Gələn il Azərbaycanın turizm potensialı iyirmi beynəlxalq sərgidə nümayiş olunacaqdır
Bakı, 31 oktyabr (AZƏRTAC). Azərbaycanın turizm potensialı hər il ayrı-ayrı xarici ölkələrdə Mədəniyyət və Turizm Nazirliyi tərəfindən icarəyə götürülmüş müxtəlif ölçülü pavilyonlarda nümayiş etdirilir.
Bu sərgilərdə ölkəmizin görməli yerləri, mədəni-tarixi abidələri, mehmanxana və turizm obyektləri əcnəbi dillərdə hazırlanmış müxtəlif adda kitabça, buklet və CD-lər vasitəsilə təbliğ olunur. Sərgidə, həmçinin nazirliyin turizm şöbəsinin əməkdaşları, ölkəmizdə fəaliyyət göstərən bir neçə turizm şirkətinin nümayəndələri də yaxından iştirak edirlər.
Mədəniyyət və Turizm Nazirliyindən AZƏRTAC-a bildirmişlər ki, 2012-ci ilin ötən dövründə Azərbaycan 18 turizm sərgisində təmsil olunmuşdur. 2013-cü ildə isə ölkəmiz 20 beynəlxalq turizm sərgisində iştirak edəcəkdir.
Bölmənin digər xəbərləri
