkün olub.
AZƏRTAC xəbər verir ki, bu sözləri Azərbaycan Memarlar İttifaqının İdarə Heyətinin sədri Elbay Qasımzadə jurnalistlərə müsahibəsində deyib.
Forum çərçivəsində sərginin də keçirildiyini deyən E.Qasımzadə qeyd edib ki, bu sərgidə Ermənistan tərəfindən işğal edilən ərazilərimizdə dağıntılara məruz qalan tarixi abidələrimizə aid fotolar da yer alır. Bu sərgi vasitəsilə həm dünya ictimaiyyətinin diqqəti bir daha Dağlıq Qarabağ probleminə cəlb edilir, həm də onlara bu bölgələrimizdə dağıdılan abidələrimiz barədə məlumat verilir.