Azərbaycan Turizm İnstitutunda ölkəmizin ali təhsilinin magistratura pilləsində ilk ikili diplom proqramına başlanılır
Bakı, 9 oktyabr (AZƏRTAC). Avstriyanın İMC Krems Tətbiqi Elmlər Universitetinin prorektoru Karl Ensfelner və proqram əlaqələndiricisi Andreas Veysenbak oktyabrın 9-da Azərbaycan Turizm İnstitutunda (ATİ) magistratura pilləsində təhsil alan tələbələrlə görüşmüşlər.
AZƏRTAC xəbər verir ki, ATİ-nin rektoru, professor Cəfər Cəfərov 2012/2013-cü tədris ilindən ATİ-nin Azərbaycan-Avstriya Turizm Proqramı çərçivəsində magistratura pilləsi üzrə ikili diplom proqramı üzrə dərslərə başladığını bildirmişdir.
Rektor diqqətə çatdırmışdır ki, Azərbaycanda son illər turizmin inkişafı üçün mövcud potensialdan məqsədyönlü istifadə sahəsində bir sıra uğurlu islahatlar həyata keçirilir. 2005-cı ildən 200 tələbə ilə fəaliyyətə başlayan bu ali təhsil ocağı təkcə təhsil deyil, beynəlxalq əməkdaşlıq sahəsində də fəaliyyətini gündən-günə genişləndirir. Bu fəaliyyətin nəticəsi olaraq 2007-ci ildə ölkə tarixində ilk dəfə ATİ və Avstriyanın İMC Krems Tətbiqi Elmlər Universiteti arasında bakalavr pilləsi üzrə ikili diplom haqqında müqavilə imzalanmışdır. ATİ-nin 150-dək tələbəsi indiyədək bu proqramdan yararlanmış və hazırda təhsillərini uğurla davam etdirirlər. Proqram çərçivəsində 57 tələbə hər iki ali təhsil müəssisəsinin diplomunu almış və hazırda onlar ölkənin aparıcı turizm müəssisələrində çalışırlar.
Ötən il ATİ və Avstriyanın İMC Krems Tətbiqi Elmlər Universiteti arasında magistratura sahəsində də əməkdaşlıq müqaviləsi imzalanmışdır. Bu müqavilə Azərbaycan dövlətinin başçısının turizmə və onun kadr təminatına verdiyi önəmin daha bir nümunəsidir.
Avstriyanın İMC Krems Tətbiq Elmlər Universitetinin prorektoru Karl Ensfelner iki təhsil müəssisəsi arasında yaranmış əlaqələrin yeni mərhələyə qədəm qoymasından məmnunluğunu bildirmişdir. ATİ-nin fəaliyyətini yüksək qiymətləndirən qonaq, Avstriyanın İMC Krems Tətbiqi Elmlər Universitetinin öz fəaliyyətində beynəlxalq əməkdaşlığa xüsusi önəm verdiyini vurğulamışdır.
K.Ensfelner diqqətə çatdırmışdır ki, bu iki ali təhsil müəssisəsi arasında imzalanmış müqavilələr təkcə əməkdaşlığa xidmət etmir, eyni zamanda, dostluq ənənələrinin inkişafına öz töhfəsini verir. Qonaq yeni tədris ilində magistratura pilləsində təhsil alan tələbələri təbrik etmiş, onlara uğurlar arzulamışdır.
Sonra proqram əlaqələndiricisi A.Veysenbak təqdimatla çıxış etmiş, gəncləri bu proqramdan yararlanmağa səsləmişdir.
Bildirilmişdir ki, Avstriya Universiteti yarandığı gündən beynəlxalq standartlara uyğun karyera yönümlü proqramların təşkili ilə məşğuldur. Bu təhsil ocağının diplomantları cəmiyyətdə və iş həyatında maneəsiz yüksək mövqe tuta bilirlər. Universitetin rəhbərliyi dünyanın müxtəlif nüfuzlu ali məktəbləri ilə tərəfdaşlıq müstəvisində keyfiyyətin yüksəldilməsi prinsiplərinin uğurlu həllində maraqlıdır. Bütün bunlar İMC Krems Tətbiqi Elmlər Universitetinin təhsil və karyera sahəsində müsbət imic qazanmasına səbəb olur. ATİ-nin məhz belə bir nüfuzlu universitetlə əməkdaşlıq etməsi təsadüfi deyildir. Çünki ATİ-nin hədəfi regionda turizm ixtisası üzrə dünya standartlarına uyğun ixtisaslı kadr hazırlığı, tədqiqat və təlim sahəsində mərkəz statusu qazanmaqdır.
Bölmənin digər xəbərləri
