MİLLİ MƏCLİSDƏ QADIN PROBLEMLƏRİNƏ HƏSR OLUNMUŞ KONFRANS KEÇİRİLMİŞDİR
Tədbiri Milli Məclisin deputatı, “Lider” qadınlar ictimai birliyinin sədri Məlahət Həsənova açaraq demişdir ki, konfransın keçirilməsindən məqsəd ölkəmizin siyasi, iqtisadi, mədəni həyatında baş verən proseslərdə qadınların rolunu araşdırmaq, bu sahədə görülən işlər və gələcək planlar barədə fikir mübadiləsi aparmaqdır. Natiq, həmçinin qadın hüquqları ilə bağlı BMT-nin qəbul etdiyi qətnamələr, gender bərabərliyi, dünya qadınlarının birliyi, münaqişələrin həllində və sülhə nail olmaqda qadınların rolu barədə ətraflı məlumat vermişdir.
Sonra Milli Məclis sədrinin müavini Gövhər Baxşəliyeva, parlamentin sosial siyasət daimi komissiyasının sədri Hadi Rəcəbli, Qadın Problemləri üzrə Dövlət Komitəsinin sədri Zəhra Quliyeva, insan hüquqları üzrə müvəkkil (ombudsman) Elmira Süleymanova və başqaları çıxış etmişlər. Çıxışlarda Azərbaycan qadınının öz iradəsi və mərdliyi, saflığı və sədaqəti ilə cəmiyyətimizin həyatında, xalqımızın milli–mənəvi dəyərlərinin formalaşmasında oynadığı müstəsna rol, xalq yaradıcılığı nümunələrində, qədim rəvayət və dastanlarımızda yüksək mənəvi sifətlərlə səciyyələnən gözəl qadın obrazlarının bədii təsvirləri barədə geniş və ətraflı bəhs olunmuşdur. Qeyd olunmuşdur ki, bu gün Azərbaycan qadını dünya qadınları liqasında təmsil olunur, səsi beynəlxalq tribunalardan eşidilir, dünyada gedən sülh prosesində fəal iştirak edir.
Ölkəmizdə qadın problemlərinə xüsusi diqqət yetirilir. Qadın hüquqlarının qorunması, onların fəal siyasətə qoşulmalarının təminatı ilə bağlı çoxlu qanunlar qəbul olunmuş, bir sıra beynəlxalq konvensiyalara qoşulmuşuq. Ümummilli liderimiz Heydər Əliyevin ikinci dəfə hakimiyyətə qayıdışından sonra bu sahəyə diqqət xüsusilə artmışdır. Görkəmli siyasi xadim Heydər Əliyevin “Azərbaycan Respublikasında dövlət qadın siyasətinin həyata keçirilməsi haqqında” 2000-ci ildə imzaladığı Fərman ölkəmizdə bu sahədə mövcud problemlərin həllinə təkan verdi. Fərmanla, qadınların kişilərlə hüquq bərabərliyi, xüsusilə də onların dövlət idarəçiliyi sistemində lazımi səviyyədə təmsil olunmaları əməli surətdə öz həllini tapmışdır. Məhz bunun nəticəsidir ki, bu gün xeyli azərbaycanlı qadın deputat seçilmiş, ombudsman, nazir müavini, məhkəmə sədri təyin olunmuşlar. Bu Fərman həm də demokratikliyinə və aktuallığına görə BMT tərəfindən yüksək qiymətləndirilərək bir sıra ölkələrə model sənəd kimi göndərilmişdir.
Sonra çıxış edən digər natiqlər, Ermənistan-Azərbaycan, Dağlıq Qarabağ münaqişəsi nəticəsində Azərbaycan qadınının üzləşdiyi problemlər, sülhün əldə olunmasında onların rolu və digər məsələlərdən danışmışlar.
Bölmənin digər xəbərləri
