Deputat: Azərbaycanın ərazi bütövlüyünü bərpa edən şanlı Ordumuz güclənməkdə davam edir
Bakı, 30 dekabr, AZƏRTAC
Son illər ərzində Azərbaycanın bir çox bölgələrində yeni hərbi hissələr və şəhərciklər salınıb. Ordu quruculuğu istiqamətində aparılan işlər arasında hərbi hissələrin yaradılması xüsusi yer tutur və artıq Azərbaycanın bütün bölgələrində əksər hərbi hissələr müasir standartlara cavab verir. Ölkəmizdə ordu quruculuğu işi dövlətimizin prioritetləri sırasındadır. Azərbaycan Prezidenti, Silahlı Qüvvələrin Ali Baş Komandanı İlham Əliyev Ordumuzun gücləndirilməsi məsələsini daim diqqətdə saxlayır.
Bu fikirləri AZƏRTAC-a açıqlamasında Milli Məclisin deputatı Müşfiq Cəfərov deyib.
Deputat bildirib ki, dövlətimizin başçısının ordu quruculuğunda diqqətdə saxladığı əsas məsələlərdən biri də hərbi qulluqçuların sosial və məişət şəraitinin yaxşılaşdırılması, həyat səviyyəsinin ildən-ilə yüksəldilməsi istiqamətində həyata keçirilən ardıcıl tədbirlərdir. Bu tədbirlərin hərbi xidmətlə bağlı bütün təbəqələrdən olan şəxsləri əhatə etməsi ömrü Vətənin müdafiəsində keçən insanlara ciddi stimul verir. Hərbi qulluqçuların sığorta məbləğinin birdən-birə on dəfə, aylıq vəzifə və rütbə maaşlarının, o cümlədən ərzaq əvəzinə ödənilən kompensasiyanın isə ayrı-ayrı illərdə dəfələrlə artırılması, onlara verilən güzəşt və imtiyazların miqyasının daim genişləndirilməsi, hərbi tibb xidmətinin ən müasir dünya standartları səviyyəsində yenidən qurulması Silahlı Qüvvələrimizdə daha böyük keyfiyyət göstəricilərinin əldə olunması və 44 günlük müharibə ilə 30 illik həsrətə son qoymaqla nəticələnib.
“Artıq işğaldan azad olunan ərazilərdə də hərbi şəhərciklər yaradılıb, istifadəyə verilir. Ötən ilin oktyabr ayının 8-də işğaldan azad olunan Hadrutda yeni hərbi şəhərcik salınması Qarabağın bərpasının necə sürətli və ardıcıl şəkildə həyata keçirildiyinin bariz nümunəsidir. Hadrut əməliyyatı İkinci Qarabağ müharibəsinin tarixində dönüş idi. Ondan 8 gün sonra Füzuli azad edildi. Beləliklə, Zəngilan, Qubadlı və Laçın rayonunun cənub hissəsinin işğalçılardan azad olunmasına gedən yol açıldı. Hadrutun azadlığı ilə dastana çevrilən, öz şücaəti və qəhrəmanlığı ilə dünyanı mat qoyan hərbçilərimizin Şuşaya gedən yolunun da açılması idi.
2003-cü ildən Azərbaycan Respublikası Silahlı Qüvvələrinin Ali Baş Komandanı, Prezident İlham Əliyevin rəhbərliyi ilə Silahlı Qüvvələrin maddi-texniki bazasının möhkəmləndirilməsi istiqamətində atılan addımlar bu gün milli ordumuzun dünyanın ən qüdrətli ordularının sırasına daxil olmasına imkan yaradıb”, - deyə M.Cəfərov qeyd edib.
Deputatın sözlərinə görə, orduda hərbçilərin xidmət şəraitinin yaxşılaşdırılmasını nəzərdə tutan tikinti-quruculuq işləri də intensiv şəkildə yerinə yetirilir. İndiyədək ordumuzun çoxsaylı hərbi şəhərciyində inşa olunan onlarla əsgər yataqxanası, yeməkxana, camaşırxana, qazanxana, transformator yarımstansiyaları və qərargah korpusları xidmətin daha yüksək səviyyədə təşkilində önəmli rol oynamışdır. Bu obyektlərdə mühəndis kommunikasiya xətlərinin yenidən qurulması və ətraf ərazilərin təyinatı üzrə tamamilə abadlaşdırılması isə Silahlı Qüvvələrimizdə ən müasir hərbi təcrübənin tətbiqinə şərait yaradıb. Bütün bunlar indiyədək ordu quruculuğu sahəsində qazanılmış nailiyyətlərin yalnız bir qismidir.
M.Cəfərov müharibədən sonra yeni anlaşmalar əsasında Azərbaycana Ordusunun ən müasir silahlarla, texnikalarla təmin olunması təmin edilir. Ordusu və iqtisadiyyatı güclü olan dövlət basılmazdır. 2020-ci ildə Zəfər qazanaraq Azərbaycanın ərazi bütövlüyünü bərpa edən şanlı Ordumuz dünyanın güclü orduları sırasında güclənməkdə davam edir.
Bölmənin digər xəbərləri
