CƏNUBİ QAFQAZ ÖLKƏLƏRİ PARLAMENTLƏRİNİN RƏHBƏRLƏRİ VERSALDA GÖRÜŞƏCƏKLƏR

01.11.2004 [16:55]
Çap et
A⁺ A^-

Milli Məclisin mətbuat xidmətindən AZƏRTAC-a bildirmişlər ki, noyabrın 4-də Fransanın Versal şəhərində Cənubi Qafqaz ölkələri parlament sədrlərinin görüşü keçiriləcəkdir. Görüşdə Milli Məclisin sədri Murtuz Ələsgərovun başçılığı ilə deputatlardan Nizami Cəfərov və Musa Quliyevdən ibarət parlament nümayəndə heyəti iştirak edəcəkdir.

Fransa Senatının sədri Kristian Ponselenin təşəbbüsü ilə keçiriləcək görüşdə regional vəziyyət, milli irsin dəyərləndirilməsi, turizmin inkişaf perspektivləri və digər mövzularda müzakirələr aparılacaqdır.

Tədbirdə Milli Məclisin sədri Murtuz Ələsgərov Cənubi Qafqazda sülhün və təhlükəsizliyin qorunması, Dağlıq Qarabağ probleminin həlli yolları mövzusunda məruzə edəcək, müzakirə olunan məsələlərə Azərbaycan tərəfinin münasibətini bildirəcəkdir.

Səfər müddətində parlamentin sədri Parisdə ictimaiyyətin nümayəndələri ilə görüşəcək, onları maraqlandıran məsələlər barədə məlumat verəcəkdir.

Səfər noyabrın 6-da başa çatacaqdır.